Mi Nɔnɔle 14 - Kazambale lé Sebe Sauunu 1979

Izraɛlnu gun gyɛ

¹ Zén‐ékevamunu ’wo dére nwa yé wo siaa plɛplɛ, yé wo tu kini wuvɔle nya.

² Izraɛlnu faa kun weblele ma Moizi valé Arɔn va, yé zén‐ékevamunu faa lé Moizinu lɛ léé: Dé ko ga kɔɔn Éjipiti tɛrɛ la, ’té ’bɛ a é zima. Yé dé ko ga kɔɔn bwi ’ko la, ’té ’bɛ a é zima.

³ Mɛmalé Gakelebale a a va léé, ’é go ko nya tɛrɛ ’ko ta yé wo ko gyɛ gwɔun nya, yé ko nanu valé kolé nénu é kɛlɛ gulizarafɛnu nyaa? Dé ko go ko pa gi Éjipiti tɛrɛ la, ’bɛ fila ’ka vɔ lɛ loo?

⁴ Yé wo lé ’wo ke lɛ léé: Kaa kaa nwiinzan do dɔ, yé kaa go kaa pa gi Éjipiti tɛrɛ la.

⁵ Moizi valé Arɔn dia wo bli la Izraɛlnu faa lé wo zén ékeva, wo yuɛ va.

⁶ Munu lé wo go tɛrɛ nagini lɛ, wo va munu lé wo ’wolé varɔ fia, Nɛn be Jozué valé Jéfuné be Kalɛb lé.

⁷ Yé wo we fe Izraɛlnu faa lé wo zén ékeva, wo lɛ, yé wo léé: Tɛrɛ lé ko gié a naginile nya, é a tɛrɛ zin baba nya.

⁸ Dé Gakelebale bɔ ko va, é dan go lɛ ko nya tɛrɛ ’ko ta, yé é dan a nɔ lɛ ko lɛ; é a tɛrɛ nyɔnɔzan nya.

⁹ Naa, té ka nwa Gakelebale ma lo, yé té ka kana tɛrɛ ’ko la munu lee pelo; naa, wa ko blefɛ nya. Wo tayɔɔfɛ ’ka é dɛrɛ lo; Gakelebale a ko va; té ka kana wo lee pelo.

¹⁰ Zén‐ékevamunu faa a fena léé, ’wo Kalɛbnu gyɛ gɔlɛ nya, tɔɔn, Gakelebale lé fuasan zun zén‐ékevasɔkɔn ta, Izraɛlnu faa yuɛ va.

¹¹ Yé Gakelebale lé Moizi lɛ léé: Munu ’ko, wo dan daan lɛ wo yuɛ vɔle ma an zi mɛ bléyi vaa? Naa, maa we blɛnblɛn faa kɛlɛ wo méléna, mɛ bléyi va lé wo dan wo bli vo lɛ an lɛɛ?

¹² Maa dan wo gyɛ lɛ bawurumagyɛ nya; maa dan wo kulu ga lɛ, naa, maa dan i kɛlɛ lɛ bɛngɔnɔ blɛn plɛplɛ nya yé é mini wo ta.

¹³ Moizi lé Gakelebale lɛ léé: Éjipitimunu é dan we ’ko ’ma lɛ; Éjipitimunu lé i munu ’konu si wo va ilé plɛplɛ nya, wo dan we ’ko ma lɛ,

¹⁴ yé wo dan a zuo fe lɛ tɛrɛ ’ko la munu lɛ. Wa gi dɔɔ léé, bii, Gakelebale, bii a munu ’ko méléna, yé bii, Gakelebale, i bɔra wo yuɛ va; yé ilé lati a é dɔle wo ta, yé i tawoo wo ’lɛ lati pɔrɔlɔ gi é yiéyi, yé é béli i a wo va kyɛ pɔrɔlɔ gi.

¹⁵ Dé i munu ’ko gyɛ bélé mi do zo, bɛngɔnɔnu lé wo ilé we zuo ’ma, wo dan a fe lɛ léé,

¹⁶ plɛplɛ ’ka Gakelebale lee yé é go munu ’ko nya tɛrɛ lé ’ébo ’nyɔɔn léé, é dan a nɔ lɛ wo lɛ, a ta lo; amalé é wo gyɛ bwi gi.

¹⁷ Sin, Mizan, ’ilé plɛplɛ blɛɛn nagɔɔn ma, bélé fɛan zo lé biibozen a fe; yé i léé,

¹⁸ ’yee Gakelebale bli ’ka flian é kele lo, ’é bli a é fanle zin nya; ’é weplekɛlɛzannu valé nwamimazannu ma we voo; ’é ’ka wegyɛzan voo é pla lo, naa, weple lé munu a kɛlɛ, ’é a dɔa wo néné valé wo nénézinénénu nwiin.

¹⁹ ’I munu ’ko ma we vo wolé weple ma ma, ilé nyanai zénle blɛn yɛrama, bélé fɛan zo lé i wo ma we vo, a péli sia Éjipiti tɛrɛ la fɔɔ kyɔ, a zo.

²⁰ Yé Gakelebale léé: Maa wo ma we vo, fɛan zo lé bé laa an lee, a zo.

²¹ Naa, maa a é yuɛma, yé maa Gakelebale lé fuasan é dan tɛrɛ faa fan lɛ.

