Filémɔn 1 - Kazambale lé Sebe Sauunu 1979

Weale lé

^1-2 Maa Jézu Krist lé bokɔngizan Pɔl valé ka zuané Timoté, ko ɛ ke sɛbɛ ’ko gyɛna ko sɔlɛzan Filémɔn lé é ke kolé nyanamapa béé nya, yee koo, ko buru Apia koo, kolé gulidan béé Aasip koo, munu lé woo léglizi kɛla ilé kɔn gi koo, ka lɛ.

³ Kaa Ti Bale valé Mizan Jézu Krist ’wo zin kɛlɛ ka lɛ ma, yé ’wo ka vo drɔɔ ma.

Filémɔn lé sɔlɛle valé blipale

⁴ Maa anlé Bale bɔ vɔa yifaama, ’té an bazoroan i tɔ ma.

⁵ Maa a ’ma munu ta léé, i bli a Mizan Jézu lɛ, yé Jézu sɔ i lɛ yé Kazambale lé munu sɔ i lɛ, bɛwemalé maa Kazambale bɔ vɔa.

⁶ Maa a laana Kazambale lee léé, wezin faa lé ke kaazé nya Krist gi, kaa nanale ékeva Bale lé we gi we ma lé, munu a gi dɔɔ.

⁷ Ilé munu lɔrɔpale an gi nana é baba yé é an tɔrɔ paa webozen nya. Yé an bwe, ilé we ma lé Kazambale lé munu bli dɔrala.

Pɔl Onézim lé we fe

⁸ Krist lé we ma lé a se a an lɛ léé, maa i béli dɔ, we lé é ke é zima, ilé a kɛlɛle we gi.

⁹ Naa, maa ’ka i béli dɔna lo; sɔlɛle lé we ma lé maa zanté vɔ i lɛ; maa Pɔl, maa lé an ke mi segele nya, yé ’bɛ ta loru maa lé an ke sin Jézu Krist lé bokɔngizan nya, maa a zanté vɔna i lɛ.

¹⁰ Anlé né Onézim lé, é kɛlɛ anlé né nya bokɔn gi ’ko, alé we ma lé maa a zanté vɔna i lɛ.

¹¹ É vinin é a mi boa nya i ma, naa, sin, é kɛlɛ tɔnɔyémazan nya maa valé bii lɛ.

¹² Yee lé maa ke a pana i lɛ zia ’ko, dɔlé té a sile an ma a bélé an yuɛ sole é koro gi zo.

¹³ É sɔ an lɛ kɔɔn léé, ’é vo an va bléyian va lé an ke bokɔn gi Wenéné lé we ma, an mawe kɛlɛle we gi i pa gi.

¹⁴ Naa, é ’ka sɔ lɛ an lɛ léé, an we do kpen kɛlɛ i ma trɔnné va duowo lo, té ilé wezin kɛlɛle é kɛlɛ glawe nya lo we gi; naa, é sɔ an lɛ léé, we ’ko é si ibozen va.

¹⁵ Dé we ’ko kɛlɛ léé, Onésim si i va bléyi sɛ nya, ilé a yele é ziin we gi, yé ’é vo i va lɛɛfaamaa?

¹⁶ Maa ’ka a fena léé, bé ye é ziin bélé luu zo lo, naa, sin alé we zima mini luu zé ta; bé ye sin i sɔlɛ zuané nya. É a an zuané nya, yé izé mini anzé ta, tɛrɛlawe vazia, yé é ziin Mizan gi.

¹⁷ Bɛwemalé, ilé zanté, dé i an ye i béé nya, bé si bélé maabozen zo.

¹⁸ Dé é fɛ do si i ma trɔnné vaoo, dé ilé vɛɛn aa maoo, ’i ’bɛ we vo an nwiin.

¹⁹ Maa Pɔl a gyɛ anbozen bɛ nya léé, maa dan a banwo lɛ. Anlé vɛɛn a i ma ibozen nya fɛan zo bɛ, maa ’ka ’bɛ fena lo ma.

²⁰ Iin, an bwe, ’an tɔnɔ ’ko ye i ma Mizan gi ma. ’I an bli dɔrala Krist gi ma.

²¹ An bli a i lɛ léé, i dan we ’ko nyi si lɛ, bɛwemalé an sɛbɛ ’ko gyɛ. Maa a gi dɔɔ léé, we lé maa a fe i lɛ, i dan a kɛlɛle gié lɛ ’bɛ ta.

²² We do ana é ziin, ’i yiakɔn do ma’lɛrɛ an lɛ. An bli a a lɛ léé, wo dan daan lɛ an ma, yé an go ka va é ziin, kalé bazorolenu lé we ma.

Weale voélazan

²³ Épafras, anlé bokɔngi béé lé ko ke a nya Jézu Krist gi, é we i va;

²⁴ Maak koo, Arisaak koo, Démas koo, Luk koo, wo ɛ ke anlé nyanama pa béénu nya, wo we i va.

²⁵ Kaazan Jézu Krist lé zin ’é vo i léli ta ma.