Mi Nɔnɔle 35 - Kazambale lé Sebe Sauunu 1979

Lévinu lé flanu

¹ Gakelebale we fe Moizi lɛ Moab lé fɛna pɛblɛɛna, Juudɛn yuu sɔnɔ, Jériko yara.

² É léma: ’Ka fe Izraɛlnu lɛ léma: Zara lé wo dan a ye lɛ bɛ, ’wa va fla kenu nɔ Lévinu lɛ, wozé nyanana nya. Yé é ziin, ’wo fla ’konu gini ma tɛrɛ nɔ wo lɛ.

³ Flanu ’é kɛlɛ wo nyanananu nya, yé fla gini ma tɛrɛ ’é kɛlɛ wolé trubɛnu blena nya, wolé fɛnu valé wolé trubɛnu faa zé nya.

⁴ Flanu lé ka dan a nɔ lɛ Lévinu lɛ bɛ, wo gini ma tɛrɛnu ’é si fla zi gɔrɔ ma yé é a zi lɛ sɔɔ mɛtrɛ wuru fié yɔ soru.

⁵ ’Ka fla zi dan; yirinwanazia zé ’é kɛlɛ kilo do; yirinwana bɛyilazia zé ’é kɛlɛ kilo do; yé yirinwana bɛbolazia zé ’é kɛlɛ kilo do. Fla é vo a méléna. Yé yirivɔnazia zé ’é kɛlɛ kilo do. Wolé flanu gini ma tɛrɛnu lé ke bɛ.

⁶ Flanu lé ka dan wo nɔ lɛ Lévinu lɛ, wo va fla suiɛdo ’é kɛlɛ mi yɔɔlaflanu nya; flanu lé migyɛzannu é bɔa yɔɔle lɛ ana, wo nya. Yé ’ka fla yɔ fié wɔlɛ fié nɔ wo lɛ ’bɛnu ta loru.

⁷ Flanu faa lé ka dan a nɔ lɛ Lévinu lɛ, fla yɔ fié wɔlɛ sɔraa lé, ’é valé wo gini ma tɛrɛnu nya.

⁸ Flanu lé ka dan a si lɛ Izraɛlnu lé flanu va yé ka a nɔ wo lɛ, munu lé wozé ke di, é a lé wa nɔ kiɛre, yé munu lé wozé ’ka di lo, é a lé wa nɔ sɛ. Bɛn do do faa lé flanu a kiɛre fɛan zo, é a lé wa nɔ Lévinu lɛ a ’léé yɛrama.

Mi yɔɔlaflanu

⁹ Gakelebale lé Moizi lɛ léma: Bé fe Izraɛlnu lɛ léma:

¹⁰ Dé ka Juudɛn yuu kini yé ka bɔ Kanaan tɛrɛ la,

¹¹ ’ka flanu pa, flanu lé wo dan kɛlɛ lɛ ka yɔɔnanu nya, wo nya. Mi lé é ’ka mi gyɛ lɛ ébo yuɛ va lo, fla ’ko ’é kɛlɛ a yɔɔna nya.

¹² Fla ’konu é dan kɛlɛ lɛ migyɛzan yɔɔna nya mi nyɛ lɛgipazan lee, léé, té wa gyɛ é dɔle weblezannu ’lɛ lo.

¹³ Flanu lé ka dan wo nɔ lɛ wo lɛ bɛ, wo va fla suiɛdo é dan kɛlɛ lɛ mi yɔɔlaflanu nya.

¹⁴ ’Ka fla yaa nɔ wo lɛ Juudɛn ’lɛzia, yé ka fla yaa nɔ wo lɛ Kanaan tɛrɛ la. Wo ɛ dan kɛlɛ lɛ mi yɔɔlaflanu nya.

¹⁵ Fla suiɛdo ’konu é dan kɛlɛ lɛ Izraɛlnu koo, bɛnnu koo, munu lé wo ke é nyanale ka méléna koo, ka yɔɔnanu nya. Ana lé migyɛzannu faa lé wo ’ka mi gyɛ lɛ wobo yuɛ va lo, wo dan yɔɔ lɛ.

