Mi Nɔnɔle 31 - Kazambale lé Sebe Sauunu 1979

Wo Madiannu gyɛ guli nya

¹ Gakelebale we fe Moizi lɛ yé é léma: ’I Izraɛlnu lé we lɛgi pa Madian munu ma;

² ’bɛ zuo yé i dan go lɛ ilé munu va.

³ Moizi lé munu lɛ léma: ’Ka munu ma’lɛrɛ gulidanle we ma, yé ’wo go guli dan Madiannu va yé we lé Gakelebale a fe Madiannu ma, wa lɛ sɔɔ.

⁴ ’Ka mi wuru soru soru si sunya nya Izraɛl bɛnnu faa do do gi.

⁵ Wo munu si a va Izraɛlnu bɛn gɔnɔ do do gi mi wuru soru soru; munu lé wo ’wo ma’lɛrɛ gulidanle we ma, wa mi baa suiɛdo.

⁶ Moizi bɛn do do gi sunya wuru soru soru pa zia, ’é valé Balebanzan Éléazaa be Finé nya, ’té fɛnu lé wo wo pa é yɛrama Bale bannafɛnu nya, ’é valé bélinu lé wo dére zuoi éé goo, ’té wa a lee.

⁷ Wo nwa Madian ma dérean Gakelebale a fe Moizi lɛ, a yɛrama, yé wo gɔnénu faa gyɛ.

⁸ Wo Madiannu valé wo nwiinzannu gyɛ ékeva, Évi koo, Rékɛm koo, Suu koo, Uru koo, Réba koo, woo lé; wo nwiinzan blɛn soru tɔ lé ke bɛ, yé é ziin wo Béɔɔ be Balaam gyɛ gwɔun nya.

⁹ Madian lomu koo, wolé né kiénénu koo, Izraɛlnu wo si luunu nya, yé wolé winu koo, wolé trubɛnu koo, wolé fuafɛnu faa koo, wo wo si gla nya.

¹⁰ Wo wolé fla blɛnnu faa valé wolé flanénu faa kyɛ ble.

¹¹ Fɛ faa lé wa si gla nya, ’é valé gulizarafɛnu faa, munu valé winu, wa sia,

¹² yé luunu koo, gulizarafɛnu koo, fɛnu lé wa si gla nya koo, wo go wo nya, Moizi koo, Balebanzan Éléazaa koo, Izraɛlnu faa koo, wo va, ’té wa é nyanale Moab lé fɛna pɛblɛɛna, Juudɛn yuu sɔnɔ, Jériko yara zia.

¹³ Moizi koo, Balebanzan Éléazaa koo, munu nwiinzannu faa koo, wo go wo ’lɛ zia fla gini ma.

¹⁴ Moizi bli fli sunyanu ’lɛzannu ma, sunya wuru soru soru ’lɛzannu koo, sunya yɔ soru soru ’lɛzannu koo, wo ma.

¹⁵ É lé wo lɛ léé: Mɛmalé ka lomu faa vo é yuɛmaa?

¹⁶ Woan Izraɛlnu sia ana yé wo yuɛgi blan Gakelebale lé we kɛlɛle ma Baal‐Péɔɔ lé we nya Balaam dére ta loo? yé ’bɛ lé we maan migyɛgyɛ ’wii Gakelebale lé munu ta loo?

¹⁷ Sin, ’ka gɔnénénu faa gyɛ, yé lomu faa lé gɔné yia wo va, ’ka wo faa gyɛ;

¹⁸ naa, blɛnnénu faa lé wo ’ka gɔné dɔɔ lɛ lo, ’ka wo vo é yuɛma kazé nya.

Wo gulizarafɛnu guli

¹⁹ Yé ’kaa, ’ka vo fla gini ma yi sɔrafié, ka va munu faa lé wo mi gyɛ koo, ka va munu faa lé wo mane mi gale ma koo, ’ka kabo kɛlɛ tegele a yi yaazan valé a yi sɔrafiézan nya, ka valé kalé luunu nya.

²⁰ ’Kalé varɔnu faa zuru é ziin, fɛnu faa lé wa kɛlɛ wikɔlɛ nya koo, sɔ faa lé wa tan bolikyɛɛ nya koo, fɛ faa lé wa kɛlɛ yili nya koo, ’ka wo faa zuru.

²¹ Balebanzan Éléazaa lé sunyanu lé wo go guli ma, wo lɛ léé: Bélidɔwe lé Gakelebale a vo Moizi va, yee lé ke ’ko:

²² Kyan koo, gɔɔlifu koo, zéné koo, foliɛwɔlɛ koo, tini koo, lɛe koo,

²³ fɛnu faa lé kyɛ ’ka wo blé lo, ’ka wo vɔ kyɛ va wo gibɔle we ma. Naa, fɛnu lé kyɛ a blé, ’ka wo gi bɔ, fɛ kɛlɛ tegele ’yi nya; ’ka wo zuru ’yi nya.

²⁴ ’Kalé varɔnu zuru yi sɔrafiézan nya yé ka dan kɛlɛ lɛ tegele; ’bɛ zuo, a zi a ka lɛ léé, ka go fla.

²⁵ Gakelebale lé Moizi lɛ léé:

²⁶ Bii koo, Balebanzan Éléazaa koo, kɔnzannu koo, ’ka gulizarafɛnu nɔnɔ; fɛ lé wa si, munu valé trubɛnu, yee lé.

