Mi Nɔnɔle 28 - Kazambale lé Sebe Sauunu 1979

Wo saraka bobléyinu dɔ

¹ Gakelebale we fe Moizi lɛ yé é léé: ’I we pla Izraɛlnu lɛ léé:

² Dé a bléyi bɔ, ’wo an banfɛ nɔ an lɛ, fɛnu lé wa kyɛ blé, ’té maa a gin sié néné, a nya.

³ Bé fe wo lɛ léé: Fɛ lé wo dan a nɔ lɛ maa, Gakelebale lɛ sarakabofɛ lé wa kyɛ blé, a nya, yee lé ke ’ko: yi faa do do ma, ’blané fié lé wo lɛɛ ke do, ’té we do ’ka wo ma lo, ’wo ’bɛ nɔ balebanwi lé wa kyɛ blé, ’té a nɔle ’ka nyaan lo, a nya.

⁴ ’I ’blané do nɔ bladi yé bé do nɔ nyanadi fɔfɔ.

⁵ A vafɛ ’é kɛlɛ burupun zima suoné do lé wa vɔɔ ɔlivinyɔnɔ litré do nya, a nya.

⁶ É a balebanwi lé wa kyɛ blé, ’té a nɔle ’ka nyaan lo, ’té wa nɔ Sinai gɔ nwiin bɛ, a nya; é a sarakabofɛ lé wa kyɛ blé, ’té Gakelebale a gin sié néné, a nya.

⁷ Baleban’yi ’é kɛlɛ litré do nya, ’bla do do zé nya; é a lé i balebannwɛ zana Gakelebale ’lɛ, fɛna sauun na.

⁸ ’I ’blané fiézan nɔ nyanadi fɔfɔ, ’té a vafɛ valé baleban’yi a bélé bladi zé zo ma; yee ɛ ke sarakabofɛ lé wa kyɛ blé, ’té maa, Gakelebale a gin sié néné, a nya.

⁹ Flinyi nya, ’blané fié lé wo lɛɛ ke do, ’té we do ’ka wo ma lo, ’ka wo nɔ, yé a vafɛ ’é kɛlɛ burupun zima suoné fié lé wa vɔɔ nyɔnɔ nya, a nya, é valé baleban’yi nya.

¹⁰ É a flinyi lé balebanwi lé wa kyɛ blé, a nya; ’ka nɔ flinyi faa do do ma; balebanwi lé wa kyɛ blé, ’té a nɔle ’ka nyaan lo, ’bɛ valé baleban’yi, ’té ’ka ’bɛ é no duowo.

¹¹ Kalé moné do do faa bɔrale nya, dirigɔné boroné fié koo, ’blagɔné do koo, lɛɛ do ’blané sɔrafié lé we do ’ka wo ma lo koo, ’ka wo nɔ maa, Gakelebale lɛ, balebanwi lé wa kyɛ blé, a nya;

¹² yé dirigɔné do do vafɛ ’é kɛlɛ burupun zima suo do lé wa vɔɔ nyɔnɔ nya, a nya; ’blagɔné vafɛ ’é kɛlɛ burupun zima suoné fié lé wa vɔɔ nyɔnɔ nya, a nya;

¹³ ’blané do do vafɛ ’é kɛlɛ burupun zima suoné do lé wa vɔɔ nyɔnɔ nya, a nya. É a balebanwi lé wa kyɛ blé, ’té maa Gakelebale a gin sié néné, a nya.

¹⁴ Baleban’yi ’é kɛlɛ nwɛ litré fié nya dirigɔné do zé nya, litré do é buu a ’blagɔné do zé nya, yé litré do a ’blané do zé nya. É a moné bɔrale lé balebanwi lé wa kyɛ blé, a nya.

¹⁵ ’Wo boligɔné nɔ Gakelebale lɛ wenyané ’yibo saraka nya, balebanwi lé wa kyɛ blé, ’té a nɔle ’ka nyaan bɛ lo, ’bɛ valé baleban’yi, ’té ’ka ’bɛ é no duowo.

¹⁶ Moné vinin lé yi vu ta ziɛnzan nya, ’bɛ a Gakelebale lé ka taboyi nya.

¹⁷ Moné ’ko yi vu ta soruzan a fɛtiyi nya. Yi sɔrafié wuo, buru lé lévɛn ’ka a va lo, ’wo vo a blena.

¹⁸ A yi vininzan nya, ’ka zénle ékeva plɛplɛ kɛlɛ; té ka nyanama pa lo, ’té dé é ’ka ka ma’lɛrɛle nya lo.

¹⁹ ’Ka Gakelebale ban, wi lé wa kyɛ blé, a nya; dirigɔné boroné fié koo, ’blagɔné do koo, lɛɛ do ’blané sɔrafié lé we do ’ka wo ma lo koo, ’ka wo nɔ wi lé wa kyɛ blé, a nya.

²⁰ ’Ka a taa pa burupun zima lé wa vɔɔ nyɔnɔ nya, a nya; suo nya do a dirigɔné do zé nya, suoné nya fié a ’blagɔné do zé nya,

²¹ yé ’té suoné nya do a ’blané do do zé nya.

²² ’Ka boligɔné do nɔ wenyané ’yibosaraka nya, kalé wenyané ’yibole we ma.

²³ ’Ka saraka ’konu nɔ, balebanwi lé wa kyɛ blé bladi, ’té a nɔle ’ka nyaan lo bɛ, ’té ’ka ’bɛ é no duowo.

²⁴ ’Ka wo nɔ yi faa do do ma, yi sɔrafié wuo; é a sarakafɛ lé wa kyɛ blé, ’té Gakelebale a gin sié néné, a nya. É a lé wa nɔ, balebanwi lé wa kyɛ blé, ’té a nɔle ’ka nyaan lo bɛ, ’é valé baleban’yi, ’té ’ka ’bɛ é no duowo.

²⁵ A yi sɔrafiézan nya ’ka zén‐ékeva plɛplɛ kɛlɛ; té ka nyanama do kpen pa lo, ’té dé é ’ka ka ma’lɛrɛle nya lo.

²⁶ Dé ka flɛyi do fɛti kɛlɛ, yian nya lé ka kalé féifɛ vinin no Bale lɛ, ’ka zén‐ékeva plɛplɛ kɛlɛ. Té ka nyanama do kpen pa lo, ’té dé é ’ka ka ma’lɛrɛle nya lo.

²⁷ ’Ka Bale ban, balebanwi lé wa kyɛ blé, ’té Gakelebale a gin sié néné, a nya. ’Ka a kɛlɛ dirigɔné boroné fié koo, ’blagɔné do koo, lɛɛ do ’blané sɔrafié koo, wo nya.

²⁸ ’Ka a taa pa burupun zima lé wa vɔɔ nyɔnɔ nya, a nya; suo nya do a diri do do zé nya, yé suoné nya fié a ’blagɔné zé nya,

²⁹ yé suoné nya do a ’blané do do zé nya.

³⁰ ’Ka boligɔné do nɔ kalé wenyané ’yibole we ma.

³¹ ’Ka saraka ’konu bo ma, balebanwi lé wa kyɛ blé, ’té a nɔle ’ka nyaan lo bɛ, ’é valé baleban’yi, ’té ’ka ’bɛ é no duowo. Té we do é kɛlɛ kalé ’blané ma lo, yé ’ka baleban’yinu pa a va.