OZÉ (Osée) 10 - Kazambale lé Sebe Sauunu 1979

¹ Izraɛl a bélé dɔrɔféi lé éé baan di, a zo; é poro baa kiɛre. Alé féi baale gi gyɛ fɛan zo, a zo lé alé yobanle gi gyɛ. Alé tɛrɛ nyian wo fɛan zo, a zo lé wo yofotonu ma’lɛrɛ.

² Wo bli a fié; wo dan a gi dɔɔ lɛ. Gakelebale é dan wolé yobannanu zana lɛ a gi, yé é dan wolé yofotonu sɛrɛ lɛ.

³ É vo sɛ yé wo dan a fe lɛ léé, ’wo nwiinzan ’ka lo, ’wo ’ka kana lɛ Gakelebale lee lo, azama; dé ’wo nwiinzan é vo kɔɔn, ’té ’bɛ é bɔa mɛ kɛlɛle lɛ ’wo lɛɛ?

⁴ Wolé wefele a é boa, dé wo valé munu a ’wo gi pana do, woo bale kunwo vié nya; we lɛdɔle wo gi gɔn é dan bɔ lɛ bélé boyiékele zo vun dan gi.

⁵ Samari munu bɔ é dan gyɛ lɛ dirinénu lé wo ke Bɛt‐Avan, wolé we ma. Munu é dan miyili gyɛ bo lɛ; a banzannu ma é dan nyɔɔn lɛ alé we ma, ’bɛ valé a tɔbɔle yi gale we ma.

⁶ Wo dan go lɛ yee kyandiriné nya Asiri tɛrɛ la, minwiinzan Jarɛb blan nya. Tun é dan dɔ lɛ Éfraim munu gi, yé yara é dan Izraɛlnu gyɛ lɛ ’wo gibɔrɔmawenu ma.

⁷ Samari valé é nwiinzan blɛn é dan kɛlɛ lɛ bélé ’yi yuɛ la buiɛ bɔle zo.

⁸ Gɔ nwiin yobannanu lé wo ke Bɛt‐Avan, ’té Izraɛlnu wenyané kɛlɛ ana, maa dan wona sɛrɛ lɛ; léliyilinu valé danan é dan tuu lɛ wolé yobannanu na. Wo dan a fe lɛ gɔnu lɛ léé: ’Ka ’bua ko ta, yé wo dan a fe lɛ gɔpanénu lɛ léé: ’Ka dia ko gi.

⁹ ’Kaa Izraɛlnu, é sia we lé é bɔ yi la Gibéa, a ma, ka wenyané kɛla, yé ka a yifaama ka dɔbɛ gi. Guli lé é bɔ yi la Gibéa, é ’ka wenyanékɛlɛmunu gyɛ lɛ loo?

¹⁰ Maa dan we lɛdɔ lɛ wo gi, é a an gi fɛan zo, a zo. Munu é dan zén lɛ ékema wo ma, yé wo dan gɔgɔbale vɔ lɛ wo ma wolé weple blɛn ’léé yɛrama.

¹¹ Éfraim a bélé diridané lé wo pla a nwiin, a zo, ’té ’sa sunwole sɔ a lɛ, a zo. Sin, maa dan bɔrɔmayili vɔ lɛ a bɔrɔ nɔnɔmi ma. Maa dan nyanamapafɛ vɔ lɛ Éfraim bɔrɔ ma, Juda é dan nyanama pa lɛ, Jakɔb é dan tɛrɛ ta bɔ lɛ ékema.

¹² ’Ka nyana dɛrɛ wo, ’ka we tegele vɔ yé ’ka nyanai zénle gyɛ. Gakelebale nagini bléyi lo, fɔɔ yé é da yé é we tegele nwɛɛn ka lɛ.

¹³ Ka wenaané féi pa, yé ka weple gyɛ, yé ka vié mafɛ ble. Naa, ka pa kalé wekɛlɛbɛ ta, yé ka pa kalé nyanazannu kiɛre ta, amalé

¹⁴ kalé munu bɔ é dan gyɛ lɛ, yé kalé guliyɔɔkɔn plɛplɛnu faa guru é dan zana lɛ a gi, bélé Salman‐Bɛt‐Aabɛl guru zanale a gi gulidanyi nya zo, ’té wo né valé ’wo bunu wii ékeva fɛan zo, a zo.

¹⁵ We lé é dan bɔ lɛ kaa, Bétɛl munu ma, kalé wenyané baba lé we ma, yee lé ke bɛ. Tu kini tɔɔn, Izraɛl nwiinzan blɛn zé nyaa.