Wegɔnévɔlenu 11 - Kazambale lé Sebe Sauunu 1979

¹ Dabli fɛdan kilo a é naané Gakelebale yuɛ gi, naa, fɛ dan kilo lé poa tegele éé sɔa a lɛ.

² Dé boblɛn da, yaragyɛwe blɛn éé dan é ziin; naa, wedɔɔle a bo kiéné munu lee.

³ Mi drɔlenu dɔbɛ wéiin éé zi gɔɔn‐an ’wo lɛ, naa, liwozannu lé zi plinlenu éé wo kulu gaan.

⁴ Blifliyi nya, fuafɛnu ’ka we do kɛla lo, naa, we tegele kɛlɛle éé mi sié ga lee.

⁵ Mi lé a dɔbɛ ke wéiin, alé we tegele alé zi ta bɔa ékema, naa, mi nyané éé diaan élé wenyané kɛlɛle ma.

⁶ Mi drɔlenu lé we tegele éé wo sié we gi, naa, woo mi nyanénu kunwo wolé mi ’namawe kɛlɛle wobo yuɛ va nya.

⁷ Dé mi nyané ga, we lé a bli ke a lɛ, ’bɛ éé saan, yé fɛ lé mi ple ke a lɛbɛnna éé kɛla boafɛ nya.

⁸ Woo mi tegele sié we tɔntɔn gi, yé mi nyané a pa gi si.

⁹ Balesɔnɔzan éé bɔluzan saan é dére nya, naa, mi tegelenu éé sié we gi wedɔɔle nya.

¹⁰ Dé mi tegelenu gi a é nanale, flamunu gi éé voo é nanale; yé dé weplekɛlɛzannu zamaga wo, woo siaan gi nanale nya.

¹¹ Mi drɔlenu lé we ma lé fla drɔɔ a é vole yé a tɔ a é bɔle, naa, a guru éé zanaan a gi mi nyanénu dére nya.

¹² Mi lé éé punmazan yé boami nya, a ’wuo a é sɛrɛle, naa, mi lé a ’wuo ke a ta, éé tadɔa.

¹³ Mi lé éé mi tɔ sɛra, éé kyeengiwenu bɔraan, naa, we vo ’é bligizan éé wo yɔɔan.

¹⁴ Dé weplale mi lɛ ’ka lo, munu éé saan; naa, sile we gi éé sié mi kiɛre lé weplale va.

¹⁵ Mi lé é kɛlɛ mi bɛ lé vɛɛnyuru nya, éé we tɔntɔn yé, naa, mi lé éé kanaan kɛlɛle mi bɛ lé vɛɛnyuru nya lee, a ta béli a é dɔle.

¹⁶ Lezan lé é ke drɔɔ, wa tɔ bɔa, yé mi plɛplɛnu woo fua blé.

¹⁷ Mi zin éé we zin kɛla ébozen lɛ, naa, gi pɔnpɔnzan ébo gi kyɛ dɔa.

¹⁸ Mi nyané éé dabli tɔnɔ yé, naa, mi lé éé we tegele kɛla, éé gooli bozen yé.

¹⁹ ’Bɛ zo lé we tegele éé goo mi nya bélile va, naa, mi lé éé goo wenaané zuo éé ga yé.

²⁰ Munu lé wo bli ’ka tegele lo, wa bélé bo zo Gakelebale yuɛ gi, naa, munu lé wo giébɛ ke wéiin, woo ɛ sɔa a lɛ.

²¹ Weboen nya, wo dan we lɛdɔ lɛ mi nyanénu gi, naa, mi tegele kulu é dan si lɛ we gi.

²² Le nɔnɔmi lé a ’wuo ke é sɛrɛle, é a bélé bɛmakyan lé wa vɔ suru nyé ma, a zo.

²³ We lé mi tegelenu bli bɔ a ma, wezin saa lé; we lé mi nyanénu ke a lɛbɛnna, bliflile lé.

²⁴ Mian éé fɛ no kiɛre, éé fua taa blé, yé mi lé élé fɛ tadɔle gié é glɛ la, nyané é dan a gyɛ lɛ.

²⁵ Wezinkɛlɛmunu é dan kan lɛ, yé mi lé éé ’yi zén‐é fɛ ta, wo dan ’yi zén lɛ yeebozen ta.

²⁶ Mi lé é ’ka fɛblele daan lo, flamunu éé bale paan a ma, naa, mi lé éé a daan, a drɔɔ a é vole.

²⁷ Mi lé éé wezin naginian, éé zin yara dɔa ’é ta, naa, mi lé éé goo wenaané zuo, wenaané éé bɔa a ma.

²⁸ Mi lé éé paan élé fuafɛnu ta, é dan dia lɛ, naa, mi tegelenu é dan nɛɛ lɛ bélé yilinu nɛɛle zo.

²⁹ Mi lé ébo lé kɔn gi kyɛ dɔa, é dan fu ye lɛ élé tɔnɔ nya, yé ’tugyɛzan é dan kɛlɛ lɛ wedɔɔzan lé luu nya.

³⁰ Mi tegele kɛlɛwe a mibéliyili nya, yé wedɔɔzan éé munu sié we gi.

³¹ Bé ye, mi tegele éé gooli yé tɛrɛ la; mi nyané valé wenyanékɛlɛzan nii? Wo ’ka ’wozé yé loo?