OZÉ (Osée) 13 - Kazambale lé Sebe Sauunu 1979

Izraɛl lé we nyaana blele

¹ Éfraim lé wefedére éé kana zén‐é mi gi turu; é a Izraɛl va mi blɛn nya. Naa, é we dɔ ébo nwiin Baal lé we ma, yé a bɛn ’ka é dɛrɛ lo.

² Sin, wo yara a é pale wenyané kɛlɛle ta tegele. Woo ’wolé gɔɔlifu sié, ’té woo yofoto kɛla a nya; woo miyilinu kɛla ’wo gibɔrɔle yɛrama; wo faa a blabozannu panyanama nya. Wa fé ’wo kɛlɛfɛnu ma léé, mi lé ke wo banna, ’é pwɛpwɛ vɔ diriné ma.

³ Wo dan kɛlɛ lɛ bélé bladi lati zo, bélé fli lé éé bélié, a zo, bélé ’sapun lé fu a sié ’sa sunwona, a zo, bélé kyɛgoi lé éé bɔraan fɛnɛti ta, a zo.

⁴ Naa, maa, é sia ka sile ma Éjipiti tɛrɛ la, maa a Gakelebale, kalé Bale nya. Dé é ’ka maa nya lo, ka ’ka Bale bɛ dɔɔa lo; dé é ’ka maa nya lo, ka siéwegizan bɛ ’ka ana lo.

⁵ Maa i dɔɔ bwi gi fɛna gale na.

⁶ Wo kan wo blefɛ nya; wo kan yé wo blii boblɛn nya, bɛwemalé an sele saan wo gi.

⁷ Maa dan kɛlɛ lɛ wo ma bélé golizra zo; maa dan wo mavɔɔ lɛ zia bélé kua zo.

⁸ Maa dan baa lɛ wo ta bélé urisi lé wo alé nénu si a lee, a zo; ma dan wo zuru zifɛ fia lɛ; maa dan wo ble lɛ bélé golizrada zo; bwigiwinu é dan wo wi kini lɛ ékema.

⁹ Izraɛl, wean ma lé i sɛrɛ, yee lé ke léé, maa lé an bɔa kɔɔn i va, i nwa an ma.

¹⁰ I nwiinzan blɛn a kyɛɛn? ’É i si we gi ilé fla faa ta ma. I lé yi la an lɛ léé, maa ’wo nwiinzan blɛn valé ’wo ’lɛzannu nɔ, sin, wa kyɛɛn?

¹¹ Maa ka nwiinzan nɔ anlé bliflile nya, yé maa dan a si lɛ an wɛwɛ nya.

¹² Éfraim lé weplenu ta a é dɔle, yé alé wenyané a é plale.

¹³ Nyanéblele é dan bɔ lɛ a ma, bélé né yaa le lé nyanéblele zo. É a né lé é ’ka we dɔɔa lo, a nya; a yaabléyi bɔ, yé é ’ka a nyi sié léé, ’é bu ’é yaa lo.

¹⁴ Maa dan wo si lɛ gamunu nyanana lé plɛplɛ lee; maa dan wo si lɛ ga boen lee. Gaoo ga, ilé bawurumagyɛ a kyɛɛn? Gamunu nyanana, ilé mi guru zanale a gi a kyɛɛn? Naa, maa ’ka wo bli nɔlale yé lo.

¹⁵ Dé Éfraim kɛlɛ blɛn é bwenu mélénaoo, yirinwana fu é dan da lɛ, Gakelebale lé fu é dan si lɛ bwi gi, yé é dan alé ’yi’wuonu ga lɛ, yé é dan a ’yibɔnanu béli lɛ. Wo dan ’wii lɛ alé fɛwezannu faa ta.

¹⁶ Samari nwa ’élé Bale ma, amalé maa dan we lɛdɔ lɛ a gi. Wo dan ga lɛ gwɔun lee; wo dan wolé nénu wii lɛ, yé wo dan bɔnlomu bɔn fia lɛ.