Mi Nɔnɔle 18 - Kazambale lé Sebe Sauunu 1979

Balebanzannu valé Lévinu pa nyanama

¹ Gakelebale lé Arɔn lɛ léé: Bii valé i benu, ’é valé i tra lé kɔngimunu, weplenu lé wa kɛlɛ fɛna sauun na, wo dan wo we dɔ lɛ ka nwiin; bii valé i benu lé é ke i va, weplenu lé wa kɛla balebannyanama pana, wo dan wo we dɔ lɛ ka nwiin.

² I bwenu lé wo ke Lévi bɛnnu nya, i ti bɛnnu nya, ’i wo bié i va, léé, wo pa i va yé wo ilé nyanama pa, bléyian va lé bii valé i benu ke wenayefɛ pagi sɔkɔn ’lɛ.

³ ’Wo i déretawenu kɛlɛ ma, é valé sɔkɔn gi nyanama faa lé, naa, té ’wo bié fɛna sauun lé nyanamapafɛnu valé balebanna ma lo, dé ka valé wonu é da ga.

⁴ ’Wo vo é pale i va ma, yé nyanama faa lé é a lé wa pa zén‐ékevasɔkɔn zé nya bɛ, ’wo a tawe kɛlɛ. Té bɛn do kpen é bié ka va lo.

⁵ We lé é ke fɛna sauun valé balebanna zé nya, ’ka wo tawe kɛlɛ, léé, té Bale bli é fli é dɛrɛ Izraɛlnu ma lo.

⁶ Bé ye, maa i bwe Lévinu si Izraɛlnu va. Wa maa, Gakelebale zé nya, yé maa wo nɔ ka lɛ blɛ nya, léé, ’wo zén‐ékevasɔkɔn gi nyanama pa.

⁷ Bii valé i benu lé wo ke i va, ’ka kalé Bale gi nyanama pa, dé é a balebanna lé nyanama faa nyaoo, dé é a sɔkɔnmi zi lé nyanama nyaoo, ’ka a pa. Nyanama lé é a lé ka a pa, yee lé ke bɛ. Maa balebannyanama nɔ ka lɛ blɛ zin nya. Dé bɛn bié a ma, wo dan a gyɛ lɛ.

⁸ Gakelebale lé Arɔn lɛ léé: Bé ye, fɛnu faa lé Izraɛlnu wo pa é yɛrama anzé nya, maa wo va fɛ kenu nɔ i lɛ, yee lé ke fɛnu lé wa nɔ an lɛ a nwale valé a tuale nya, wo nya. Maa wo nɔ bii valé i benu zé dɔna nya, nyɔnɔ zénle ka ta we ma. É a ka dɔna nya lɛɛfaama.

⁹ Bale ’lɛfɛnu lé wo ’ka wo kyɛ blé lo, wo va fɛnu lé wo dan kɛlɛ lɛ izé nya, yee lé ke ’ko: wolé balebanfɛnu faa koo, wolé blɛfɛnu faa koo, wolé wenyané ’yibo saraka faa koo, wenyaa saraka faa lé wa bo an lɛ koo, woo lé; Bale ’lɛfɛnu ’ko, wo dan kɛlɛ lɛ bii valé i benu zé nya.

¹⁰ ’Ka wo ble fɛna tinle do na; ka gɔnénu faa a ble. ’Ka wo ye Bale ’lɛfɛnu nya ma.

¹¹ Fɛnu lé wo dan kɛlɛ lɛ kazé nya é ziin, woo lé ke ’ko: blɛfɛnu faa lé Izraɛlnu é dan da lɛ wo nya yé wo wo nɔ an lɛ wo nwale valé wo tuale nya, ’bɛ valé yee lé i wo dia é bɛ fié la, maa wo nɔ bii koo, i benu valé i lunu koo, ka lɛ; é a kazé dɔna nya lɛɛfaama. Dé é a ilé kɔn gi miomian nya, dé azan a tegele, ’bɛzan a ble ma.

¹² Féifɛ vininzannu lé woo maa, Gakelebale baan wo nya, maa wo nɔ i lɛ, woo valé nyɔnɔ zin baba faa koo, dɔrɔ dɛrɛ zin baba faa koo, buruwɔlɛ zin baba faa koo, woo lé.

¹³ Wolé féifɛ vininzannu lé wo da wo nya maa, Gakelebale lɛ, wo dan kɛlɛ lɛ izé nya. Dé é a ilé kɔn gi miomian nya, dé azan a tegele, ’bɛzan a ble ma.

¹⁴ Fɛ faa lé Izraɛlnu a nɔ bale pale a ma nya, wo dan kɛlɛ lɛ izé nya.

