Mi Nɔnɔle 25 - Kazambale lé Sebe Sauunu 1979

Wo yo ban Moab lé fɛna

¹ Izraɛlnu nyana Sitim, yé Izraɛlnu kun wenyané kɛlɛle ma Moab blɛnnu va.

² Wo Izraɛlnu laa léé, ’wo pa ’wo va ’wolé bale banna, yé munu ana fɛ ble yé wo dia wolé balenu ’lɛ.

³ Izraɛlnu zén wolé bale lé wa laama Baal‐Péɔɔ, a zuo. Yé Gakelebale bli fli wo ma.

⁴ Gakelebale lé Moizi lɛ léé: ’I munu nwiinzannu faa zén ékeva, yé ’i weanwiinzannu faa dun Gakelebale ’lɛ yili ta, léé, Gakelebale lé bliflile é si Izraɛlnu ma.

⁵ Moizi lé Izraɛlnu lé weblezannu lɛ léé: ’Ka faa do do, kalé munu lé wo zén Baal‐Péɔɔ zuo, ’ka wo gyɛ.

⁶ Yé bé ye, Izraɛlnu va mi do da Madian le do nya é bwenu va, Moizi valé Izraɛlnu yuɛ va, ’té wa wuvɔna zén‐ékevasɔkɔn ’léé.

⁷ Balebanzan Arɔn be Éléazaa be Finé we ’ko ye aan wo, é nwa munu va yé é din do si.

⁸ É go Izraɛl gɔnézan zuo ’bɛlé sɔkɔn gi yé é wo fiénu fɔn ékeva wo bɔn la, din nya. Yé migyɛgyɛ lé é ke Izraɛlnu gyɛna, yé é dɔ.

⁹ Munu lé migyɛgyɛ wo gyɛ, wa mi baa vu ta fié.

¹⁰ Gakelebale we fe Moizi lɛ yé é léé:

¹¹ An bli lé é nwa Izraɛl ma, Balebanzan Arɔn be Éléazaa be Finé a dɔrala. Anlé maawo bli a a gi, azama. Yé an ’ka Izraɛlnu gyɛ lɛ an bliflile nya lo.

¹² Amalé, bé fe a lɛ léé, maa vole drɔɔ lé gipawe kɛlɛ a va.

¹³ É dan kɛlɛ lɛ gipawe lé a glɛ ’ka lo, a nya, yee valé é kulunu zé nya lɛɛfaama. É ’élé Bale lɛi maawo, azama, yé é Izraɛlnu lé wenyané ’yibo.

¹⁴ Izraɛl gɔné lé wa gyɛ Madian lezan va, wa laama Salu be Zimri, é a kɔn’léézan nya Siméɔn bɛn gi.

¹⁵ Madian lezan lé wa gyɛ, wa laama Suu lu Kozbi. Suu a kɔn’léézan nya Madian bɛn gi.

¹⁶ Gakelebale lé Moizi lɛ léé:

¹⁷ ’Ka Madiannu ye ka nyanézannu nya ma, yé ’ka wo gyɛ.

¹⁸ Naa, wo ’wobo nagɔɔn ka nyanézannu nya. Wo ka saan wolé dabli kɛlɛle nya Péɔɔ lé we gi, yee valé wo buru Kozbi lé we gi; Madian minwiinzan do lu lé; wa gyɛ migyɛgyɛ nya a yi la bɛ, ’té wa Péɔɔ bɔna.