Mi Nɔnɔle 21 - Kazambale lé Sebe Sauunu 1979

Zéné méné

¹ Arad mununwiinzan blɛn lé é ke Kanaan mi nya, éé nyanaan yirinwana bɛyilazia tɛrɛ la, é a ’ma léé, Izraɛlnu a dana Atarim zi ta. É guli dan Izraɛl va, yé é mi kenu kun guli ma.

² Yé Izraɛl Gakelebale kun léé, dé i munu ’ko pa an lee, an dan bale pa lɛ wo ma yé maa wo sɛrɛ.

³ Gakelebale Izraɛl dére ’ma, yé é Kanaan munu pa wo lee. Wo bale pa fla valé a tamunu faa ma yé wo wo sɛrɛ tata, yé wo fɛkona tɔ pa Ooma.

⁴ Wo nwa Ori gɔ ma yé wo Wɛyi Sɔɔn lé zi sia, paale Édom lé tɛrɛ ma we ma. Munu bli kɛlɛ pɛpɛ zia,

⁵ yé wo we fe Gakelebale ma, yé wo we fe Moizi ma, yé wo léé: Mɛmalé ka ko si Éjipiti tɛrɛ la, léé, ko ga bwi la koo? Naa, fɛblele ’ka ana lo, yé ’yi ’ka ana lo, yé fɛ naané ’ko blele nɔla ko ’léé.

⁶ Yé Gakelebale méné suiɛ yaale pa zia munu ’ko ma; wo suiɛ dɔ munu ma, yé Izraɛlnu kiɛre ga.

⁷ Munu da Moizi va, yé wo léé: Ko wenyané kɛlɛ, naa, ko we fe Gakelebale ma yé ko we fe i ma. ’I bazoro Gakelebale lɛ, ’é méné ’konu si ko ma. Moizi bazoro munu tɔ ma.

⁸ Gakelebale lé Moizi lɛ léé: ’I méné suiɛ yaale foto kɛlɛ, yé bé dun yiliblan do ’léé; dé miomian méné suiɛ dɔ a ma, dé é méné foto ’ko nagini, é dan béli lɛ.

⁹ Moizi zéné foli méné foto nya, yé é a dun yiliblan ’léé, yé dé miomian méné suiɛ dɔ a ma, dé é zénéméné nagini, ’té é béli.

¹⁰ Izraɛlnu go, yé wo sɔkɔnnu dɔ Obɔt.

¹¹ Wo si Obɔt yé wo ’wolé sɔkɔnnu dɔ Ijé‐Abarim bwi la lé é ke Moab yara, ana, yirinwanazia.

¹² Wo si ’bɛna yé wo ’wolé sɔkɔnnu dɔ pɛnguru lé wa laama Zérɛd, ana.

¹³ Wo si ’bɛna yé wo ’wolé sɔkɔnnu dɔ Aanɔn yuu lé éé yoroan bwi la Amorénu glɛ la, a zi, naa, Aanɔn yuu a Moabnu lé tɛrɛ glɛ nya, Moab valé Amorénu méléna.

¹⁴ Amalé é a é gyɛle Gakelebale lé gulidanlenu zuofesɛbɛ gi léé, Vaɛb lé é ke Sufa tɛrɛ la koo, Aanɔn lé ’yiyoro plɛplɛ koo,

¹⁵ ’yiyoro plɛplɛ lé a pélisia Aa vazia yé é mane Moab glɛ ma koo, woo lé.

¹⁶ Wo si fɛkona yé wo bɔ Bɛɛ; yee Bɛɛ na lé Gakelebale lé Moizi lɛ léé, ’i munu zén ékema yé maa dan ’yi nɔ lɛ wo lɛ, yee Bɛɛ duo lé.

¹⁷ ’Bɛ zuo Izraɛlnu lɛrɛ ’ko vɔ léé: ’Yiguru, ’i bɔ. ’Ka a tɔbɔlɛrɛ vɔ.

¹⁸ ’Yiguru lé minwiinzannu a bo, Munu va mi segelenu a bo Plaminwiinyili valé wolé yilinu nya, yee lé.