¹⁵ Naa, we do ana, é a lé wo blami lé né vininzannu tabo, yé wi lé wo ’ka a blé lo, ’wo wolé né vininzannu tabo.

¹⁶ Dé yee lé ’bɛ moné do bɔ, é a lé wo wo tabo gɔɔlifu sikla soru nya, fɛna sauun lé sikla yɛrama, yee lé é ke géra gɔɔli yɔ do nya.

¹⁷ Naa, dé é a diriné vininzan nyaoo, dé é a ’blané vininzan nyaoo, dé é a boliné vininzan nyaoo, té ’wo wo tabo lo. ’I wo nyɛ zana balebanna ta, yé ’i wo nyɔnɔ kyɛ ble; é a saraka lé wa kyɛ blé, ’té Gakelebale a gin sié néné, a nya.

¹⁸ Wo wi é dan kɛlɛ lɛ izé nya, ’bɛ gi léé, a tɔn lé wa diaan é bɛ fié la, yee valé a bɛyi bɛapaboro nya.

¹⁹ Balebanfɛnu faa lé Izraɛlnu é dan Gakelebale ban lɛ wo nya wo nwale valé wo tuale nya, maa a nɔ i lɛ, bii koo, i benu valé i lunu koo, ka lɛ. É a kazé dɔna nya lɛɛfaama. É a gipawe lé é ’ka sɛra lo, ’té a glɛ ’ka lo, a nya, Gakelebale ’lɛ, bii valé i kulunu zé nya.

²⁰ Gakelebale lé Arɔn lɛ léé: Té wolé tɛrɛlafɛ do kpen é kɛlɛ izé nya lo; ilé zarafɛ ’ka dan kɛlɛ lɛ wo va lo. Maa ɛ ke izé nya, ilé tɔnɔ nya Izraɛlnu va.

²¹ Maa Izraɛl lé fɛvuzan faa nɔ Lévi benu lɛ wozé nya, nyanama lé wa paan zén‐ékevasɔkɔn gi, a ma ban nya.

²² Té Izraɛlnu é bié zén‐ékevasɔkɔn ma é dɛrɛ lo, dé wo da wenyané dɔ ’wobo nwiin yé wo ga.

²³ Lévinu woo zén‐ékevasɔkɔn gi nyanama paan, amalé munu lé weple é dan vo lɛ wo nwiinwe nya. Wozé fɛ ’ka dan kɛlɛ lɛ Izraɛlnu va lo; we ’ko é dan vo lɛ bélidɔwe do lé é ’ka nyaan lo, a nya, i kulunu va.

²⁴ Fɛvuzannu lé Izraɛlnu é dan a nɔ lɛ Gakelebale lɛ wo nwale valé wo tuale nya, maa a nɔ Lévinu lɛ wozé nya; bɛwemalé maa lé wolé we ma léé, té wozé fɛ é kɛlɛ Izraɛlnu va lo.

Lévinu lé fɛvuzan nɔle

²⁵ Gakelebale lé Moizi lɛ léma:

²⁶ Bé fe Lévinu lɛ léma: Izraɛlnu lé fɛvuzannu lé maa a nɔ ka lɛ wo bɛ nya, ’té ka a ye kazé fɛ nya bɛ, ’ka Gakelebale ban a va fɛvuzan nya;

²⁷ yé fɛ lé ka Bale baan a nya, maa dan a ye lɛ bélé kalé ’sa sunwona ’sa vinin zo, é valé dɔrɔ dɛrɛ lé wa koli dɔrɔ borona, a zo.

²⁸ A zo lé fɛvuzannu faa lé ka a ye Izraɛlnu va, ’ka balebanfɛ si a va, yé fɛ lé ka si a va yé ka Bale ban a nya bɛ, ’ka a nɔ Balebanzan Arɔn lɛ.

²⁹ Blɛ faa lé wo dan a kɛlɛ lɛ ka lɛ, ’ka Gakelebale banfɛ si a va; fɛ zima baba faa, ’ka Bale zé si a va, ’ka pa é yɛrama.

³⁰ Bé fe wo lɛ léma: Dé ka fɛ zima baba si a va, a pɔnénu é dan vo lɛ Lévinu lɛ bélé wolé ’sa sunwona fɛ zo, é valé dɔrɔ borona gi dɔrɔ zo.

³¹ Dé é a fɛofɛanna nya, ’ka a ble ana, ka valé kalé kɔngimunu nya; naa, nyanama lé ka ke a pana zén‐ékevasɔkɔn gi, é a a maban nya.

³² Wo ’ka dan we do kpen dɔ lɛ ka nwiin ’bɛ lé we ma lo, ’té dé ka a zin baba si a va. Té ka Izraɛlnu lé balebanfɛ boennu ye fɛ pla nya lo, dé ka da ga.