Mi Nɔnɔle 19 - Kazambale lé Sebe Sauunu 1979

Gbamblɛ dirida

¹ Gakelebale lé Moizi valé Arɔn lɛ léma:

² Bélidɔwe lé maa Gakelebale a nɔ ka lɛ, yee lé ke ’ko: Bé fe Izraɛlnu lɛ léma: Dirida gbamblɛ do lé, gun ’ka a ma lo, ’té fɛ do kpen ’ka a kɔlɛ ma lo, ’té é ’ka tan nyanama vinin pa lɛ lo, ’wo da a nya.

³ ’Ka a nɔ Balebanzan Éléazaa lɛ, yé é go a nya fla gini ma, yé wa bɔrɔ bo a yuɛ va.

⁴ Balebanzan Éléazaa ’é bɛnwɔlɛ vɔ diri nyɛ va yé ’é a nwɛɛn zén‐ékevasɔkɔn ’léé gɔnɔ sɔrafié.

⁵ É a lé wo diri kyɛ ble a yuɛ va; a kɔlɛ koo, a wi koo, a nyɛ koo, a bo koo, wa kyɛ ble ma.

⁶ Sɛdrɛyili koo, izopéyili koo, sɔ sɔɔn koo, Balebanzan ’é wo si yé ’é wo vuli kyɛ lé é ke diriwi blena, a va.

⁷ Balebanzan é dan élé varɔnu zuru lɛ yé ’ébozen zuru, ’bɛ zuo yé ’é da fla. É dan vo lɛ fɔɔ nyanadi, ’té é ’ka tegele lo.

⁸ Mian é diri kyɛ ble, ’élé varɔ zuru yé ’ébozen zuru yé é dan vo lɛ fɔɔ nyanadi, ’té é ’ka tegele lo.

⁹ Gɔné tegele do ’é diriyee sia, yé ’é go a nya fla gini ma, fɛna zin do na; ’wa tadɔ Izraɛl lé munu zé nya, léé, ’wa zén ’yi va yé ’é kɛlɛ mi kɛlɛ tegelefɛ nya. É a wenyané ’yibofɛ do nya.

¹⁰ Mian é diriyee sia, ’élé varɔnu zuru, yé é dan vo lɛ fɔɔ nyanadi, ’té é ’ka tegele lo. É a bélidɔwe lé é ’ka nyaan lo, a nya, Izraɛlnu valé wo va bɛnnu zé nya.

Mi kɛlɛ tegele ’yi

¹¹ Dé é a migaleoo migalean nya, mian é mane migale ma, é ’ka dan kɛlɛ lɛ tegele lo, fɔɔ yi sɔrafié.

¹² É a lé é zuru yee ’yi ’ko nya a yi yaazan valé a yi sɔrafiézan nya, yé é dan kɛlɛ lɛ tegele; naa, dé é ’ka zuru lɛ a yi yaazan valé a yi sɔrafiézan nya lo, ’té é ’ka dan kɛlɛ lɛ tegele lo.

¹³ Mian mane migale ma, yé é ’ka ’ébo kɛlɛ lɛ tegele lo, ’té é Gakelebale lé sɔkɔn sɛrɛ; ’wo ’bɛzan si Izraɛlnu va ma. É ’ka mi kɛlɛ tegele ’yi zén lɛ ’é ta lo; é ’ka tegele lo; a tiri a tan, azama.

¹⁴ Bélidɔwe lé ke ’ko: dé mi do ga sɔkɔn do gi, dé miomian wɔra ’bɛ kɔn gi, é valé miomian ke kɔn gi yé mi ga a va mi, wo fiénu ’ka tegele lo fɔɔ yi sɔrafié.

¹⁵ Bɔ faa lé ke kɔn gi, ’té wo lɛla ’ka é vɔle lo, wo sɛrɛ.

¹⁶ Dé miomian é ke féi, yé é mane mi lé wa gyɛ gwɔun nya, dé yee léé, dé migale pla léé, dé migale wɔlɛ léé, dé mi vun léé, a ma, é ’ka dan kɛlɛ lɛ tegele lo fɔɔ yi sɔrafié.

¹⁷ Mian é ’ka tegele lo, yee dirida lé wa kyɛ ble bɛ, ’wa yee si yé wa zén ’yi zin va bɔ gi.

¹⁸ Mi tegele do ’é izopéyili si ma, yé ’é a wɔra yee ’yi va; yé ’é a nwɛɛn sɔkɔn koo, a gi nyanamapafɛnu faa koo, munu lé ke ana koo, dé miwɔlɛ léé, mi lé wa gyɛ, dé yee léé, dé migale léé, dé mi vun léé, mian mane a ma, ’bɛzan koo, wo ta.

¹⁹ Mian é ke tegele, é dan ’yi zén lɛ mian é ’ka tegele lo, a ta, a yi yaazan valé a yi sɔrafiézan nya, yé é dan kɛlɛ lɛ tegele a yi sɔrafiézan nya. ’É ’élé sɔnu zuru, yé ’ébo zuru; yé é nyanadi é dan kɛlɛ lɛ tegele.

²⁰ Mi lé é ’ka tegele lo yé é ’ka zuru lɛ lo, é a lé wa si zén‐ékevamunu va, naa, é Gakelebale lé fɛna sauun sɛrɛ. Wo ’ka mi kɛlɛ tegele ’yi zén lɛ a ta lo, amalé é ’ka tegele lo.

²¹ We ’ko é dan kɛlɛ lɛ bélidɔwe lé é ’ka nyaan lo, a nya wo lɛ. Mi lé é mi kɛlɛ tegele ’yi zén mi ta, ’élé varɔnu zuru, yé mian mane mi kɛlɛ tegele ’yi ma, é ’ka tegele lo fɔɔ nyanadi.

²² Fɛ faa lé é mane mi lé é ’ka tegele lo, a ma, ’bɛnu sɛrɛ, yé mi lé ’bɛ mane a ma, ’bɛ ’ka tegele lo fɔɔ nyanadi.