Mi Nɔnɔle 4 - Kazambale lé Sebe Sauunu 1979

Lévinu panyanama

¹ Gakelebale we fe Moizi valé Arɔn lɛ, yé é léé:

² ’I Kéat kulunu nɔnɔ Lévinu va, wo gɔnɔla ma gɔnɔla ma, wo tranu dɔgɔnɔ ma;

³ ’bé pélisia lɛɛ yɔ do wɔlɛ vu munu ta, yé é bɔ lɛɛ yɔ fié wɔlɛ vu munu va, munu faa lé woo bɔa zén‐ékevasɔkɔn gi nyanama do pale lɛ, woo lé.

⁴ Nyanama lé é a lé Kéat kulunu a pa zén‐ékevasɔkɔn gi, yee lé ke ’ko: fɛna sauun tinle lé nyanama lé.

⁵ Dé wo zén ta va bléyian va, Arɔn valé é benu é dan sɔ si lɛ ana, yé wa zén gipawe pagikɛsu ta.

⁶ Pɔ lé wa laama dofɛn, ’wa kɔlɛ zén a ta ma, yé ’wo glayivayou sɔ zén ’bɛ ta loru. ’Bɛ zuo ’wo kɛsu siyilinu wɔra é gɔ gi.

⁷ ’Wo glayivayou sɔ fwila Bale ’lɛburu plala tablé ta, yé planu koo, gaannénu koo, pala ganeanénu valé béénébɔnu lé woo baleban’yi zén‐é a gi koo, ’wo wo dɔra tablé ’ko ta; té buru é kele tablé ’ko ta lo.

⁸ ’Wo sɔ sɔɔn fwila fɛ ’konu ta, yé ’wo dofɛn kɔlɛ wɔra a ma bélé sɔ zo. ’Bɛ zuo ’wo tablé siyilinu wɔra é gɔ gi.

⁹ ’Wo glayivayou sɔ si yé ’wa zén fintran koo, alé kyɛbɔnu koo, a dirifɛnu koo, alé kyɛyee zéngifɛnu koo, alé nyɔnɔzénbɔnu koo, fɛnu faa lé woo fintran ma nyanama paan a nya bɛ, wo ta.

¹⁰ É a lé wo yee valé a ma nyanamapafɛnu faa pla dofɛn kɔlɛ gi, ’bɛ zuo wa pa kɔnésigaan gi.

¹¹ ’Wo glayivayou sɔ fwila balebanna lé wa kɛlɛ kyan nya, a ta ma, yé ’wo dofɛn kɔlɛ wɔra a ma. ’Bɛ zuo ’wo balebanna siyilinu wɔra é gɔ gi.

¹² Nyanamapafɛnu faa lé woo fɛna sauun gi nyanama paan a nya bɛ, ’wo wo pa glayivayou sɔ gi ma, yé ’wo dofɛnkɔlɛ wɔra wo ma, yé ’wo wo pa gaan gi ma.

¹³ ’Wo kyɛyee si balebanna ta, yé ’wo galunaa sɔ zén a ta ma.

¹⁴ ’Wa ma nyanamapafɛnu faa pa a ta, kyɛnyɛsibɔnu koo, wiblegaannénu koo, diadianu koo, kananu koo, balebanna ma nyanamapafɛnu faa koo, ’wo wo pa a ta, yé ’wo dofɛnkɔlɛ zén wo ta; ’bɛ zuo ’wo balebanna siyilinu wɔra é gɔ gi.

¹⁵ Dé Arɔn valé é benu nyaa fɛna sauun valé é ma nyanamapafɛnu faa ta buale nya, dé wo zén ta va bléyian va, yé Kéat benu ’é da kɔné sile we ma. Naa, té wo mane fɛ ’lɛzan ’konu ma monomono lo, dé wo da ga. Kɔnésizannu panyanama lé wa bɛ pa wo lee, léé, wa kɛlɛ zén‐ékevasɔkɔn gi, yee lé ke bɛ.

¹⁶ Balebanzan Arɔn be Éléazaa ’é yuɛ pa fintran lé nyɔnɔ koo, lasikɔrɔ gin néné koo, blɛ lé a nɔle ’ka nyaan lo koo, nyɔnɔ lé wa zén‐é mi ta koo, wo ta ma. ’É yuɛ pa Bale lé sɔkɔn faa koo, a gifɛnu faa koo, fɛna sauun koo, a gi nyanamapafɛnu koo, wo ta ma.

