Mi Nɔnɔle 16 - Kazambale lé Sebe Sauunu 1979

Korénu nwa Bale ma

¹ Lévi be Kéat be Jiséaa be Koré nwa Moizi ma. Éliab benu Datan valé Abiram koo, Pélɛt be On koo, wo ɛ pa a va. Woo mi yaa ’ko a Rubɛn kululazannu nya.

² Wo nwa Moizi ma, ’wo valé Izraɛlnu wuru do yɔ fié wɔlɛ vu nya; ’bɛnu a mi blɛnnu nya, wa weplamilɛmunu nya, tɔ blɛnzannu nya.

³ Wo nwa Moizi valé Arɔn ma, yé wo lé ’bɛnu lɛ léé: Kazé sɔ. Naa, munu faa a segele, yé Gakelebale a wo méléna. Mɛmalé ka kabo nwaan blɛn Gakelebale lé munu nwiin?

⁴ Moizi dére ’ko ’ma aan wo, é dia é bli la.

⁵ É lé Koré valé é vamunu lɛ léma: Tɛlɛ, mi lé é ke Gakelebale zé nya, yé mi lé é ke mi segele nya, Gakelebale é dan a gɔɔn lɛ, yé é dan ’bɛzan bié lɛ ’é ma; mian é a si ’ézé nya, é dan ’bɛzan bié lɛ ’é ma.

⁶ ’Ka kɛlɛ ’ko zo: Koré valé é vamunu, ’ka faa kyɛnyɛsibɔ si do do.

⁷ Tɛlɛ, ’ka kyɛnyɛ zén wo gi, yé ’ka lasikɔrɔpo pla a ta Gakelebale ’lɛ; mian Gakelebale a si a va, yee mi ’ko é dan kɛlɛ lɛ segele. ’Kaa Lévimunu, kazé sɔ.

⁸ Moizi lé Koré lɛ léé: ’Kaa Lévinu, ’ka tɔné dɔ ma.

⁹ Izraɛlnu lé Bale ka si Izraɛl munu va, yé é ka bié ’é sɔnɔ, léé, ka kɛlɛ Gakelebale lé sɔkɔn gi nyanamapazannu nya, yé ka dɔ munu ’lɛ Gakelebale bɔzannu nya, ’bɛ a we kiéné nya ka yuɛii?

¹⁰ É ka bié ’é sɔnɔ, bii valé i bwenu faa lé, ka ke Lévinu nya, wo nya, yé ka bli bɔ é ziin balebannyanama maa?

¹¹ ’Bɛ lé we ma lé bii valé i vamunu faa, ka zén ékeva Gakelebale ma. Naa, de ɛ ke Arɔn nya yé ka gun gyɛ a maa?

¹² Moizi mi nwunvɔ Éliab benu Datan valé Abiram laana, naa, wo léé: Ko ’ka gona lo.

¹³ I ko si tɛrɛ nyɔnɔzan ta, léé, ko ga bwi gi, ’bɛ ’ka i yuɛ gi bɔ lɛ loo? ’Té i a duowo é plale ko nwiin?

¹⁴ I ’ka go lɛ ko nya tɛrɛ nyɔnɔzan ta lo; i ’ka féinu valé dɔrɔféinu nɔ lɛ ko lɛ lo. É a i gi léé, i munu ’ko yuɛ ’wii é woo? Ko ’ka gona lo.

¹⁵ Moizi bli fli é baba, yé é lé Gakelebale lɛ léé: Dé wo i ban fɛan nya, té bé si lo. Maa ’ka fɛ do boen si lɛ wo lee lo, dé é a sokofale do nyaoo, maa ’ka a do kpen si lɛ wo lee lo, yé an ’ka wenaané kɛlɛ lɛ wo va mi do lɛ lo, azama.

¹⁶ Moizi lé Koré lɛ léé: Bii valé i vamunu, ’ka dɔ Gakelebale ’lɛ tɛlɛ; bii koo, wo koo, Arɔn koo, ka lé.

