OZÉ (Osée) 2 - Kazambale lé Sebe Sauunu 1979

Bale é dan Izraɛl dɔ lɛ é dɔna

¹ Duowo, Izraɛl lé nénu é dan kɛlɛ lɛ kiɛre bélé wɛyi lé nyéné lé wo ’ka bɔa a ’léé danle lɛ mɛtrɛ nya lo yé wo ’ka bɔa a nɔnɔle lɛ lo, a zo; yé fɛana lé Bale a fe wo lɛ léé, ka ’ka ’élé munu nya lo, ’bɛna lé é dan a fe lɛ wo lɛ léé: Bale yuɛmale benu.

² Juda munu valé Izraɛl munu é dan zén lɛ ékeva, yé wo dan ’wo nwiinzan dɔ lɛ, yé wo dan si lɛ luu gi. Jizréɛl lé yi é dan kɛlɛ lɛ yi blɛn nya.

³ ’Ka fe ka bwenu lɛ léé: Ami, ’bɛ gi léé, anlé munu; ’ka fe ka burunu lɛ léé: Rusama, ’bɛ gi léé, nyanai zénle.

⁴ Anlé nénu, ’ka we dɔ ka bu nwiin, ’ka nwa a ma; é ’ka an na nya é dɛrɛ lo, yé maa ’ka a zana nya é dɛrɛ lo, ’bɛzama. ’É yara si élé bɔrɔdɛ kɛlɛle ta ma, alé gɔnéginile ’é si a lee ma.

⁵ Dé ’bɛ kaan lo, maa dan a poro lɛ, yé maa dan a vo lɛ bélé é yaayi la zo; maa dan a kɛlɛ lɛ bélé bwi zo, bélé tɛrɛ gi gale zo, yé é dan ga lɛ ’yiminilɔrɔ nya.

⁶ Alé nénu a bwɛ la nénu nya, amalé maa ’ka dan nyanai zén lɛ wo ta é dɛrɛ lo.

⁷ Wo bu a bɔrɔdɛ le nya; le lé é wo yaa, ébo sɛrɛ; naa, é léé: An bwɛnu lé wo fɛblele valé ’yi koo, ’blakyɛɛsɔ valé lɛnsɔ koo, nyɔnɔ valé nwɛ koo, wa nɔ an lɛ, maa dan go lɛ ’bɛnu zuo.

⁸ Bɛwemalé, maa dan alé zi lɛ tan lɛ a lee léli nya, yé maa dan gɔrɔ nwa lɛ a ’lɛ, té é bwɛnu lé zi ye é dɛrɛ lo we ma.

⁹ É dan go lɛ é bwɛnu zuo, yé é ’ka dan a dɔ lɛ wo ma lo; é dan wo gini lɛ yé é ’ka dan wo ye lɛ lo. ’Bɛ zuo é dan a fe lɛ léé: Maa dan nɔla lɛ an zana kyɛn va an pai, ’bɛna fila vɔ an lɛ é mini bléyi ’ko lɛ.

¹⁰ Yé é ’ka a gi dɔɔ lɛ léé, maa ɛ ’sa valé nwɛ dɛrɛ valé nyɔnɔ no é lɛ lo; yé gɔɔlifu valé kyan lé maa a nɔ a lɛ, é a kɛlɛ Baal banfɛ nya.

¹¹ Bɛwemalé ’sa bléyi va, maa dan anlé ’sa si lɛ a lee; nwɛ dɛrɛ bléyi va, maa dan anlé nwɛ dɛrɛ si lɛ a lee; anlé ’blakyɛɛsɔ valé anlé lɛnsɔ lé é ’é ma yɔɔan turu a nya, maa dan a si lɛ a lee.

¹² Yé sin, maa dan yaragyɛwe bɔ lɛ a ma a bwɛnu yuɛ va, yé mi do kpen ’ka dan a si lɛ an lee lo.

¹³ Alé ginanawe kɛlɛle faa koo, alé fɛtinu lé we koo, alé moné dɛrɛ lé we koo, alé flinyi valé alé zénle ékeva plɛplɛnu koo, maa dan a faa yi ga lɛ.

¹⁴ Alé dɔrɔféi valé bɔrɔyili féi lé éé a fé léé, ’é bwɛnu a nɔ ’é lɛ ’é ban nya, maa dan wo sɛrɛ lɛ. Maa dan wo kɛlɛ lɛ pɔrɔ nya, yé bwigiwinu é dan wo ble lɛ.

¹⁵ Yinuan nya lé é lasikɔrɔpo kyɛ ble Baal lɛ, ’té éé ’lɛra bɛmafɛ valé bɔrɔmakyanbale nya, ’té éé goo é bwɛnu zuo, ’té a gi éé saan an ma, an dan we lɛdɔ lɛ a gi a we ma. A zo lé Gakelebale a fe.

¹⁶ Bɛwemalé é sɔ an lɛ léé, maa a sia ana, yé an go a nya bwi gi, yé maa a tɔrɔ paa ’bɛna.

¹⁷ ’Bɛna lé maa dan alé dɔrɔféinu nɔ lɛ a lɛ, yé maa dan Akɔɔ pɛnguru gi nɔ lɛ a lɛ léé, sin, zi a a lɛ, yé ’bɛna lé é dan lɛrɛ vɔ lɛ bélé a boroné la bléyi va zé zo, bélé a sile Éjipiti tɛrɛ la bléyi va zé zo.

¹⁸ Gakelebale léma: ’Bɛ yi ’ko la, i dan an laa lɛ, i zana; i ’ka dan an laa lɛ é dɛrɛ izan, lo.

¹⁹ Maa dan Baalnu tɔ si lɛ i ’léé, yé i ’ka dan wo tɔ bɔra lɛ é dɛrɛ i ’léé lo.

²⁰ ’Bɛ yi ’ko la, an dan gipawe do kɛlɛ lɛ ka valé bwigiwinu koo, lagi mianénu valé tawoplɛlawinu koo, ka méléna; sa koo, gwɔun valé gulidanle koo, maa dan wo yi ga lɛ kalé tɛrɛ la, yé maa dan ka nyana lɛ kaboma.

²¹ Maa dan kɛlɛ lɛ ka zana nya lɛɛfaama; maa dan ka kɛlɛ lɛ an na nya we tegele koo, we drɔle koo, zin koo, nyanai zénle koo, wo gi;

²² maa dan kɛlɛ lɛ ka zana nya yarapalale nya yé ka dan maa Gakelebale dɔɔ lɛ.

²³ Gakelebale léma: ’Bɛ yi la, maa dan lanu dére ’ma lɛ, yé wo dan tɛrɛ dére ’ma lɛ,

²⁴ yé tɛrɛ é dan ’sa koo, dɔrɔ dɛrɛ koo, nyɔnɔ koo, wo dére ’ma lɛ, yé wo dan Jizréɛl dére ’ma lɛ.

²⁵ Maa dan Lo‐Rusama nyana lɛ ana tɛrɛ la anzé nya, yé maa dan nyanai zén lɛ a ta; maa dan fe lɛ Lo‐Ami lɛ léé: I a anlé bɛn nya, yé é dan a zi pa lɛ an lɛ léé: Anlé Bale.