Mi Nɔnɔle 17 - Kazambale lé Sebe Sauunu 1979

Arɔn lé yili

¹ Gakelebale we fe Moizi lɛ yé é léé:

² ’I we fe Izraɛlnu lɛ, yé ’i tawomayili si wo tranu gɔnɔ gi do do, ’bɛ gi léé, wo nwiinzannu a nɔ vu ta fié, wo tranu gɔnɔ yɛrama.

³ ’I wo tɔ gyɛ wolé tawomayili ma do do, yé ’i Arɔn tɔ gyɛ Lévi lé yili ma, naa, é a lé kɔn do do nwiinzan zé é kɛlɛ do do.

⁴ ’I wo pla zén‐ékevasɔkɔn gi, wenayekɛsu lé maa valé ka éé keeé ana, a ’lɛ.

⁵ Mi lé alé tawomayili é vwi bi, maa dan a si lɛ a va, yé maa dan Izraɛlmunu lé gun gyɛle nyaa lɛ.

⁶ Moizi we fe Izraɛlnu lɛ, yé wo nwiinzannu faa do do ’wolé tawomayili nɔ a lɛ, ’wo tranu lé kɔnnu yɛrama, minwiinzan do, tawomayili do, ’bɛ gi léé, tawomayili vu ta fié lé. Arɔn zé a wo va.

⁷ Moizi tawomayilinu pla Gakelebale ’lɛ, wenayefɛ pagi sɔkɔn gi.

⁸ ’Bɛ é tu kini, Moizi wɔra bléyian va wenayefɛ pagi sɔkɔn gi, bé ye, Arɔn lé tawomayili, yee lé ke Lévi lé kɔn zé nya, é puru dɔ, é nɛɛ, a vwi bi, yé amandéwɔlɛnu tana a ma.

⁹ Moizi tawomayilinu faa sia Gakelebale ’lɛ, yé é go wo nya Izraɛlnu va, wolé wo yele we ma, é valé wo faa do do lé wolé tawomayili sile we ma.

¹⁰ Gakelebale lé Moizi lɛ léé: ’I go Arɔn lé tawomayili nya é pa gi, wenayekɛsu ’lɛ, bé tadɔ ’bɛna yé ’é kɛlɛ tɔmase nya Izraɛlnu lé nwamimazannu lɛ, léé, ’wo daan gungyɛle ma an ma, té ’wo ga lo we ma.

¹¹ Moizi a kɛlɛ a zo. Dére lé Gakelebale a fe a lɛ, é a tawe kɛlɛ.

¹² Izraɛlnu lé Moizi lɛ léé: Bé ye, ko a gana, ko a zamaga wona. Ko faa a zamaga wona.

¹³ Dé miomian é bié Gakelebale lé sɔkɔn ma, ’bɛ éé gaan, ’naan, é a lé ko faa ’é gaa?