¹⁷ Ka faa do do ’ka kyɛnyɛsibɔ si; ’ka lasikɔrɔpo pla a ta, yé ka faa do do ’ka da kalé kyɛnyɛsibɔ nya Gakelebale ’lɛ. Kyɛnyɛsibɔ é dan kɛlɛ lɛ mi wuru do yɔ fié wɔlɛ vu lee. Bii valé Arɔn, ’ka kazé kyɛnyɛsibɔ si do do é ziin.

¹⁸ Wo ’wolé kyɛnyɛsibɔ sia do do, wo kyɛnyɛ zén a gi, yé wo lasikɔrɔpo pla a ta, yé wo dɔ loru zén‐ékevasɔkɔn ’léé, wo valé Moizi valé Arɔnnu nya.

¹⁹ Yé Koré munu faa laa léé, ’wo nwa Moizi valé Arɔn ma, zén‐ékevasɔkɔn ’léé. Tɔɔn, Gakelebale lé fuasan bɔra zén‐ékevamunu faa yuɛ va.

²⁰ Yé Gakelebale lé Moizi valé Arɔn lɛ léé:

²¹ ’Ka si munu ’konu va, ’ka si wo méléna, yé maa dan wo gyɛ lɛ bléyi do kpen nya.

²² Moizinu dia ’wo bli la, yé wo léé: Oo Bale, munu faa lélinu lé Bale, mi do kpen wenyané kɛlɛ yé i bli fli munu faa maa?

²³ Gakelebale we fe Moizi lɛ yé é léé: Bé fe munu faa lɛ léé,

²⁴ ’wo si Koré koo, Datan koo, Abiram koo, wo nyanana ma yé ’wo gyɛ ’wo zuo wo ma baa.

²⁵ Moizi nwa yé é go Datan valé Abiram vazia. Yé Izraɛl lé mi segelenu go a zuo.

²⁶ É lé zén‐ékevamunu lɛ léé: ’Ka si mi nyanénu ’konu lé sɔkɔnnu ma baa; fɛ lé é ke wozé nya, té ka mane a do kpen ma lo, dé ka da zamaga wo bléyian va lé wo we lɛdɔ wo gi wolé wenyanénu faa ma, a bléyi va.

²⁷ Yé wo gyɛ ’wo zuo, Koré koo, Datan koo, Abiram koo, wolé sɔkɔnnu ma baa. Datan valé Abiram bɔra yé wo dɔ ’wolé sɔkɔnnu ’léé, ’wo valé ’wo nanu koo, ’wo benu koo, ’wo nénénu koo, woo lé.

²⁸ Moizi léé: We ’ko ma lé ka dan a gi dɔɔ lɛ léé, Gakelebale an nwunvɔ we ’konu faa kɛlɛle we gi; maa ’ka wo kɛlɛna anbo ’wuo gi lo.

²⁹ Dé munu ’ko ga mi faa gabɛ gi, dé wean éé bɔa munu faa ma, dé é bɔ wo ma, ’té Gakelebale ’ka an nwunvɔ lɛ lo;

³⁰ naa, dé Gakelebale we dɛrɛ blɛɛn kɛlɛ, dé tɛrɛ ’é ’léé lɛ so yé é munu ’ko mini, wo valé wo leefɛnu faa nya, dé wo zun gamunu nyanana é yuɛma, ’té ka dan a gi dɔɔ lɛ léé, munu ’ko serele bo Gakelebale ma.

³¹ Dé é nyaa dére ’konu fele nya tɔɔn, tɛrɛ lé ke wo wuo, a fee bo.

³² Tɛrɛ ’é ’léé lɛ so yé é wo mini, wo koo, wolé kɔnnu koo, Koré lé munu faa koo, wolé fɛnu faa koo, woo lé.

³³ Wo zun gamunu nyanana é yuɛma, wo valé wo leefɛnu faa nya; yé tɛrɛ lɛ tan wo ta, yé wo san zén‐ékevamunu méléna.

