Wegɔnévɔlenu 12 - Kazambale lé Sebe Sauunu 1979

¹ Mi lé a drɔle sɔ a lɛ, wedɔɔle ɛ sɔa a lɛ; mi lé éé weplale ’é lɛ za paan, é ’ka we dɔɔa lo.

² Mi zin éé Gakelebale lé zin yé, naa, mi lé éé miblifliwe saa kɛla, Gakelebale a gya we nya.

³ Mi ’ka dɔa gligli wenyanékɛlɛle nya lo, naa, mi tegelenu ma ’ka dan nyɔɔn lɛ lo.

⁴ Le tegele a bélé tɔkoro zin zo é zana ’wuo ma, naa, le lé éé mi gya yara nya, é a bélé booboo zo é zana wɔlɛnu gi.

⁵ Mi tegelenu gibɔrɔmawenu a we drɔle saa nya; mi naanénu ’wuogibɔrɔmawenu a dabli saa nya.

⁶ Mi naanénu dérenu éé zi dɔa mi lee a nyɛ zanale we ma, naa, mi drɔlenu ’léé a mi siéwegifɛ do nya.

⁷ Woo mi naanénu guru zanaan a gi, ’té wozé nyaa; mi tegelenu lé kɔn é vo é dɔle.

⁸ Woo mi tɔ bɔa élé gikinile yɛrama, yé mi lé a bli ke é sɛrɛle a gi, wa yé boazan nya.

⁹ Dé bii a kiéné yé i wuozan a, ’bɛ fila vɔ é mini ibo kɛlɛle blɛn ta, ’té fɛblele ’ka i lee lo.

¹⁰ Mi tegele élé winu paan, naa mi nyanénu gi a pɔnpɔn.

¹¹ Mi lé éé féi paan, éé kaan fɛblele nya, naa, mi lé éé goo boawe zuo, é a ’wuosɛrɛzan nya.

¹² Mi nyané bli éé bɔa fɛ lé mi nyané a sié, a ma, naa, mi tegelenu suni éé baan.

¹³ Wenyané lé mi a fé é lɔlu nya, é a mikunsan naané nya, naa, mi tegele éé sié we tɔntɔn lee.

¹⁴ Mi ’léé dére ma lé é dan kan lɛ fɛ zin nya, yé mi do do éé fɛ yé é bɛ panyanama yɛrama.

¹⁵ ’Tugyɛzan giébɛ a tegele ébo yuɛ gi, naa, mi lé éé tɔné dɔa weplale ’é lɛ lɛ, é a wedɔɔzan nya.

¹⁶ ’Tugyɛzan é élé bliflile bɔraan é nya do, naa, mi lé éé sɔnɔwe yɔɔan, a ’wuo a a ta.

¹⁷ Mi lé éé webozen fé, éé wetegele nwɛɛn‐an, yé vié wenayezan éé dabliwe nwɛɛn‐an.

¹⁸ Mi ke ana, wo dére éé mi tuoan bélé gwɔun zo; naa, wedɔɔmunu nɛnɛ éé mi bélié.

¹⁹ Weboen fe lɔlu a é dɔle gligli yifaama, naa, viéwonɛnɛ ’ka dan mɔn lɛ lo.

²⁰ Munu lé woo gi bɔrɔan wenyané nya, dabli a wo bli gi, naa, ginanale a munu lé woo vole drɔɔ we plaan mi lɛ, ’wozé nya.

²¹ Wenaané do kpen ’ka kɛla mi tegele lɛ lo; naa, we tɔntɔn bɛn éé mi nyanénu gya.

²² Viéwolɔlunu a é naané Gakelebale yuɛ gi, naa, munu lé woo we kɛla webozen yɛrama, woo sɔa a lɛ.

²³ Wedɔɔzan é élé wedɔɔle yɔɔan, naa, ’tugyɛzannu bli éé wo nyunuan yé wo ’wolé ’tugyɛwe nwɛɛn.

²⁴ Mi lé a bɛwɔlɛi ’ka nyaan a ma lo, é dan pla lɛ mi nwiin, naa, Kun‐anwozan é dan pla lɛ mi wuo.

²⁵ We gi bɔrɔ pale éé mi fuu sié é ta, naa, dére zin éé mi gi nanaan.

²⁶ Mi tegele éé giébɛ zima gɔɔn‐an é béé lɛ, naa, mi nyanénu giébɛ éé wo saan.

²⁷ Kun‐anwozan ’ka élé dɔɔnmawi paneé lo, naa, mi lé fɛwezan kaii lé ke ta kelekele nya.

²⁸ Bélile a zi tegele ta; zi lé éé a plaan, gale ’ka ana lo.