Mi Nɔnɔle 15 - Kazambale lé Sebe Sauunu 1979

Sarakanu lé we

¹ Gakelebale we fe Moizi lɛ yé é léé:

² Bé fe Izraɛlnu lɛ léma: Dé ka wɔra tɛrɛ lé maa a nɔ ka lɛ ka nyanana nya bɛ, a ta,

³ yé saraka lé wa kyɛ blé, dé ka a bo Gakelebale lɛ, dé é a balebanwi lé wa kyɛ blé, a nyaoo, dé é a Bale kunle gifɛ nɔle nyaoo, dé é a bli drɔɔ blɛ nyaoo, dé ’bɛ kaan lo, dé é a kalé fɛti nyaoo, yé dé kalé wi blɛn léé, dé kalé wi kiéné léé, dé ka a kyɛ ble, yé Gakelebale a gin si néné we ma,

⁴ mian é da Gakelebale ban lɛ, é a lé é da burupun zima suoné do lé wa vɔɔ nyɔnɔ litré do nya, a nya,

⁵ yé ’i dɔrɔ litré do kɛlɛ baleban’yi nya, yé dé ’blané do kɛlɛ balebanwi lé wa kyɛ blé, a nyaoo, dé saraka bo ’blané do léoo, ’wo baleban’yi ’ko nɔ wo do do va.

⁶ Dé é kɛlɛ ’blagɔné do nya, ’i da burupun zima suoné fié lé wa vɔɔ nyɔnɔ litré do é buu nya, a nya;

⁷ ’i dɔrɔ litré do é buu si yé ’é kɛlɛ baleban’yi nya, yé Gakelebale é blɛ ’ko gin si néné.

⁸ Dé i Bale ban diriné do nya, dé a kyɛblele léé, dé Bale kunle gifɛ nɔle léé, dé Gakelebale bɔvɔ saraka léé,

⁹ burupun zima suoné yaa lé wa vɔɔ nyɔnɔ litré fié nya, é a lé wo Gakelebale ban yee valé diriné nya,

¹⁰ yé ’i dɔrɔ litré fié kɛlɛ baleban’yi nya; é a saraka lé kyɛ a blé, ’té Gakelebale a gin sié néné, a nya.

¹¹ A zo lé é a lé wa kɛlɛ, dé dirigɔné do do léé, dé ’blagɔné do do léé, dé ’blané do do léé, dé boliné do do léé, wo nya.

¹² ’Ka kɛlɛ ’bɛ zo kalé balebanwinu faa lɛ, wo ’léé yɛrama.

¹³ Munu lé wo wo yaa tɛrɛ ’ko la, dé wo Bale ban, saraka lé wa kyɛ blé, a nya, ’té Gakelebale a gin sié néné, ’wa kɛlɛ yee ɛ zo ma.

¹⁴ Dé é a bɛn nya, yé éé nyanaan ka va, dé ’bɛ kaan lo, dé é dan nyana lɛ ka va é voéla, dé é a fe léé, ’é Bale ban saraka lé wa kyɛ blé, ’té Gakelebale a gin sié néné, a nya, ’é a ban kazé banbɛ gi.

¹⁵ Munu faa lé bélidɔwe ’é kɛlɛ do ma; ka koo, bɛnnu lé wo ke ka va koo, we ’ko ’é kɛlɛ bélidɔwe lé a glɛ ’ka lo, a nya, ka nénénu zé nya ma; ka valé bɛnnu lé we a do Gakelebale yuɛ gi.

¹⁶ Kalé bélidɔwe valé ka sɔnné é dan kɛlɛ lɛ do ka valé bɛnnu lé ke ka va, kazé nya.

¹⁷ Gakelebale we fe Moizi lɛ yé é léé:

¹⁸ Bé fe Izraɛlnu lɛ léma: Dé ka bɔ yian ma tɛrɛ lé maa dan ka wɔra lɛ a ta, ana,

¹⁹ yé dé ka tɛrɛ ’ko lé fɛ ble, ’ka maa Gakelebale, ban fɛ nya.

²⁰ ’Ka buru do kɛlɛ kalé buruyɔɔ vininzan nya yé ’ka a nwa an ’lɛ; ’ka a nɔ bélé fɛan zo lé ka ’sa vininzan no, a zo.

²¹ ’Ka maa, Gakelebale ban kalé buruyɔɔ vinin nya, lɛɛnu lé wo dan bɔ lɛ bɛ, wo gi.