¹⁹ Wo si bwi la yé wo go Matana; yé wo si Matana yé wo go Naaliɛl, yé wo si Naaliɛl yé wo go Bamɔt

²⁰ yé wo si Bamɔt yé wo go Moab tɛrɛ la pɛnguru gi, yé wo go Pizga gɔ nwiin, ’té bwi vo wo wuo.

²¹ Izraɛlnu munu nwunvɔ Amorénu nwiinzan Sioni va, a fele a lɛ we gi léé:

²² ’I zi nɔ ko lɛ léé, ko gié ilé tɛrɛ la; ko ’ka dan wɔra lɛ kalé féinu koo, kalé dɔrɔféinu koo, ana lo, yé ko ’ka dan ’yiguru gi ’yi mini lɛ lo; ko dan gié lɛ gbéin ta tegele fɔɔ yé ko ilé tɛrɛ glɛ kini.

²³ Sioni ’ka Izraɛlnu giéle nyi si lɛ élé tɛrɛ la lo; é ’élé munu faa zén ékema, yé wo da zi dɔ lɛ Izraɛlnu lee, bwi la; é da Jaas, yé é guli dan Izraɛlnu va.

²⁴ Izraɛl wo gyɛ gwɔun nya yé wo alé tɛrɛ si, é sia Aanɔn fɔɔ Jabɔk yuu ma, fɔɔ Amɔn lé tɛrɛ glɛ la; naa, Amɔnnu lé tɛrɛ glɛ la a plɛplɛ.

²⁵ Izraɛlnu fla faa si, yé wo nyana kli Amorénu lé fla blɛnnu ta, Esibɔn valé é zi flanu faa ta.

²⁶ Naa, Esibɔn a Amorénu nwiinzan Sioni lé fla nya; é guli dan Moabnu nwiinzan vininzan va, yé é ’bɛlé tɛrɛ si fɔɔ yé é bɔ Aanɔn yuu ma.

²⁷ Amalé lɛrɛvɔzannu a sia lɛrɛ nya léé: ’Ka da Esibɔn. ’Ka Sioni lé fla dɛrɛ pa, ’ka a kɛlɛ plɛplɛ.

²⁸ Naa, kyɛ do si Esibɔn, Kyɛnɛnɛ si Sioni lé fla; É Aa‐Moab ble, Munu lé woo nyanaan Aanɔn yuu gɔ torole nwiin, é wo ble.

²⁹ Moabnu, ka gale nyɔ, ’Kaa Kémosimunu, ka san. Moab gɔnénu kɛlɛ fwilazannu nya, Yé alé blɛnnénu kɛlɛ Amorénu nwiinzan Sioni lé luunu nya.

³⁰ Ko kolé dinwɔlɛnu vuli wo va, A péli sia Esibɔn fɔɔ Dibɔn, ko fɛ sɛrɛ, Ko ’wii tɛrɛ ta fɔɔ Nofak, Fɔɔ Médéba.

³¹ Izraɛlnu nyana kli Amorénu lé tɛrɛ la.

³² Moizi munu nwunvɔ Jaézɛɛ mavɔɔle we ma, yé wo alé tɛrɛla flanu si, yé Amorénu lé wo ke ana, wo wo bin.

³³ Wo nɔla, yé wo gié Bazan lé zi ta. Bazan nwiinzan Ɔg bɔra zi dɔle a lee we gi, yee valé élé munu faa nya, gulidanle wo va we gi Édréi.

³⁴ Gakelebale lé Moizi lɛ léé: Té i kana a lee pelo, maa dan a pa lɛ i lee, yee koo, alé munu faa koo, alé tɛrɛ koo, wo nya; wean bé kɛlɛ Amorénu nwiinzan Sioni lé ke Esibɔn, a lɛ, yee duo lé i dan a kɛlɛ lɛ wo lɛ.

³⁵ Yé wa gyɛ, yee valé é benu valé alé munu faa nya. A kiéné do ’ka so lɛ a ta lo, yé wo alé tɛrɛ si.