OZÉ (Osée) 5 - Kazambale lé Sebe Sauunu 1979

¹ Balebanzannu, ’ka tɔné dɔ we ’ko lɛ. Izraɛl munu, ’ka tɔné dɔ flee. Minwiinzan blɛn ma munu, ’ka an ban ka tɔné nya. Ka ma lé weblele bɔ, ka kɛlɛ mikunsan nya Misipa, ka kɛlɛ mikunséli nya Tabɔɔ gɔ ta, ’bɛzama.

² Yuɛiblanzannu lé yobanle ma lé wo kɛlɛ wenyané blɛn kɛlɛzannu nya, naa, maa dan we lɛdɔ lɛ wo faa gi a we ma.

³ Maa Éfraim dɔɔ, Izraɛl munu ’ka é yɔɔle an lee lo; Éfraim, sin, i kɛlɛ bɔrɔdɛ kɛlɛzan nya, yé Izraɛl munu wobo tiri dɔ.

Ozé we lɛ kini munu lɛ miyili banle we ma

⁴ Bɔrɔdɛ kɛlɛbli a wo gi, yé wo ’ka Gakelebale dɔɔa lo, bɛwemalé wo kɛlɛwenu wo dale Kazambale va yi ga.

⁵ Izraɛl lé boblɛn éé wo mawe fé; Izraɛl valé Éfraim é dan dia lɛ ’wolé weple ma, woo valé Judanu nya é ziin.

⁶ Wo dan go lɛ Gakelebale gini lɛ, wolé ’blanu valé wolé dirinu nya wo lee, naa, wo ’ka dan a ye lɛ lo; é a é sile wo va.

⁷ Wo kɛlɛ gɔné bɛ ginizan nya Gakelebale wuo yé wo nénu yaa gɔrɔ la. Sin, maa dan wolé fɛ zin faa si lɛ wo lee moné do gi.

⁸ ’Ka béli fɛn Gibéa! ’Ka béli fɛn Rama! ’Ka siaa plɛplɛ Bɛt‐Avan! Bɛnjamɛn, guli a i zuo.

⁹ We lɛdɔ wo gi yi nya, Éfraim guru é dan zana lɛ a gi; we lé maa ke a fena Izraɛl bɛnnu lɛ, sɔbɛlawe lé.

¹⁰ Juda nwiinzannu a bélé glɛ kyeenwozannu zo. An bli é dan fli lɛ wo ma bélé ’yiyoro ’lɛ plɛplɛ zo.

¹¹ Wa yaana Éfraim munu ta, weblele a wo ma plɛplɛ; wepladére lé é sɔ a lɛ, é a tawona ’bɛ ta.

¹² Maa dan kɛlɛ lɛ Éfraim lé fɛsɛrɛzan nya bélé boworo zo, maa dan kɛlɛ lɛ bélé booboo zo Juda lé kɔn ma.

¹³ Éfraim élé wenaané tɔntɔn dɔɔ, yé Juda élé manɔn tɔntɔn dɔɔ; Éfraim go Asiri tɛrɛ la, minwiinzan blɛn Jarɛb va; naa, minwiinzan blɛn ’ko, é ’ka bɔa ka bélile lɛ lo; alé lia ’ka bɔa ka manɔnnu nyaale lɛ lo.

¹⁴ Maa dan kɛlɛ lɛ Éfraim munu ma bélé golizra zo; maa dan kɛlɛ lɛ Juda munu ma bélé golizrané zo; maaoo, maa! maa dan a wi kini lɛ ékema, ’bɛ zuo maa dan go lɛ; maa dan go lɛ a nya an lee, yé mi do kpen ’ka dan a si lɛ an lee lo.

¹⁵ Maa dan go lɛ yé maa dan da lɛ an nyanana fɔɔ yé wa gi dɔɔ léé, we ’wo gyɛ, yé wo an nagini. Dé wa nyané blena, wo dan an nagini lɛ.