OZÉ (Osée) 9 - Kazambale lé Sebe Sauunu 1979

Ozé we lɛdɔle Izraɛl gi lɛ kini

¹ ’Kaa Izraɛlnu, ka sɔn vɔ Gakelebale ma bélé bɔrɔdɛ le zo, té ka gi é nana ’bɛ ma lo; yé wenyané ma gɔɔli lé ka ye kalé ’sa sunwona faa na, ’té é sɔ ka lɛ bɛ, té kabo nɔ ginanale lɛ ’bɛ lé we ma, bélé bɛn bɛnu zo lo.

² ’Sa sunwona valé dɔrɔyi borona ’ka dan fɛblele nɔ lɛ ka lɛ lo; dɔrɔ dɛrɛ é dan vuru lɛ ka ma.

³ Ka ’ka dan vo lɛ Gakelebale lé tɛrɛ la lo, Éfraimnu wo dan go lɛ Éjipiti tɛrɛ la wo pa gi, yé wo dan ’wo sɔnné ble lɛ Asirinu va.

⁴ Wo ’ka dan Gakelebale ban lɛ nwɛ nya lo, yé Gakelebale ’ka dan ’é ban‐ɛn ble lɛ lo. Wolé sarakanu é dan kɛlɛ lɛ wo lɛ bélé gyɛ la fɛblele zo. Munu faa lé wa blé, wo dan kɛlɛ lɛ naané. Wolé fɛblele é dan kɛlɛ lɛ wo saa zé nya, wo ’ka dan go lɛ a nya Gakelebale lé kɔn gi lo.

⁵ Dé Gakelebale lé fɛtinu yi bɔ, dé kalé zénle ékema plɛplɛ kɛlɛ, ka dan a kɛlɛ lɛ kaa?

⁶ Ka yua, wa gona, fɛ guru zanale a gi we ma; Éjipiti é dan wo si lɛ; Mofa munu é dan mipana nɔ lɛ wo lɛ. Wolé gɔɔlifu fɛwezannu é dan kɛlɛ lɛ danan zé nya yé yoné lé plin é dan tuu lɛ wolé kɔnnu gi.

⁷ We lɛdɔ mi gi yi bɔ; we lɛgi pa mi ma yi bɔ; Izraɛlnu é dan go lɛ a gi dɔɔ lɛ. Balelayezan ’wuo sɛrɛ, yé mi lé Bale éé we fé a lɔlu nya, é dan gyɛ yiblawe fe lɛ; kalé weplenu valé ka nwale mi ma a blɛn, ’bɛzama.

⁸ Éfraim munu nwa anlé Bale ma; yé wo mianékunséli vɔ balelayezan lee zi faa ’léé, yé wa za pa alé Bale lé kɔn gi.

⁹ Wa é vɔnle bélé we lé é bɔ Gibéa yi la, a zo; wolé weple sele é dan dɔ lɛ Gakelebale gi, yé é dan we lɛdɔ lɛ wo gi wolé wenyanénu ma.

Izraɛl lé wenyané valé ’é zuowe

¹⁰ Maa Izraɛl ye bélé dɔrɔporo zo bwi gi; maa ka tranu ye bélé bɔrɔyili poro vinin zo; naa, wo go Baal‐Péɔɔ zuo, yé wobo nɔ miyili lɛrɛlɛrɛ lɛ, yé wo kɛlɛ bozofɛ nya, bélé ’wo sɔlɛfɛ zo.

¹¹ Éfraim tɔbɔle go bélé miané sile zo; wo lomu ’ka bɔn sié é dɛrɛ lo, wo bɔn ’ka bɔa lo, wo ’ka né yaan lo.

¹² Dé wo ’wolé nénu pa, an dan wo si lɛ wo lee wo tinle ’lɛ; dé an si wo zi, ’té we tɔntɔn kɛlɛ wo lɛ.

¹³ Dé maa an yuɛ vɔ Tii lé tɛrɛ bɛ do la, maa Éfraim ye é nyanale ana fɛ zin na; naa, Éfraim é dan go lɛ élé nénu nya ’wo gyɛzannu va.

¹⁴ Oo Gakelebale ’i fɛ nɔ wo lɛ! Mɛ fɛ lé i dan a nɔ lɛ wo lɛɛ? ’I nésɛrɛbɔn valé nyɔ gale nɔ wo lɛ.

¹⁵ Wolé wenyané faa ta a é bɔrale Gilgal; ’bɛna lé wo sɛrɛ an gi. Wo kɛlɛwe an bli fli, amalé an dan so lɛ wo va anlé kɔn gi. Wo ’ka dan sɔ lɛ an lɛ é dɛrɛ lo; wo nwiinzannu faa a nwamimazannu nya.

¹⁶ Maa Éfraim bla, maa kyɛ pa a ma, a suni ga; é ’ka dan é poro baa lɛ é dɛrɛ lo. Dé wo nénu yaa, yee lé a we ke wo lee, maa dan a gyɛ lɛ za ma.

Wenu lé wo dan bɔ lɛ Izraɛl ma

¹⁷ Wo ’ka tɔné dɔ lɛ anlé Bale lɛ lo, amalé é dan sɔn vɔ lɛ wo ma, yé wo dan kɛlɛ lɛ nɔɔzannu nya bɛnnu méléna.