Mi Nɔnɔle 36 - Kazambale lé Sebe Sauunu 1979

Lomu lé zarablewe

¹ Jozɛfu bɛn gizannu, Manasé be Makii be Galaad lé kɔn ’léézannu bié Moizi valé Izraɛlnu kulunu lé kɔn ’léézannu va, yé wo we fe wo lɛ.

² Wo léé: Gakelebale bii, kozan, béli dɔ léé, ’é zaratɛrɛ nɔ Izraɛlnu lɛ ’munnu zunle nya. Gakelebale lé kozan lɛ léé, ’é ko bwe Sɛlofesad zara nɔ a lunu lɛ.

³ Naa, dé é kɛlɛ léé, wo Izraɛl bɛn bɛ gi mi si, ’té wo kolé zara si ko tranu zé va, yé bɛn lé wo ’bɛ si, ’té wo ’bɛnu lé zarafɛ taa pa a nya. A zo lé zara lé ko a ye ’munnu zunle nya, a ke é dan san lɛ ko lee.

⁴ Yé dé Izraɛlnu lé lɛɛ yɔ fié wɔlɛ vuzan bɔ, bɛn lé wo ’bɛ si, wo ’bɛnu zara taa pa a nya, yé wa si ko tranu zé va.

⁵ We lé Gakelebale a fe, Moizi a fe Izraɛlnu lɛ. Yé é léé: Jozɛfu benu kulunu zé a néné.

⁶ We lé Gakelebale a fe Sɛlofesad lunu lé we ma, yee lé ke ’ko: dé é sɔ wo lɛ léé, wo bo‐oo boan sié, a se a wo lɛ, ’té dé gɔnézan a wo tranu gɔnɔlazan nya.

⁷ Dé é a zaraoo zaraan nya Izraɛlnu va, té é si bɛn do va yé wa nɔ bɛn bɛ lɛ lo, naa, Izraɛlnu faa ’é vo é nyanale ’wo tranu zaratɛrɛ la.

⁸ Yé blɛnnu faa lé, wo zara ke Izraɛlnu va, é a lé wo bo si ’wo tranu gɔnɔla, léé, Izraɛlnu faa do do ’wo nyana ’wo tranu zaratɛrɛ la.

⁹ Dé é a zaraoo zaraan nya, té é si bɛn do va yé wa nɔ bɛn bɛ lɛ lo, Izraɛlnu bɛnnu ’wo vo é nyanale ’wolé zara ta do do.

¹⁰ We lé Gakelebale a fe Moizi lɛ, Sɛlofesad lunu tawo a ta.

¹¹ Sɛlofesad lunu Makla koo, Tiisa koo, Ogla koo, Milka koo, Noa koo, wo ’wo ti bwe lé nénu si;

¹² wo bo si Jozɛfu be Manasé kulu gi munu va, yé wolé zaratɛrɛ vo ’wo tranu gɔnɔ gi.

¹³ Bélidɔwenu valé ’é sɔnnénu lé Gakelebale a nɔ Izraɛlnu lɛ Moizi lɔlu nya, Moab lé fɛna pɛblɛɛna, Juudɛn yuu sɔnɔ, Jériko yara, yee lé ke bɛ.