Mi Nɔnɔle 32 - Kazambale lé Sebe Sauunu 1979

Wo Galaad tɛrɛ nɔ Gad valé Rubɛn bennu lɛ

¹ Rubɛn munu valé Gad munu lé trubɛnu kɛlɛ di é baba, yé wa ye léé, Jaézɛɛ lé tɛrɛ valé Galaad lé tɛrɛ a trubɛnu blena zimanu nya.

² Rubɛn munu valé Gad munu da Moizi koo, Balebanzan Éléazaa koo, munu nwiinzannu koo, wo va, yé wo lé wo lɛ léé:

³ Atarɔt koo, Dibɔn koo, Jaézɛɛ koo, Nimra koo, Esibɔn koo, Éléalé koo, Sébam koo, Nébo valé Béɔn koo,

⁴ tɛrɛ ’ko lé Gakelebale ana munu kele Izraɛlnu nya, é a trubɛnu blena zima nya; yé trubɛnu a i wuozannu lee di.

⁵ Yé wo lé é ziin léé: Dé ko a i yuɛ gi mi zinnu nya, ’i tɛrɛ ’ko nɔ i wuozannu lɛ ma. Té ko Juudɛn yuu kini lo.

⁶ Moizi a zi pa Gadnu valé Rubɛnnu lɛ léé: Ka bwenu é dan go lɛ guli dan lɛ ’naan, yé ka vo ’koo?

⁷ Mɛmalé é sɔ ka lɛ léé, ka bɔluzannu fuu si wo ta, té ’wo wɔra tɛrɛ lé Gakelebale a nɔ wo lɛ, a ta loo?

⁸ Ko a Kadɛs‐Baanéa bléyian va, yé maa ka tinu nwunvɔ léé, ’wo go tɛrɛ nagini, a zo lé wa kɛlɛ ’ko zo.

⁹ Wo go fɔɔ pɛnguru lé wa laama Esikɔl, ana, yé wolé tɛrɛ naginile zuo, wo Izraɛlnu fuu si wo ta, wo gole tɛrɛ lé Gakelebale a nɔ wo lɛ, a ta we ma.

¹⁰ Gakelebale bli fli wo ma ’bɛ yi nya, yé ébo ’nyɔɔn a fele nya léé:

¹¹ Munu lé wo si Éjipiti tɛrɛ la, ’té wo lɛɛ gié lɛɛ yɔ do ta, tɛrɛ lé maa anbo ’nyɔɔn léé, maa dan a nɔ lɛ Abraam koo, Izak koo, Jakɔb koo, wo lɛ, wo va mi do kpen ’ka dan a ye lɛ lo. Wo ’ka tawo lɛ an zuo yarapalale nya lo,

¹² ’té dé é ’ka Kénizi mi Jéfuné be Kalɛb valé Nɛn be Jozué nya lo. Wo ɛ tawo maa, Gakelebale zuo yarapalale nya.

¹³ Gakelebale bli fli Izraɛlnu ma yé wo vo nɔɔna bwi gi lɛɛ yɔ fié wuo, fɔɔ yé munu ’konu lé wo wenaané kɛlɛ Gakelebale yuɛ gi yé é wo kulu ga.

¹⁴ Yé ka ye, ka dɔ ka tranu pa gi wenyanékɛlɛzannu nya, yé ka dan Gakelebale bli flile Izraɛlnu ma taa pa lɛ.

¹⁵ Naa, dé ka ka nwunzi dɔ Bale ta, é dan Izraɛlnu vo lɛ bwi gi é ziin, yé ka pli zi munu ’ko faa é dan san lɛ.

¹⁶ Wo bié Moizi ma yé wo léé: Ko dan kolé trubɛnu lé gɔrɔ bo lɛ ’ko, yé ko dan flanu pa lɛ kolé nénu zé nya;

¹⁷ yé ’bɛ zuo yé ko dan kolé gulidanfɛnu si lɛ é kele yé ko dɔ ko bɔlunu Izraɛlnu ’lɛ, fɔɔ yé fɛna lé wo dan a nɔ lɛ wo lɛ, yé wo bɔ ana. Naa, kolé nénu ’é vo fla plɛplɛnu ta ma, tɛrɛ ’ko lazannu lé we ma.

¹⁸ Ko ’ka dan da lɛ kolé kɔn ’léé lo fɔɔ yé Izraɛlnu faa ’wolé zaratɛrɛ ye.

¹⁹ Dé é a Juudɛn yuu zi tɛrɛ mun nyaoo, dé é a a ’lɛzia mioo, ko ’ka dan a do si lɛ kozé nya wo va lo. Naa, kozé zaratɛrɛ a Juudɛn yuu ma ’ko, yirinwanazia.

