OZÉ (Osée) 4 - Kazambale lé Sebe Sauunu 1979

Bale we dɔ Izraɛl munu valé Balebanmunu nwiin

¹ Izraɛlnu, ’ka tɔné dɔ Gakelebale dére lɛ. Naa, Gakelebale a tɛrɛ ’ko la munu mawe fena. We zin do ’ka ana lo, nyanai zénle ’ka ana lo. Kazambale dɔɔle ’ka ana tɛrɛ ’ko la lo, ’bɛzama.

² Bale ’nyɔɔnle vié nya koo, viéwole koo, nɔmaga wole koo, kyeenwole valé leginile koo, ’bɛ saa ɛ ke ana. Wa glawe kɛlɛna, ’té woo goo migyɛle nya é ke la mi.

³ Bɛwemalé ana munu é dan gyɛ bo lɛ; munu faa lé woo nyanaan ana, wo yuɛi é dan zun lɛ, bwigiwinu valé lagi mianénu koo é ziin. Wɛyi va pɔnu boen koo, wo faa é dan san lɛ.

⁴ Té mi do kpen é za vɔ lo, té mi do kpen é we vɔ mi lɛ lo, naa, ilé munu a zavɔmunu nya Balebanzannu va.

⁵ I dan dia lɛ é yiéyi; i va balelayezan é dan dia lɛ é béli, yé maa dan i bu gyɛ lɛ za ma.

⁶ Anlé munu ’ka we dɔɔa lo, amalé wo sɛrɛ; ka sɔn vɔ wedɔɔle ma, amalé maa dan sɔn vɔ lɛ ka ma, yé maa dan balebannyanama si lɛ ka lee; i gi san ilé Bale lé bélidɔwepun ma, amalé an gi é dan san lɛ kalé nénu ma.

⁷ Dé woo Balebanzannu go fanle nya ’té wolé wenyané gi éé goo gyɛle nya; maa dan wo tɔbɔle nɔla lɛ yaragyɛwe nya.

⁸ Balebanzannu ’wolé fɛblele yé anlé munu lé wenyané kɛlɛle ma; é sɔ wo lɛ léé, wo weple kɛlɛ di.

⁹ Maa dan Balebanzannu zé kɛlɛ lɛ bélé mi planu zé zo; maa dan we lɛdɔ lɛ wo gi wolé tawobɛ yɛrama, maa dan wolé we lɛgi pa lɛ wo kɛlɛwenu yɛrama.

¹⁰ Wo dan fɛ ble lɛ, ’té wo ’ka kaan lo. Wo dan kɛlɛ lɛ bɔrɔdɛ nya yé wo ’ka faan lo; wo sɔn vɔ Gakelebale ma, é valé alé bélidɔwe ma, ’bɛzama.

Bale we fe yobanle ma

¹¹ Bɔrɔdɛ kɛlɛle koo, nwɛ valé dɔrɔ dɛrɛ koo, wo anlé munu ’wuo sɛrɛ.

¹² Anlé munu éé we laan ’wolé yili lee, ’té wolé tawomayili a gi fé wo lɛ. Naa, bɔrɔdɛ kɛlɛbli wo saan, yé wo si ’wolé Bale ma baa, bélé bɔrɔdɛ le zo.

¹³ Woo ’wolé balenu baan gɔnu nwiin; woo lasikɔrɔpo kyɛ blé gɔpanénu nwiin, ’bɛ valé sɛnéyili koo, pupliéyili koo, térébɛntyili koo, wo wuo, ’té wo furɔ a néné. Bɛwemalé ka lunu kɛlɛ bɔrɔdɛlomu nya, yé ka be nanu kɛlɛ gɔnéginilomu nya.

¹⁴ Maa ’ka dan we lɛdɔ lɛ ka lunu gi wolé bɔrɔdɛ kɛlɛle ma lo; maa ’ka we lɛdɔa ka be nanu gi wolé gɔnéginile we ma lo, naa, kaboen éé goo bɔrɔdɛ lomu zuo, ’té ka valé tɛrɛgyɛwe kɛlɛlomu, ka yo baan ékeva. Tavozannu éé vlanburuwo ’wo saanna.

¹⁵ Oo ’kaa Izraɛlnu, dé kabo nɔ bɔrɔdɛ kɛlɛle lɛ, té Juda ’é we dɔ ’é nwiin ’bɛ kɛlɛle nya lo; té ka go Gilgal lo; té ka go loru Bɛt‐Avan lo; té ka bale ’nyɔɔn a fele nya léé, Gakelebale a é yuɛma, lo.

¹⁶ Izraɛlnu yuɛ ma kɛlɛ plɛplɛ an va, bélé diridané lé a yuɛma ke plɛplɛ yé é ’ka a nyi sié léé, wo nyanama pa ’é nya lo, a zo. Sin Gakelebale é dan go lɛ wo nya fɛblena bélé ’blané lé ke fɛna dégélé blɛn na, a zo.

¹⁷ Éfraim ébo yere miyilinu ma; ’ka vo.

¹⁸ Wo nyaa nwɛ minile nya tɔɔn, wobo nɔ bɔrɔdɛ lomu lɛ. Wo nwiinzannu bli bɔ yaragyɛwe ma.

¹⁹ Fu é dan go lɛ wo nya, yé yara é dan wo gyɛ lɛ wolé yobanle ma.