²² Dé ka wenyané kɛlɛ ka tanyila, yé bélidɔwe sɔnnénu lé maa, Gakelebale a gɔɔn Moizi lɛ, yé ka ’ka wo pa lɛ lo,

²³ dére faa lé Gakelebale a fe ka lɛ Moizi lɔlu nya, a péli sia yian nya lé maa, Gakelebale, an sɔnnénu nɔ ka lɛ, ’bɛ valé ’bɛ zuo lɛɛnu lé wo dan bɔ lɛ bɛ, wo gi, dé ka ’ka wo ta tawo lɛ lo,

²⁴ dé mian wenyané kɛlɛ é tanyila, ’té munu ’ka a gi dɔɔa lo, dé wa ’ma, munu faa é dan maa Gakelebale ban lɛ diriboroné do lé wa kyɛ blé, ’té maa Gakelebale a gin sié néné, a nya; ’ka an ban’yi pa a va, a sɔnné lé wa fe, a yɛrama; yé ’wo maa Gakelebale ban boligɔné do nya wenyané ’yibofɛ nya é ziin.

²⁵ Balebanzan é dan Izraɛlnu faa lé wenyané ’yibo lɛ, yé é wo ma we vo. Naa, wo wenyané kɛlɛ ’wo tanyila, yé wo balebanfɛ nɔ, saraka lé wa kyɛ blé Gakelebale lɛ, a tɔ bɔle we ma, a nya; wo wenyané ’yibofɛ nɔ maa Gakelebale lɛ, wenyané lé wa kɛlɛ ’wo tanyila, alé we ma.

²⁶ Izraɛlmunu valé bɛnnu lé woo nyanaan wo va bɛ, maa dan wo ma we vo lɛ, naa, munu faa wenyané kɛlɛ ’wo tanyila, azama.

²⁷ Dé mi do kpen wenyané kɛlɛ é tanyila, ’é Bale ban, bolida do lé a lɛɛ ke do, a nya, élé wenyané ma.

²⁸ Mi lé é wenyané kɛlɛ é tanyila, Balebanzan é dan alé wenyané ’yibo lɛ Gakelebale ’lɛ; dé é wenyané ’yibofɛ nɔ, ’té maa dan a ma we vo lɛ.

²⁹ Dé mian wenyané kɛlɛ é tanyila, dé é a Izraɛl mi nyaoo, dé é a wo va bɛn nyaoo, kalé bélidɔwe a do.

³⁰ Naa, dé tɛrɛlazan léé, dé bɛn léé, dé mi do we kɛlɛ yuɛma plɛplɛ nya, é maa Gakelebale sɔnɔ; é a lé wo mi ’ko si alé munu va.

³¹ É serele bo maa, Gakelebale dére ma; é maa, Gakelebale sɔnnénu sɛrɛ; ’wo ’bɛzan si wo va ma; alé weple a abo nwiin.

Flinyi sɔnné sɛrɛle ma we lɛdɔle

³² Bléyian va le Izraɛlnu a bwi gi, wo bɔ gɔné do ma kyɛ siana flinyi nya.

³³ Munu lé wo bɔ a ma kyɛ siana, wo da a nya Moizi koo, Arɔn koo, Izraɛl munu faa koo, wo va.

³⁴ Wa vɔ kɔn gi; we lé wo dan a kɛlɛ lɛ a lɛ, wo ’ka tan a fe lɛ lo, azama.

³⁵ Gakelebale lé Moizi lɛ léé: ’Wa gyɛ, ’é ga; munu faa é dan a gyɛ lɛ gɔlɛ nya sɔkɔn dɔna nwun zi.

³⁶ Munu faa go sɔkɔn dɔna nwun zi, yé wa gyɛ gɔlɛ nya, yé é ga, Gakelebale dérean fe Moizi lɛ, a yɛrama.

³⁷ Gakelebale lé Moizi lɛ léé: Bé fe Izraɛlnu lɛ léma:

³⁸ ’Wo pɛɛ gyɛ sɔ lɛi, glayivayou kununu nya, yé wa lɛi vwi dɔ. ’É kɛlɛ ka kululawe nya.

³⁹ Dé varɔ lɛi vwizan ’ko a ka ta, ’ka a nagini, yé maa, Gakelebale lé bélidɔwe sɔnnénu faa sele ’é dɔ ka gi ma, ’té ka wo ta tawo, yé ’té ka ’ka go kalé blibɔmawenu valé yuɛbɔmawenu zuo lo, dé wo da ka sia ana yé ka yuɛ gi é blan anlé we ma.

⁴⁰ ’Bɛ nya lé anlé bélidɔwe sɔnnénu sele é dan dɔ lɛ ka gi, ’té ka wo ta tawo, yé ka dan kɛlɛ lɛ kalé Bale zé nya.

⁴¹ Maa a Gakelebale, kalé Bale nya, maa ɛ ka si Éjipiti tɛrɛ la, an kɛlɛle kalé Bale nya we ma. Maa a Gakelebale, kalé Bale nya.