OZÉ (Osée) 6 - Kazambale lé Sebe Sauunu 1979

Munu ’ka wolé wenyané fe lɛ tegele lo

¹ Munu léé: ’Ka da, kaa go Gakelebale va é ziin. É ko wi kini ékema, naa, é dan ko béli lɛ; é ko bla, naa, é dan fɛ vuru lɛ ko tuonanu ta.

² É dan ko béli lɛ yi fié gi, a yi yaazan nya é dan ko nwa lɛ, yé ko dan vo lɛ é yuɛma a va.

³ ’Ko Gakelebale dɔɔ ma, ’ko kwa kuli léé, ’ko a dɔɔ ma; za ’ka a dale ta lo, bélé tu kinile zo. É dan da lɛ kolé we ma bélé lɛɛ zo, bélé lɛɛ vinin lé éé tɛrɛ ta blin‐an, a zo.

⁴ Éfraim, maa kɛla i lɛ kaa? Juda, maa kɛla i lɛ kaa? Kalé Bale lé zi ta tawole a bélé lolugunu zo bladi; é a bélé fli lé éé bélié é kele, a zo.

⁵ Bɛwemalé maa dan wo bla lɛ balelayezannu dére nya; an dan wo gyɛ lɛ an ’léé dére nya; an dan bi lɛ wo ma weblele nya bélé yirisan zo.

⁶ An lɔrɔ pale sɔ an lɛ, naa, an banle ’ka sɔa an lɛ lo; dé mi an dɔɔ, ’bɛ sɔ an lɛ é mini an banwi lé wa kyɛ blé, a ta.

⁷ Wo anlé gipawe sɛrɛ bélé mi planu lé wo nya; ’bɛna lé wo yuɛi blan an ma.

⁸ Galaad tɛrɛ la flanu a wenaané kɛlɛzannu lé fla nya; mi nyɛ a é zanale ana.

⁹ Balebanzannu palu a bélé mi mabɛnzannu zo, ’té woo munu gya Sisɛm lé zi ’léé; naa, wobo nɔ wenyané blɛn kɛlɛle lɛ.

¹⁰ Maa tadanmawenu ye Izraɛl munu va; ’bɛna lé Éfraim munu kɛlɛ bélé bɔrɔdɛ le zo, yé Izraɛl munu wobo tiri dɔ.

¹¹ Dé maa anlé munu si luu gi yé an da wo nya wo pa gi, bii Juda, maa a i bɛnna fɛ do nya.