²² Munu faa ’ko, wo anlé fuasan ye, é valé we blɛnblɛnnu lé maa a kɛlɛ Éjipiti tɛrɛ la valé bwi gi, wa ye; yé wo an gi dan tɛkɛ gɔnɔ vu, ’té wo ’ka ’wo tɔné dɔa an dére lɛ lo;

²³ munu faa ’ko, tɛrɛ lé maa anbo ’nyɔɔn wo tranu lɛ léé, maa dan a nɔ lɛ wo lɛ, wo va mi do kpen ’ka dan tɛrɛ ’ko ye lɛ monomono lo. Wo yuɛ vɔ an zi, amalé wo va mi do kpen ’ka dan a ye lɛ lo.

²⁴ Naa, an wuozan Kalɛb gi bli a é yɛrama, yé é tawo anlé zi ta tegele, amalé tɛrɛ lé é go a ta, maa dan a nyana lɛ ’bɛna, yé é dan kɛlɛ lɛ a kulunu zé nya.

²⁵ Amalɛk munu valé Kanaan munu, wa é nyanale gɔ worona; tɛlɛ, ’ka diéra ka pa gi, yé ’ka go bwi gi, Wɛyi Sɔɔn vazia.

Bale we lɛdɔ wo gi

²⁶ Gakelebale we fe Moizi valé Arɔn lɛ léé:

²⁷ We lé zén‐ékevamunu nyané ’konu a blé an va bɛ, maa dan an ’wuo dɔ lɛ a wuo yifaamaa? An ma we lé Izraɛlnu a ble, maa a ’ma.

²⁸ Bé fe wo lɛ léé: Gakelebale léma: ’é a é yuɛma; ka ’é ma we ble ’é tɔné gi fɛan zo bɛ, ’é dan a kɛlɛ lɛ ka lɛ a zo.

²⁹ Ka galenu é dan dia lɛ bwi gi ’ko; ka faa lé, wo ka nɔnɔ, ’té a péli sia munu lé wo lɛɛ yɔ do bɔ, wo ma, yé ka we ble ’é va bɛ,

³⁰ ka ’ka dan wɔra lɛ tɛrɛ lé ’ébo ’nyɔɔn léé, ka dan nyana lɛ a ta bɛ, a ta pelo; ’té dé é ’ka Jéfuné be Kalɛb valé Nɛn be Jozué nya lo.

³¹ Yé kalé nénu lé ka a fe wo ma léé, wo dan kɛlɛ lɛ gulizara nya, ’é dan wo wɔra lɛ ana, yé tɛrɛ lé é ’ka ka yuɛ gi bɔ lɛ lo, wo ɛ dan a dɔɔ lɛ.

³² ’Kaa ’ko, ka galenu é dan dia lɛ bwi gi;

³³ yé kalé nénu é dan ’wolé trubɛnu tabin lɛ bwi la lɛɛ yɔ fié wuo, yé ’é dan kalé yuɛgiblanlenu dɔ lɛ wo nwiin fɔɔ yé ka faa galenu ’é dia bwi gi.

³⁴ Fɛan zo lé ka vo tɛrɛ naginina yi yɔ fié wuo, a zo duo lé ka dan lɛɛ yɔ fié kɛlɛ lɛ kalé weplenu ma, yi do lɛɛ do; yé dé ’é kɛlɛle ka va vuru ka ma, ka dan we ’ko dɔɔ lɛ.

³⁵ Maa, Gakelebale ɛ fe. Munu nyané ’konu lé wo gi pa do an ma, maa dan a kɛlɛ lɛ wo lɛ a zo. Wo dan ga lɛ bwi gi ’ko; wo dan nyaa lɛ tata.

³⁶ Munu lé Moizi wo nwunvɔ tɛrɛ naginile we ma, yé dé wo nɔla wo pa gi wo tɛrɛ ’ko ma wenyané fe, amalé munu faa we ble Moizi va bɛ,

³⁷ munu ’konu lé wo tɛrɛ ’ko ma wenyané fe, Gakelebale bawurumagyɛ vɔ wo ma yé wo ga.

³⁸ Nɛn be Jozué valé Jéfuné be Kalɛb, wo fié ɛ vo é yuɛma, munu lé wo go tɛrɛ nagini lɛ, wo va munu nya.

Wo gole gi dan Kanaan tɛrɛ la

³⁹ Moizi we ’konu zuo fe Izraɛlnu faa lɛ, yé é kɛlɛ munu ma tɛrɛlalɔrɔ nyaawe blɛn nya.

⁴⁰ Wo nwa bladi tutu, yé wo go gɔ nwiin loru, a fele nya léé: Ko looo lo! Ko dan go lɛ, fɛ lé Gakelebale a fe, ana; naa, ko wenyané kɛlɛ.

⁴¹ Moizi léé: Mɛmalé ka Gakelebale lɛgaanmaa? A nyi do kpen ’ka dan si lɛ lo.

⁴² Té ka go lo; naa, Gakelebale ’ka ka va lo. Té ka daan kabo ma yé ka nyanézannu ’é ka gyɛ lo.

⁴³ Naa, Amalɛk munu valé Kanaan munu ana ka ’lɛ, yé wo dan ka gyɛ lɛ gwɔun nya. Ka Gakelebale vo ka bɛ zuo, amalé Gakelebale ’ka dan kɛlɛ lɛ ka va pelo.

⁴⁴ ’Bɛ ’ka go lɛ wo tɔné gi lo, yé wo go gɔ ma duowo, naa, gipawe pagikɛsu valé Moizi ’ka si lɛ sɔkɔn dɔna lo.

⁴⁵ Yé Amalɛk munu valé Kanaan munu lé ke é nyanale gɔ ’konu nwiin, wo zun wo va. Wo wo gyɛ yé wo wo bɔi wo kurunu nya fɔɔ yé wo bɔ Ooma.