¹⁷ Gakelebale we fe Moizi valé Arɔn lɛ yé é léé:

¹⁸ Té ka Kéat kulunu bɔra gale lɛ lo; dé wo kulu é da ga Lévinu va.

¹⁹ ’Ka we ’ko kɛlɛ léé, ’wo vo é yuɛma, dé wo bié fɛna sauun tinle ma bléyian va, té wo ga lo: Arɔn valé é benu, ’é da ma, yé ’wo wo dɔ do do wolé nyanama lé we ma, ’té wo yuɛ a wolé fɛnu ta.

²⁰ Dé wo fɛ ’lɛzannu wɔra wo pafɛnu gi bléyian va, té ’wo wɔra ana a naginile we ma lo, dé wo da ga.

²¹ Gakelebale we fe Moizi lɛ yé é léé:

²² ’I Gɛɛsɔn kulunu nɔnɔ é ziin, wo tranu dɔgɔnɔ ma, wo gɔnɔla ma gɔnɔla ma;

²³ ’bé nɔnɔle péli sia lɛɛ yɔ do wɔlɛ vu munu ta yé ’é bɔ lɛɛ yɔ fié wɔlɛ vu munu ma, munu faa lé woo bɔa zén‐ékevasɔkɔn gi nyanama do pale lɛ, woo lé.

²⁴ Nyanama lé é a lé Gɛɛsɔn kulunu a pa koo, we lé é a lé wa kɛlɛ koo, fɛnu lé é a lé wa kɔné si koo, wo lé ke ’ko:

²⁵ fɛnu lé é a lé wa si, wo lé ke ’ko: Bale lé sɔkɔn lé lɛnsɔ koo, zén‐ékevasɔkɔn koo, a tasɔ koo, dofɛnkɔlɛ lé wa zén‐é ’bɛ ta loru koo,

²⁶ zén‐ékevasɔkɔn lɛtansɔ koo, gɔrɔ lé ke é dirile Bale lé sɔkɔn valé balebanna zi, a bosɔ koo, a lɛtansɔ koo, wolé bawɔrɔnu faa koo, Bale lé sɔkɔn lé nyanamapafɛnu faa koo, woo lé. Yé ’bɛna nyanama faa lé é a lé wa pa, ’wa pa ma.

²⁷ É a lé Gɛɛsɔn kulunu ’wolé nyanama pa Arɔn valé é benu dére ta. Dé é a kɔné sile nyaoo, é a lé wa faa kɛlɛ wo dére ta. Fɛnu faa lé é a lé wa sia, wo ɛ bɛ paan wo lee.

²⁸ Nyanama lé é a lé Gɛɛsɔn kulunu a pa zén‐ékevasɔkɔn gi, yee lé ke bɛ, yé fɛnu lé é a lé wo yuɛ pa a va, Balebanzan Arɔn be Itamaa ɛ ke a gɔɔnzan nya.

²⁹ ’I Mérari benu nɔnɔ wo gɔnɔla ma gɔnɔla ma, yee valé wo tranu dɔgɔnɔ ma.

³⁰ ’Bé nɔnɔle pélisia lɛɛ yɔ do wɔlɛ vu munu ta yé ’é bɔ lɛɛ yɔ fié wɔlɛ vu munu ma, munu faa lé woo bɔa zén‐ékevasɔkɔn gi nyanama do pale lɛ, woo lé.

³¹ Fɛnu lé wo wo bɛ pa wo lee yé é a lé wo wo sia, ’té wo wo ma nyanama paan zén‐ékevasɔkɔn gi, wo lé ke ’ko: Bale lé sɔkɔn dɔyilinu koo, sɛedɔmayilinu koo, kɔnwɛyilinu valé ’wo suruégifɛnu koo,

³² gɔrɔyilinu koo, ’wo suruégifɛnu koo, gɔrɔkunfɛnu koo, wolé bawɔrɔnu koo, wo kɛlɛfɛnu faa valé wo ma nyanamapafɛnu faa koo, woo lé. Fɛnu lé wo wo bɛ pa wo lee, léé, ’wo wo sia, ’ka wo tɔnu fe do do.

