OZÉ (Osée) 12 - Kazambale lé Sebe Sauunu 1979

Bale Izraɛl valé Juda gyɛ we nya

¹ Éfraim an zi lɛ sɔɔ viéwole nya; Izraɛl munu an zi lɛ sɔɔ dabliwe nya. Juda dɔfɛ ’ka Bale yuɛ gi lo; a dɔfɛ ’ka Yarapawelazan Sauun yuɛ gi lo.

² Fu a Éfraim lé fɛblele nya, yé éé goo yirinwanazia fu zuo; yi faa do do ma alé viéwole valé alé glawe kɛlɛle gi a gyɛna. Éé gi paan do Asirinu va, ’té woo goo nyɔnɔ nya Éjipitinu lɛ.

³ Gakelebale a we blena Juda va, yé é dan we lɛdɔ lɛ Jakɔb gi alé tawobɛ ma, yé é dan a banwo lɛ a kɛlɛwe yɛrama.

⁴ Jakɔb kun é bwe ganetɛn ma wo bu bɔn gi. Alé plɛplɛ bléyi va, é buo si Bale va.

⁵ É buo si lanje va, yé a ’wuo vo a lɛ. É wuvɔ yé é zanté vɔ a lɛ. Jakɔb Bale ye Bétɛl; ’bɛ fɛkona lé Bale we fe ko lɛ.

⁶ Gakelebale a lai sunyanu lé Bale nya. A tɔ lé Gakelebale.

⁷ Bii, ’i da ilé Bale va; ’i a lɔrɔ pa, yé ’i we tegele kɛlɛ. I bli ’é vo ilé Bale lɛ yifaama.

⁸ Éfraim a yaawozan nya, alé viékilo a a lee; dabli kɛlɛle sɔ a lɛ.

⁹ Éfraim léé: Weboen lé, maa a fua nya, yé an fuafɛ ye di; naa, an panyanama saa ma lé maa a ye. Wo ’ka dan weple do kpen ye lɛ an va lo; wenyané blɛn do kpen ’ka an va lo.

¹⁰ Naa, maa, é sia ka sile ma Éjipiti tɛrɛ la, maa a Gakelebale, kalé Bale nya. Maa dan ka nyana lɛ sɔkɔnnu wuo, bélé fɛti yi la zo.

¹¹ Maa we fe balelayezannu lɔlu nya; maa yuɛziwe kiɛre kiɛre gɔɔn ka lɛ, yé maa wegɔné vɔ ka lɛ balelayezannu lɔlu nya.

¹² Dé Galaad ’ka we do nya lo, wo kulu é dan ga lɛ duowo. Wo yo ban diri nya Gilgal; yé wolé yobanna é dan kɛlɛ lɛ gɔlɛ zun nya vun dan gi.

¹³ Jakɔb vɔ fli gi yé é go Aram tɛrɛ la. Izraɛl nyanama pa le lé we ma, yé é trubɛ tabin le lé we ma.

¹⁴ Gakelebale Izraɛl si Éjipiti tɛrɛ la balelayezan do nya, yé Izraɛl tabinzan kɛlɛ balelayezan nya.

¹⁵ Éfraim Gakelebale bli fli é baba. Mi nyɛ lé é a zana, azan é dan a we dɔ lɛ a nwiin; yaragyɛwe lé é a kɛlɛ, é dan bɔ lɛ a ma.