OZÉ (Osée) 14 - Kazambale lé Sebe Sauunu 1979

Ozé zanté vɔ Izraɛl lɛ léé, ’é da Bale va é pa gi

¹ Izraɛl, ’i da Gakelebale, ilé Bale va, naa, i dia ilé weplenu gi.

² ’Ka da Gakelebale va yé ’ka ka gi we fe. ’Ka fe a lɛ léma: ’I ko ma we vo kolé weple faa ma, yé ’i ko si é zima. Ko ’ka dan i ban lɛ diri nya lo, naa, ko dan i ban lɛ ko lɔlu nya.

³ Asirinu ’ka dan ko si lɛ we gi lo, ko ’ka dan vɔ lɛ wisoonu ta lo. Ko ’ka dan a fe lɛ é dɛrɛ ko bɛ panyanama lɛ léé, kolé Bale, lo. Naa, ti valé bugalazan woo nyanai zénle ’wo ta yé bii ɛ va.

⁴ Bale léé: Naa, an bli ’ka flina wo ma é dɛrɛ lo; Amalé maa dan wo yuɛgi blanle nyaa lɛ, Wo dan sɔ lɛ an lɛ boenwo.

⁵ Maa dan kɛlɛ lɛ bélé fli zo Izraɛl ma, É dan tin lɛ bélé bolu lé goo zo, Yé a suni é dan wɔra lɛ bélé Liban yili zo,

⁶ Yé a bɛnu é dan soi lɛ; Alé we é dan kɛlɛ lɛ blɛn bélé ɔliviyili zo, Bélé Liban lé lasikɔrɔ zo.

⁷ Munu é dan nyana lɛ a furɔ va, Yé wo dan ’sa gyɛ lɛ di. Wo gi é dan gyɛ lɛ bélé dɔrɔyili zo, Yé wo tɔ é dan bɔ lɛ bélé Liban nwɛ zo.

⁸ Éfraim léé: Miyilinu éé mɛ kɛla an lɛɛ? Maa dan a dére ’ma lɛ, maa dan a tabin lɛ, Maa dan kɛlɛ lɛ a lɛ bélé siprɛyili drɔɔdrɔɔ zo. Maa ɛ va lé ka dan tɔnɔ ye lɛ.

⁹ Mi lé é we dɔɔ, ’é gi bɔrɔ we ’konu ma ma. Mi lé a ’wuo ke a ta, ’é wo ’ma ma. Naa, Gakelebale lé zinu a é drɔle tegele; mi tegelenu é dan tawo lɛ wo ta, naa, nwamimazannu é dan dia lɛ ana.