Mi Nɔnɔle 6 - Kazambale lé Sebe Sauunu 1979

Bale kunle lé we

¹ Gakelebale we fe Moizi lɛ yé é léé:

² Bé fe Izraɛlnu lɛ léma: Dé é a gɔné nyaoo, dé é a le nyaoo, dé yeean é kini é bɔluzan ma ébo pale é yɛrama Gakelebale zé nya we gi, yé é Bale kun a we gi,

³ é a lé é sɔn vɔ dɔrɔ valé migyɛnwɛ ma; té é dɔrɔ tɔndɔle valé migyɛnwɛ tɔndɔle mini lo, té é dɔrɔ’yi do kpen mini lo, té é dɔrɔporo drɔɔdrɔɔ valé a gale ble lo.

⁴ Bléyian va lé é ke élé Bale kunle gi, té é dɔrɔporo vafɛ do kpen ble lo, dé a wɔlɛ léé, dé a kɔlɛ léé, té é a do kpen ble lo.

⁵ Bléyian va lé é a élé Bale kunle gi, té wo sɛnné dɔ a nwin ma monomono lo; ’é vo tegele, fɔɔ yinu lé é ’ébo pa é yɛrama Gakelebale zé nya yé wo lɛ é sɔɔ; ’é daan é nwin ma, ’é tuu é wo.

⁶ Alé Bale kunbléyi faa gi, té é bié mi gale do ma monomono lo.

⁷ Dé a ti léé, dé a bu léé, dé a bwe léé, dé a buru léé, té ébo sɛrɛ wo gale ma lo. É a é pale é yɛrama alé Bale zé nya, azama.

⁸ É a é pale é yɛrama Gakelebale zé nya alé Bale kunbléyi faa gi.

⁹ Dé é kɛlɛ léé, mi do zamaga wo a sɔnɔ yé é mane a ma, ’té a pale é yɛrama sɛrɛ. A kɛlɛtegeleyi nya é a lé é nwin bo, a yi sɔrafiézan nya ’é ’é nwin bo ma.

¹⁰ A yi sɔraazan nya é a lé ’é da plala fié nya Balebanzan lɛ. Dé ’bɛ kaan lo, ’é da plawuo sua fié nya zén‐ékevasɔkɔn ’léé.

¹¹ É a lé Balebanzan a do gyɛ wenyané ’yibofɛ nya, yé a koɛ kɛlɛ balebanwi lé wa kyɛ blé, a nya, yé wenyané lé é ke é dɔle a nwiin migale lé we ma, ’té é si a nwiin. Yian nya lé Bale kunzan é we ’ko kɛlɛ, ’bɛ yi nya é kɛlɛ tegele.

¹² É a lé é ’ébo pale é yɛrama péli bɛ sia Gakelebale zé nya, yé ’blané lé a lɛɛ kɛlɛ do, ’é a nɔ wenyaa saraka bofɛ nya. Alé yi kyɛn bɛ, ’bɛ gié; ébo pale é yɛrama Gakelebale zé nya sɛrɛ, azama.

¹³ Bo pa é yɛrama Gakelebale zé nya zannu, wozé we lé ke ’ko: yian nya lé alé Bale kunle lɛ sɔɔ, é a lé ’wo da a nya zén‐ékevasɔkɔn ’léé.

¹⁴ É a lé é Gakelebale ban; ’blagɔnéné lé a lɛɛ kɛlɛ do, ’té we do ’ka a ma lo, ’é ’bɛ nɔ balebanwi lé wa kyɛ blé, a nya; ’bladané lé a lɛɛ kɛlɛ do, ’té we do ’ka a ma lo, ’é ’bɛ nɔ wenyané ’yibofɛ nya; ’blagɔné lé we do ’ka a ma lo, ’é ’bɛ nɔ bɔvɔ saraka nya;

¹⁵ kyɛɛ nya do burunu lé lévɛn ’ka wo va lo koo, buru kurukurunénu lé wa kɛlɛ burupun zin nya, ’té wa vɔɔ nyɔnɔ nya koo, buru pɛtoropɛtoroné lé lévɛn ’ka wo va lo, ’té woo nyɔnɔ nwɛɛn‐an wo ta koo, blɛfɛ valé baleban’yi lé wa no yifaama koo, woo lé.

¹⁶ Balebanzan ’é fɛ ’konu dɔ Gakelebale ’lɛ ma, yé ’é alé wenyané ’yibo saraka bo yé balebanwi lé wa kyɛ blé, ’é ’bɛ nɔ;

¹⁷ é a lé é ’blagɔné nɔ Gakelebale lɛ a bɔvɔ saraka nya, yee valé kyɛɛ nya do burunu lé lévɛn ’ka wo va lo koo, balebanfɛ koo, baleban’yi koo, wo nya.

¹⁸ É a lé bo pa é yɛramazan Bale zé nya ’é ’é nwi bo zén‐ékevasɔkɔn ’léé, yé ’é ’é nwin sia yé ’é a zén kyɛ lé ke bɔvɔ saraka wuo, a va.

¹⁹ A nwin bole zuo, Balebanzan é dan ’blagɔné bɛapaboworo male si lɛ, yee valé buru lé ke kyɛɛ gi, ’té lévɛn ’ka wo va lo, ’é a do si, yé buru pɛtoropɛtoroné lé lévɛn ’ka a va lo, ’é a do si, yé ’é a pa bo pa é yɛramazan lee.

²⁰ É a lé Balebanzan ’é wo dia ’é bɛ fié la Gakelebale ’lɛ, fɛ ’lɛzan lé, Balebanzan zé lé, yee valé a tɔn lé wa dia a bɛ fié la koo, a bɛapaboworo lé wa nɔ a nwale valé a tuale nya koo, woo lé. ’Bɛ zuo ’wo zi nɔ bo pa é yɛramazan lɛ léé, ’é dɔrɔ mini.

²¹ Bo pa é yɛramazan lé é Bale kun, alé we lé ke bɛ; alé blɛfɛ lé é a nɔ Gakelebale lɛ ébo pale é yɛrama we ma, yee lé ke bɛ. Fɛ lé é bɔa lɛ léé, é a nɔ, ’é ’bɛ nɔ a ta loru. É Bale kun ébo pale é yɛrama we ma fɛan zo, é a lé é a lɛ sɔɔ Bale dére yɛrama, Bale a fe fɛan zo bo pa é yɛramazan lé we ma, a yɛrama.

Mi drɔɔ vo dére

²² Gakelebale we fe Moizi lɛ yé é léé:

²³ Bé fe Arɔn valé é benu lɛ léma: ’Ka Izraɛlnu drɔɔ vo ’ko zo ma: ’Ka fe wo lɛ léma:

²⁴ Gakelebale ’é i drɔɔ vo, yé ’é i tabin ma.

²⁵ Gakelebale ’é yara soi i vazia yé ’élé zin kɛlɛ i lɛ ma.

²⁶ Gakelebale ’é yara soi i vazia, yé ’é i vo drɔɔ ma.

²⁷ ’Ko zo lé wo dan an tɔ pa lɛ Izraɛlnu ta yé maa wo drɔɔ vo.