Wegɔnévɔlenu 1 - Kazambale lé Sebe Sauunu 1979

Wegɔnévɔle tɔnɔ a

¹ David be Salomɔn, Izraɛl nwiinzan lé wegɔnénu lé ke ’ko:

² wean ma lé é wo gyɛ, yee lé ke léé, mi ’é we dɔɔ yé ’é wepaale dɔɔ yé ’é gikinidére ’ma,

³ bɔngikiniwe valé we tegele koo, zi nɔle mi faa lɛ valé we drɔle koo, ’wo wo paa munu gi,

⁴ yé nékénénémi ’é bɔ we vasile lɛ yé pɛniɛnu ’é we dɔɔ yé ’wo bɔn‐in bɔrɔ we ma, ’bɛ faa lé we ma lé é a gyɛ.

⁵ Wedɔɔzan ’é tɔné dɔ ma, yé alé wedɔɔle gi é dan gyɛ lɛ, yé ’wuoatazan éé bɔa

⁶ gɔnévɔle koo, tɔraléénu koo, wedɔɔmunu dére valé wolé wefele koo, wo gi ’male lɛ.

É we pla pɛniɛnu lɛ

⁷ Kanale Gakelebale lee a wedɔɔle pélisiana nya; gikinile valé wepaale mi gi ’ka we do nya ’tugyɛmunu yuɛ gi lo.

⁸ An be, dé i ti a we gɔɔnna i lɛ, ’i tɔné dɔ a lɛ, yé dé i bu we paa i gi, té i sɔn vɔ a ma lo;

⁹ naa, é a tɔkoro zin nya i ’wuo ma, é valé i bɔrɔ ma kyan nya.

¹⁰ An be, dé é sɔ wenyanékɛlɛmunu lɛ léé, ’wo i saan, té bé nyi si lo.

¹¹ Dé wa fe léé: ’I da ko va; kaa go zi dɔ munu lee ma, kaa wo nyɛ zana ma, kaa san vɔ weanwiinlozannu lee é pla ma,

¹² kaa wo mini é yuɛmale bélé mi paiguru zo ma, kaa wo mini bélé munu lé wo zun guru gi, wo zo ma;

¹³ kaa dan fɛwezan zinnu gɔnɔ faa ye lɛ, kaa dan kaalé kɔnnu fan lɛ gulizarafɛnu nya;

¹⁴ i dan izé ye lɛ ko va, kaa faa lé gɔɔlipaagibala é dan kɛlɛ lɛ do kpen.

¹⁵ An be, té i go wo va lo, ’i diéra wo zuo;

¹⁶ naa, woo vlan buruwo wenyané kɛlɛna zia, yé wo ta a kelekele mi nyɛ nwɛɛnna.

¹⁷ Fɛ faa lé wo bɛa ke, séli vɔle wo lee a we pla nya;

¹⁸ yé wo, wolé tɛrɛ la lee lé wo zi dɔa, yé woboen lee lé woo san vɔa.

¹⁹ A zo lé éé kɛla munu faa lé é sɔ wo lɛ léé, ’wo fɛ yé, wo lɛ; munu faa lé wobo no blibɔle fɛ ma lɛ, éé wo saan.

²⁰ Wedɔɔle éé siaan fla worona zinu ta, éé dére nwaan flɛnu gi;

²¹ éé siaan wena woonu na; éé dére nwɛɛn‐an fla kɔnnu ’léé léma:

²² ’Wuoplɛplɛzan, i dan daan lɛ ’wuoplɛplɛwe ma mɛ yi laa? Wenanamunu é dan daan lɛ we nanale ma mɛ yi laa? ’Tugyɛzan é dan we dɔɔ lɛ mɛ yi laa?

²³ ’Ka nɔla anlé wepladére ’male we gi. Ka ye, maa dan an léli zén lɛ ka ta. Maa dan an dére paa lɛ ka gi.

²⁴ Maa ka laan, yé ka sɔn vɔa an dére ma, maa bɛ soian ka lɛ, yé mi do kpen ’ka a naginian lo,

²⁵ ka sɔn vɔa anlé weplale ma yé anlé we vɔle ka lɛ ’ka sɔa ka lɛ lo,

²⁶ bɛwemalé, maa é ziin, dé ka a nyané gi, maa dan yéri si lɛ ka ma; dé kwaa vɔ ka ta, maa dan we nana lɛ ka ma,

²⁷ dé kwaa vɔ ka ta bélé fu plɛplɛ giéle zo, dé nyané ka zi lɛ sɔɔ bélé barikoko zo, dé we tɔntɔn valé kele baa ka ta, maa dan we nana lɛ ka ma.

²⁸ Wo dan an laa lɛ, yé maa ’ka dan we lɛ lo; wo dan an gini lɛ yé wo ’ka dan an ye lɛ lo.

²⁹ ’Wuoatawe za a wo gi, yé wo ’ka kanale Gakelebale lee si lɛ a va lo,

³⁰ anlé weplale ’ka sɔ lɛ wo lɛ lo, yé anlé we vɔle wo lɛ ’ka we do kpen nya wo yuɛ gi lo, azama.

³¹ Wolé tawobɛ ma tɔnɔ é dan kɛlɛ lɛ wolé fɛblele nya, yé wobo lé weplalenu é dan wo kan lɛ;

³² naa, ’wuoplɛlɛzannu lé tɔné gi plɛplɛ éé wo gya, yé ’tugyɛmunu ta béli dɔle éé wo saan;

³³ naa, mian éé tɔné dɔa an lɛ, é dan nyana lɛ é ta béli dɔle nya, é dan vo lɛ drɔɔ, ’té wenaané do kpen kana ’ka a gi lo.