³³ Nyanama lé é a lé Mérari kulunu a pa, nyanama faa lé é a lé wa pa zén‐ékevasɔkɔn gi, yee lé ke bɛ. Balebanzan Arɔn be Itamaa ɛ ke a gɔɔnzan nya.

³⁴ Moizi koo, Arɔn koo, munu nwiinzannu koo, wo Kéat benu nɔnɔ wo gɔnɔla ma gɔnɔla ma, é valé wo tranu dɔgɔnɔ ma.

³⁵ ’Wa nɔnɔle sia munu faa lé wo lɛɛ yɔ do wɔlɛ vu bɔ, wo ta, yé é bɔ lɛɛ yɔ fié wɔlɛ vu munu ma, ’té woo bɔa nyanama do pale lɛ zén‐ékevasɔkɔn gi, wo ta.

³⁶ Munu lé wo wo nɔnɔ, wo gɔnɔla ma gɔnɔla ma, wo ’léé a mi baa do wuru yaa yɔ sɔrafié wɔlɛ vu.

³⁷ Kéat kulunu lé wo wo nɔnɔ, ’té woo nyanama paan zén‐ékevasɔkɔn gi, wo lé ke bɛ. Moizi valé Arɔn wo nɔnɔ, dérean Gakelebale a fe Moizi lɛ, a yɛrama.

³⁸ Gɛɛsɔn benu lé wo wo nɔnɔ wo gɔnɔla ma gɔnɔla ma, é valé wo tranu dɔgɔnɔ ma,

³⁹ wa nɔnɔle sia lɛɛ yɔ do wɔlɛ vu munu ta yé é bɔ lɛɛ yɔ fié wɔlɛ vu munu ma, munu faa lé woo bɔa zén‐ékevasɔkɔn gi nyanama do pale lɛ, woo lé;

⁴⁰ munu lé wo wo nɔnɔ wo gɔnɔla ma gɔnɔla ma, é valé wo tranu gɔnɔ ma, wo ’léé a mi baa do wuru yaa yɔ do wɔlɛ vu.

⁴¹ Gɛɛsɔn kulunu lé wo wo nɔnɔ, munu faa lé woo nyanama paan zén‐ékevasɔkɔn gi, wo lé ke bɛ. Moizi valé Arɔn wo nɔnɔ Gakelebale dére ta.

⁴² Mérari kulunu lé wo wo nɔnɔ, wo gɔnɔla ma gɔnɔla ma, é valé wo tranu gɔnɔ ma,

⁴³ wa nɔnɔle sia lɛɛ yɔ do wɔlɛ vu munu ta, yé é bɔ lɛɛ yɔ fié wɔlɛ vu munu ma, munu faa lé woo bɔa zén‐ékevasɔkɔn gi nyanama do pale lɛ, woo lé.

⁴⁴ Munu lé wo wo nɔnɔ wo gɔnɔla ma gɔnɔla ma, wa mi baa do wuru suiɛdo.

⁴⁵ Mérari kulunu lé wo wo nɔnɔ, wo lé ke bɛ. Moizi valé Arɔn wo nɔnɔ dérean Gakelebale a fe Moizi lɛ, a yɛrama.

⁴⁶ Lévinu faa lé Moizi valé Arɔn valé Izraɛlnu nwiinzannu a nɔnɔ, wo gɔnɔla ma gɔnɔla ma, é valé wo tranu gɔnɔ ma,

⁴⁷ wa nɔnɔle sia lɛɛ yɔ do wɔlɛ vu munu ta, yé é bɔ lɛɛ yɔ fié wɔlɛ vu munu ma, ’té woo bɔa zén‐ékevasɔkɔn gi nyanama do do pale lɛ, ’té woo sɔkɔn kɔné sié, wo lé ke bɛ.

⁴⁸ Munu faa lé wo wo nɔnɔ, wo ’léé a mi baa ziɛn wuru fié yɔ sɔraziɛn.

⁴⁹ Wo wo nɔnɔ dére lé Gakelebale a fe Moizi lɛ, a yɛrama. Nyanama lé é a lé wa pa, yé kɔné lé é a lé wa si, wa gɔɔn wo lɛ do do. Wo wo nɔnɔ, dére lé Gakelebale a fe Moizi lɛ, a yɛrama.