Mi Nɔnɔle 24 - Kazambale lé Sebe Sauunu 1979

¹ Balaam a ye léé, é sɔ Gakelebale lɛ léé, é Izraɛl drɔɔ vo, yé é’ka go lɛ yo kɛlɛ lɛ bélé é vinin zo lo, naa, é yara dɔ bwi la zia.

² Balaam é yara nwa yé é Izraɛl lé sɔkɔnnu ye é dɔle wo bɛn ma do do. Yé Bale Léli a kun.

³ Balaam élé balelawe fe, yé é léé: Béɔɔ be Balaam dére lé ke ’ko: Mian a yuɛ ke é fuole, a dére lo.

⁴ Mian éé Bale dére maan, ’Té éé Plɛplɛfaazanbale lé yuɛzi yé, a dére lo. Mi lé é dia é bli la, ’té a yuɛ a é fuole, a dére lo.

⁵ Jakɔb, ilé sɔkɔnnu a é nɔnɔmi ’lɛ. Izraɛl, i nyananu a é zima.

⁶ Wa é sɔɔlale fɛfaana, Wa bélé féinu lé wo ke yuu punma, wo zo; Wa bélé aloɛyili lé Gakelebale a suru, a zo; Wa bélé sɛdrɛyilinu lé ke ’yi gɔ la, a zo.

⁷ ’Yi wolé suonu fan ’té éé yoroan, Yé alé fɛwɔlɛnu é dan fan lɛ ’yi fanle lé we ma. A nwiinzan blɛn mini Agaga ta; Yé alé plale mi nwiin é dan kɛlɛ lɛ plɛplɛ.

⁸ Bale wo si Éjipiti tɛrɛ la, É a wo lɛ plɛplɛ bélé du lé plɛplɛ zo. Bɛnnu lé woo nwaan a ma, éé wo gya, Éé wo wɔlɛnu yélié, yé éé wo fɔn‐o ’élé sawɔlɛnu nya.

⁹ Éé zunwo ’é powuo ta, yé éé yiaan bélé golizra zo, bélé golizra tina zo. De ɛ dan a nwa lɛɛ? Dé miomian é i drɔɔ vo, ’bɛzan drɔɔ ’é voo; Yé dé miomian bale pa i ma, ’wo bale pa ’bɛzan ma.

¹⁰ Balak bli fli Balaam ma, é bɛ gyɛ, yé é lé Balaam lɛ léé: Maa i laa léé, i bale pa an nyanézannu ma, yé bé ye, i wo drɔɔ vo tan gɔnɔ yaa.

¹¹ ’I si an va sin; ’i go ka va. Maa a fe léé, maa dan i tɔ kɛlɛ lɛ blɛn, naa, Gakelebale ilé tɔ yele yi ga.

¹² Balaam a zi pa Balak lɛ léé: Ii! munu lé i wo nwunvɔ an va, maa ’ka a fe lɛ wo lɛ loo?

¹³ Dé Balak lé kɔn a é fanle gɔɔlifu valé kyan nya, dé é a nɔ an lɛoo, an ’ka bɔaléé, an Gakelebale dére ta buu, yé dé wenyané léé, dé wezin léé, yé maa a kɛlɛ lo; we lé Gakelebale a fé, yee lé maa fé.

¹⁴ Yé bé ye, sin, maa dan go lɛ anlé munu va. ’I da, yé wean migɔnɔ ’ko é dan a kɛlɛ lɛ ilé munu lɛ é voéla, maa a zuo fe i lɛ.

¹⁵ Balaam élé balelawe fe, yé é léé: Béɔɔ be Balaam dére lé ke ’ko: Mian a yuɛ ke é fuole, a dére lo.

¹⁶ Mian éé Bale dére maan, ’Té é Loruzan bɔn‐in wenu dɔɔ, ’Té éé Plɛplɛfaazan Bale lé yuɛzi yé, a dére lo. Mian éé diaan é bli la ’té a yuɛ a é fuole, a dére lo.

¹⁷ Maa a yé, naa lao kaan lo, An yuɛ vɔ a ta, naa, é ’ka é pu lo; Monéné si Jakɔb va, Plaminwiinyili nwa Izraɛl va, É dan Moab munu fɔn lɛ ’wo san gi; Yé é dan Sɛt lé nénu faa gyɛ lɛ.

¹⁸ É dan pla lɛ Édom munu nwiin, É dan pla lɛ é nyanézannu Séiinu nwiin, Izraɛl é dan élé plɛplɛ nagɔɔn lɛ.

¹⁹ Mi do é dan nwa lɛ Jakɔb gɔnɔ gi minwiinzan nya, Yé munu lé wo vo fla, é dan wo gyɛ lɛ za ma.

²⁰ Balaam Amalɛk ye. É balelawe fe, yé é léé: Amalɛk a bɛn vininzan nya, Naa, é voéla a kulu é dan ga lɛ.

²¹ Balaam Kéninu ye. É balelawe fe, yé é léé: I dan mɔn lɛ i nyanana, Ilé kɔn a é dɔle gɔlɛ ta.

²² Naa, dé Asirinu go i nya luu gi bléyian va, Wo dan Kéninu bin lɛ.

²³ Balaam balelawe fe yé é léé: Yiba! dé Bale we ’ko kɛlɛ, de ɛ dan vo lɛ é yuɛmaa?

²⁴ Naa, ’yitagoronu é dan si lɛ Kitim, Yé é dan yaa lɛ Asirinu nwiin, é valé Ébrunu nya, Naa, wo dan yee kulu ga lɛ é ziin.

²⁵ Balaam nwa yé é go ’é va. Balak go élé fɛna.