³⁴ Izraɛlnu faa lé é ke é dirile wo zi, wo fwi wo siaale we ma, yé wo léé: Kaa fwi! dé tɛrɛ é da kaa mini!

³⁵ Yé kyɛ do si Gakelebale va, yé mi wuru do yɔ fié wɔlɛ vu lé woo Bale baan lasikɔrɔ nya, é wo ble.

³⁶ Gakelebale we fe Moizi lɛ yé é léé:

³⁷ Bé fe Balebanzan Arɔn be Éléazaa lɛ léé, ’é kyɛnyɛsibɔ si kyɛ va, yé kyɛ lé é ke wo gi, ’é a zana baa, naa, wa é pale é yɛrama.

³⁸ Munu lé wobo bɔra gale lɛ wolé wenyané ma bɛ, ’i wolé kyɛnyɛsibɔnu si, yé ’i wo panu dɔ yé ’i wo bua balebanna ta. Wo wo dɔ Gakelebale ’lɛ, yé wo wo pa é yɛrama Bale zé nya, amalé wenu lé wo bɔ, wo dan kɛlɛ lɛ wo sele dɔ Izraɛlnu gifɛnu nya.

³⁹ Munu lé kyɛ wo ble, Balebanzan Éléazaa wolé kyɛnyɛsi zénébɔnu si, yé é wo pa dɔ yé é wo bua balebanna ta.

⁴⁰ É a we sele dɔ Izraɛlnu gifɛ nya, léé, munu lé wo ’ka Arɔn bɛn gi munu nya lo, té wo va mi do kpen é bié Gakelebale banle lasikɔrɔ nya we ma lo; té wolé we é kɛlɛ bélé Koré valé é vamunu zé zo lo we ma, we lé Gakelebale a fe Moizi lɛ, a yɛrama.

Arɔn munu si we gi

⁴¹ ’Bɛ é tu kini, Izraɛlmunu gun gyɛ Moizi valé Arɔn ma, a fele nya léé: Ka ɛ Gakelebale lé munu gyɛ.

⁴² Zén‐ékevamunu wo péli vɔ do bléyian va Moizi valé Arɔn ma, yé wo yuɛ vɔ zén‐ékevasɔkɔn vazia, bé ye, lati bua a ta, yé Gakelebale lé fuasan bɔra.

⁴³ Moizi valé Arɔn bɔ zén‐ékevasɔkɔn ’léé.

⁴⁴ Yé Gakelebale we fe Moizi lɛ yé é léé:

⁴⁵ ’Ka si zén‐ékevamunu ’ko méléna, yé maa wo ble kyɛ nya é nya do. Wo dia ’wo bli la, yé Moizi lé Arɔn lɛ léé:

⁴⁶ ’I kyɛnyɛsibɔ si, yé kyɛ lé é ke balebanna ta, bé ke si, bé zén a gi, yé i lasikɔrɔpo pla a ta, yé ’i go zén‐ékevamunu vazia é nya do, yé ’i wolé wenyané ’yibo; naa, Gakelebale fuo wo ma yé migyɛgyɛ kun mi gyɛle ma tɛkɛ.

⁴⁷ Arɔn zénébɔ si, fɛan zo lé Moizi a fe, a zo, yé é vlan buru zén‐ékevamunu méléna, yé bé ye, migyɛgyɛ mi gyɛle péli sia. É Bale ban lasikɔrɔ nya, yé é munu lé wenyané ’yibo.

⁴⁸ Arɔn dɔ mi galenu valé mi yuɛmalenu méléna, yé migyɛgyɛ dɔ.

⁴⁹ Munu lé migyɛgyɛ ’ko wo gyɛ, wa mi baa sɔrafié wuru yaa yɔ soru; munu lé wo ga Koré lé we ma, ’bɛnu a é yɛrama.

⁵⁰ Arɔn go é pa gi Moizi va, zén‐ékevasɔkɔn ’léé. Migyɛgyɛ dɔ.