¹⁶ Dé é kɛlɛ léé, mi do é bɔluzan bla foliɛwɔlɛ nya yé é ga, ’té migyɛzan lé; ’wa gyɛ ’é ga ma.

¹⁷ Dé mi do gɔlɛ sia yé é mi gyɛ a nya yé é ga, ’té migyɛzan lé; ’wa gyɛ ’é ga ma.

¹⁸ Dé mi do yili sia, dé é mi gyɛ a nya yé é ga, ’té migyɛzan lé; ’wa gyɛ ’é ga ma.

¹⁹ Mi nyɛ lɛipazannu ’é migyɛzan gyɛ; dé wo kee a nya yian ma, ’é a gyɛ ma.

²⁰ Dé mi do za a é bɔlu do gi yé é a nyunu, dé ’bɛ kan lo, dé we kyɛn do ɛ ke ana, yé é fɛ do vuli a va yé é ga ’bɛ we ma,

²¹ dé ’bɛ kaan lo, dé é fɛ duun a lɛ a nyané nya ’é gi yé é ga, ’té migyɛzan lé; mi nyɛ lɛipazan a gyɛ ’é ga ma; dé wo kee a nya yian ma, ’é a gyɛ ma.

²² Naa, dé mi do é bɔluzan nyunu kele, ’té a za ’ka a gi lo, dé ’bɛ kaan lo, dé é fɛ do vuli a va ’té we kyɛn ’ka wo méléna lo,

²³ dé ’bɛ kaan lo, dé é fɛ do duun a lɛ é tanyila yé é kɛlɛ ga nya, ’té a za ’ka a gi lo, ’té é ka we naané ginina a vazia lo,

²⁴ bélidɔwenu lé é a lé wo migyɛzan ’ko valé mi nyɛ lɛgipazan lé we ble wo yɛrama, wonu lé ke ’ko:

²⁵ É a lé munu é migyɛzan si mi nyɛ lɛgipazan lee, yé wa pa zia é ziin yɔɔlafla lé é go a ta bɛ, ana, yé é vo ’bɛna fɔɔ yé Balebanmunu ’lɛzan lé wo Bale ’lɛnyɔnɔ zén a nwiin, yé ’bɛ é ga.

²⁶ Dé migyɛzan si é yɔɔlafla la

²⁷ yé wo kee nyɛ lɛgipazan nya, ’té é a yɔɔlafla gini ma, yé ’bɛ a gyɛ, ’té migyɛwe ’ka ’bɛ nwiin lo.

²⁸ Naa, é a lé migyɛzan é vo é nyanale é yɔɔlafla la fɔɔ yé Balebanmunu ’lɛzan é ga. Balebanmunu ’lɛzan gale zuo, é bɔalɛ léé, é da ébo lé fla.

²⁹ Wenu lé é ke ka kululawenu nya, ka valé kalé nénu zé nya, ka nyanana faa na, yee lé ke bɛ.

Nyɛ lɛgipazan

³⁰ Dé mi do é bɔlu do gyɛ, dé anayezannu kɛlɛ, ’wo migyɛzan gyɛ wo dére ta. Té wo ga dɔ mi nwiin wenayezan do dére ta lo.

³¹ Migyɛzan lé a gyɛ yara lé, té ka a tabole nyi si lo. Naa, ’wa gyɛ, ’é ga.

³² Balebanzan gale ’lɛ, té ka a tabole nyi si yé é zi ye yé é si yɔɔlafla ta yé é nyana élé fla é ziin lo.

³³ Tɛrɛ lé ka nyana ana, té ka a sɛrɛ lo, naa, mi nyɛ éé tɛrɛ sɛra. Nyɛ lé wa zana tɛrɛ la bɛ, a siafɛ ’ka lo, fɔɔ ’té mi lé é mi gyɛ, ’té wa gyɛ é wo.

³⁴ Tɛrɛ lé ka dan nyana lɛ a ta bɛ, ana lé maa dan nyana lɛ ka méléna; té ka a sɛrɛ lo. Naa, maa a Gakelebale lé éé nyanaan Izraɛlnu méléna, a nya.