²⁷ ’Ka gulizarafɛnu ’ko guli sunyanu lé wo go guli dan lɛ, wo valé munu faa ma.

²⁸ Sunyanu lé wo go guli dan lɛ, ’i Bale zé fɛ si wozé fɛnu va, ’bɛ gi léé, dé é a munu nyaoo, dé é a dirinu nyaoo, dé é a sokofale valé ’blanu nyaoo, dé wa wuru fié yɔ soru, ’té Bale zé a do.

²⁹ Bé si sunyanu zé va, bé nɔ Balebanzan Éléazaa lɛ Gakelebale zé nya.

³⁰ Izraɛlnu zé lé wa nɔ wo lɛ, bé do do si fɛ yɔ fié wɔlɛ vu vu va, munu koo, dirinu koo, sokofale valé ’blanu koo, winu faa koo, woo lé, yé bé nɔ Lévinu lé wo Gakelebale lé sɔkɔn tabin‐é, wo lɛ.

³¹ Moizi valé Balebanzan Éléazaa a kɛlɛ, dére lé Gakelebale a fe Moizi lɛ, a yɛrama.

³² Sunyanu lé gulizarafɛnu lé ke lomu valé trubɛnu nya, wo ’léé a ’ko zo: ’bla a baa wuru do yɔ suiɛdo wɔlɛ vu ta sɔrafié, ’é ta lé ’bla wuru soru;

³³ diri a baa yɔ do wɔlɛ vu ta suiɛdo;

³⁴ sokofale a baa yɔ do wɔlɛ vu wuru soru;

³⁵ lomu a baa vu ta suiɛdo; wo ’ka gɔné dɔɔ lɛ lo.

³⁶ Munu lé wo go guli dan lɛ, wozé gulizarafɛ lɛ do a ’bla baa yɔ sɔraa wɔlɛ sɔraa wuru sɔrafié yɔ soru.

³⁷ Wo va ’bla wuru yaa yɔ yaa wɔlɛ vu ta soru a Gakelebale zé nya;

³⁸ diri a baa vu ta sɔraa, yé wo va diri yɔ yaa wɔlɛ vu ta fié a Gakelebale zé nya;

³⁹ sokofale a baa vu ta soru wuru fié yɔ soru; a va sokofale yɔ yaa wɔlɛ do a Gakelebale zé nya;

⁴⁰ yé mi a baa sɔraa, yé wo va mi yɔ do wɔlɛ vu ta fié a Gakelebale zé nya.

⁴¹ Fɛan wa tadɔ Gakelebale zé nya, Moizi a nɔ Balebanzan Éléazaa lɛ, fɛan zo lé Gakelebale a fe, a yɛrama.

⁴² Fɛnu lé wa nɔ Izraɛlnu lɛ, ’té Moizi a si gulidanmunu zé va,

⁴³ yé é kɛlɛ Izraɛlnu zé nya, yee lé ke ’ko: ’bla a baa yɔ sɔraa wɔlɛ sɔraa, ’é ta lé ’bla wuru sɔrafié yɔ soru;

⁴⁴ diri a baa vu ta sɔraa;

⁴⁵ sokofale a baa vu ta soru ’é ta lé wuru fié yɔ soru;

⁴⁶ mi a baa sɔraa.

⁴⁷ Fɛnu lɛ do lé wa nɔ Izraɛlnu lɛ, dé fɛ a yɔ fié wɔlɛ vu, Moizi a do si a va; dé é a mi nyaoo, dé é a wi nyaoo, é a si wo va, yé é a nɔ Lévi munu lé woo Gakelebale lé sɔkɔn ta bin‐é, wo lɛ, fɛan zo lé Gakelebale a fe Moizi lɛ, a yɛrama.

⁴⁸ Sunya wuru soru nwiinzannu koo, sunya wuru soru ’lɛzannu koo, sunyanu yɔ soru ’lɛzannu koo, wo da Moizi va,

⁴⁹ yé wo lé a lɛ léé: Sunyanu lé ke ko wuo, i wuozannu wo nɔnɔ, yé ko va mi do ’ka so lɛ a ’léé lo.

⁵⁰ Ko faa do do, kyanfɛnu lé ko a ye, ko da wo nya Gakelebale lɛ, blɛ nya; kyanbalenénu koo, bɛmakyannu koo, bɛnwɔlɛmakyannu koo, tɔnégikyannu koo, bɔrɔmakyannu koo, ko da wo nya, léé, ’wo kɛlɛ kolé wenyané ’yibofɛ nya Gakelebale ’lɛ.

⁵¹ Wo kyanfɛ ’konu faa nɔ Moizi valé Balebanzan Éléazaa lɛ.

⁵² Kyan faa lé sunya wuru soru ’lɛzannu valé sunya yɔ soru ’lɛzannu a nɔ Gakelebale lɛ, balebanfɛ lé wa nwaan Gakelebale lɛ, a nya, éé sikla sian sikla baa sɔraa wuru yaa yɔ sɔrafié wɔlɛ vu.

⁵³ Gulizarafɛ lé sunyanu a ye, é vo wo lee.

⁵⁴ Moizi valé Balebanzan Éléazaa, wo kyan si sunyanu wuru soru ’lɛzannu valé sunya yɔ soru ’lɛzannu lee, yé wo go a nya zén‐ékevasɔkɔn gi, we sele dɔ Izraɛlnu gi fɛ nya Gakelebale ’lɛ.