²⁰ Moizi lé wo lɛ léé: Dé ka kɛlɛ ’bɛ zo, dé ka gulidanfɛnu sia, gulidanle Gakelebale ’lɛ we ma,

²¹ dé ka Juudɛn kini Gakelebale ’lɛ, fɔɔ yé ka a nyanézannu bin a ’lɛ baa,

²² yé tɛrɛ ’ko plale Gakelebale wuo zuo yé ka si ana, ’té we ’ka dan kɛlɛ lɛ ka nwiin Gakelebale vazia valé Izraɛlnu vazia lo, yé tɛrɛ ’ko é dan kɛlɛ lɛ kazé nya Gakelebale ’lɛ.

²³ Naa, dé ka ’ka a kɛlɛ lɛ lo, ka wenyané kɛlɛ Gakelebale ma, yé ka we ’ko dɔɔ ma: kalé wenyané é dan ka kun lɛ.

²⁴ ’Ka flanu pa kalé nénu zé nya, ’ka kalé trubɛnu gɔrɔ bo yé é bɔra ka ’léé fɛan zo, ’ka kɛlɛ a zo.

²⁵ Gad munu valé Rubɛn munu lé Moizi lɛ léé: I wuozannu é dan a kɛlɛ lɛ fɛan zo lé kozan a fe, a zo;

²⁶ kolé nénu koo, ko nanu koo, kolé trubɛnu valé kolé winu faa koo, wo dan vo lɛ Galaad flanu ta,

²⁷ yé i wuozannu faa é dan gulidanfɛnu si lɛ, yé wo dan guli dan lɛ Gakelebale ’lɛ, kozan a fe fɛan zo, a zo.

²⁸ Moizi wolé we pla Balebanzan Éléazaa koo, Nɛn be Jozué koo, Izraɛl bɛn gi kɔn’léézannu koo, wo lɛ.

²⁹ É lé wo lɛ léé: Dé Gad munu valé Rubɛn munu Juudɛn yuu kini ka va, ’té wo faa lé gulidanfɛnu a wo lee, gulidanle Gakelebale ’lɛ we ma, yé dé tɛrɛ ’ko kɛlɛ kazé nya, ka dan Galaad lé tɛrɛ nɔ lɛ wo lɛ.

³⁰ Naa, dé wo ’ka guli dan lɛ ka va lo, ’wo nyana ka méléna Kanaan tɛrɛ la ma.

³¹ Gad munu valé Rubɛn munu a zi pa léé: Wean Gakelebale a fe i wuozannu lɛ, ko dan a kɛlɛ lɛ.

³² Ko dan gié lɛ Gakelebale ’lɛ Kanaan tɛrɛ la gulidanfɛnu nya ko lee, naa, kolé zara ’é kɛlɛ Juudɛn yuu ma ’ko ma.

³³ Amorénu nwiinzan blɛn Sioni lé tɛrɛ valé Bazan nwiinzan blɛn Ɔg lé tɛrɛ, Moizi a nɔ Gad munu koo, Rubɛn munu koo, Jozɛfu be Manasé bɛn lɛ do koo, wo lɛ; tɛrɛ koo, alé fla blɛnnu koo, wo zi tɛrɛnu valé wolé flanu koo, é a nɔ wo lɛ.

^34-36 Dibɔn koo, Atarɔt koo, Aroɛɛ koo, Atirɔt‐Sofan koo, Jaézɛɛ koo, Jogbéa koo, Bɛt‐Nimra koo, Bɛt‐Aaran koo, Gad munu wo pa; wa fla plɛplɛnu nya, yé wo trubɛnu gɔrɔ bo.

³⁷ Esibɔn koo, Éléalé koo, Kiijataim koo,

³⁸ Nébo koo, Baal‐Méɔn koo, Rubɛn munu wo pa. Wo wo tɔnu nɔla, yé wo Sibima pa. Yé flanu lé wo wo pa, wo wo tɔ pa.

³⁹ Makii munu valé Manasé munu nwa Galaad ma, yé wa si, yé Amorénu lé wo ke ana, wo wo bin.

⁴⁰ Moizi Galaad nɔ Manasé be Makii lɛ, yé é nyana ana kli.

⁴¹ Manasé be Jaii nwa a zi flanu ma yé é wo si yé é wo laa Jaii lé flanu.

⁴² Nobas nwa Kénat valé a zi flanu ma, yé é wo si, yé é wo tɔ pa Nobas, ébo tɔ nya.