OZÉ (Osée) 8 - Kazambale lé Sebe Sauunu 1979

Bale we dɔ Izraɛl munu nwiin wolé miyili banle we ma

¹ ’Ka béli dɔ ka lɔ ma; nyanézan éé zunwo Gakelebale lé kɔn ta bélé gola zo; wo anlé gipawe sɛrɛ yé wo anlé bélidɔwe sɛrɛ, ’bɛzama.

² Wo dan siaa lɛ an lɛ léé: Kolé Bale, ko Izraɛlnu lo, ko i dɔɔ.

³ Izraɛl sɔn vɔ we zin ma; wo nyanézannu é dan wo zuo bin lɛ.

⁴ Wo ’wo nwiinzan blɛnnu dɔ é pla, ’té maa ’ka a fe lɛ lo, yé wo ’wolé dutinu dɔ an ma trɔnné va. Wo miyilinu kɛlɛ wolé gɔɔlifu valé wolé kyan nya, bɛwemalé maa dan wo sɛrɛ lɛ tata.

⁵ Samarinu, Gakelebale sɔn vɔ kalé diriné foto ma. An bli a é flile wo ma. Wo dan wobo kɛlɛ lɛ é zima mɛ yi laa?

⁶ Diriné ’ko, é si Izraɛl; blabozan do ɛ a kɛlɛ, yé é ’ka Bale nya lo; bɛwemalé wo dan Samarinu lé diriné foto sɛrɛ lɛ.

⁷ Wo fu vɔ, amalé wo dan fɛsɛrɛfu ’lɛ plɛplɛ gyɛ lɛ; ’sanɛnɛ do kpen ’ka dan kɛlɛ lɛ wo lɛ lo; yee lé a gɔn bɔ, a pun ’ka dan kɛlɛ lɛ lo; dé a pun kɛlɛ kɔɔn, bɛnnu é dan a ble lɛ.

⁸ Izraɛl sɛrɛ tata. Wa sin bɛnnu méléna bɔ lé a vlɛ ’ka lo, a zo.

⁹ Naa, wo go Asiri tɛrɛ la, bélé bwi gi sokofale lé é si é nyɔnɔ la, a zo; Éfraim éé blɛ kɛla é bwɛnu yele we ma.

¹⁰ Dé wo blɛ boen kɛlɛ bɛnnu lɛoo, maa dan wo zén lɛ ékema laoɛ, yé é vo sɛ yé wo dan nyané ble lɛ mi blɛnblɛnnu nwiinzan lé kɔné wuo.

¹¹ Éfraim balebanna kɛlɛ kiɛre, wenyané kɛlɛle we ma, yé balebannanu ’ko wo kɛlɛ wenyané kɛlɛzannu nya.

¹² Dé maa anlé bélidɔwe sɔnné faa gyɛ a lɛoo, éé a yé bélé bɛn bɛ lé we zo.

¹³ Woo an baan wian nya bɛ, wa kɛla a wi blele we ma; Gakelebale ’ka ’bɛ ban‐ɛn blé lo. Sin wolé weple sele dɔ Gakelebale gi, yé é dan we lɛdɔ lɛ wo gi wolé wenyané ma; wo dan go lɛ Éjipiti tɛrɛ la wo pa gi.

¹⁴ Izraɛlnu gi san ’wo Kɛlɛzan ma, yé wo fuakɔnnu dɔ. Juda élé fla plɛplɛ kɛlɛ di; naa, an dan wolé flanu kyɛ vɔ lɛ, yé wolé fuakɔnnu kyɛ é dan ble lɛ.