Mi Nɔnɔle 13 - Kazambale lé Sebe Sauunu 1979

Wo mi vu ta fié pa zia Kanaan tɛrɛ naginile we ma

¹ Gakelebale lé Moizi lɛ léé:

² ’I munu nwunvɔ, ’wo go Kanaan tɛrɛ lé maa a nɔ Izraɛlnu lɛ, a naginile we gi. ’I wo si wo tranu gɔnɔ gi do do, ’té wo faa a munu nwiinzannu nya.

³ Moizi wo nwunvɔ léé, ’wo si Paran bwi la yé ’wo go Kanaan tɛrɛ la Gakelebale dére ta; munu ’konu faa a mi nwiinzannu nya.

⁴ Wo tɔnu lé ke ’ko: Rubɛn gɔnɔ gi, Zakuu be Samua lé.

⁵ Siméɔn gɔnɔ gi, Oori be Safat lé.

⁶ Juda gɔnɔ gi, Jéfuné be Kalɛb lé.

⁷ Isakaa gɔnɔ gi, Jozɛfu be Jigal lé.

⁸ Éfraim gɔnɔ gi, Nɛn be Oozé lé.

⁹ Bɛnjamɛn gɔnɔ gi, Rafu be Palti lé.

¹⁰ Zabulɔn gɔnɔ gi, Sodi be Gadiɛl lé.

¹¹ Jozɛfu gɔnɔ gi, Manasé gɔnɔ gi, Suzi be Gaadi lé.

¹² Dan gɔnɔ gi, Gémali be Amiɛl lé.

¹³ Azɛɛ gɔnɔ gi, Mikaɛl be Sɛtuu lé.

¹⁴ Néfitali gɔnɔ gi, Vofisi be Nasibi lé.

¹⁵ Gad gɔnɔ gi, Maki be Géuɛl lé.

¹⁶ Munu lé Moizi wo nwunvɔ tɛrɛ naginile we ma, wo tɔnu lé ke bɛ. Moizi Nɛn be Oozé tɔ do pa Jozué.

¹⁷ Moizi wo nwunvɔ Kanaan tɛrɛ naginile we ma. É lé wo lɛ léé: ’Ka gié ’ko, yirinwana bɛyilazia, yé ’ka gɔ gié.

¹⁸ Ka dan tɛrɛ ye lɛ fɛan zo lé é ke, a zo, yé munu lé wo ke a ta, dé wa plɛplɛɛ? dé wa tɔɔtɔɔ? dé wo ’léé a kiénéé? dé wa kiɛree?

¹⁹ Tɛrɛ lé wo ke a ta, dé é a kaa? dé é a é zimaa? dé é a naanéé? Flanu lé wo ke a ta, dé wa kaa? dé wo zi a é plaa? dé gɔrɔ a wo zii?

²⁰ Dé a tɛrɛ boen a kaa? dé a nyɔnɔ aa? dé a nyɔnɔ ’ka loo? dé yilinu anaa? dé yilinu ’ka ana loo? ’Ka bli tadɔ plɛplɛ yé ’ka da yee tɛrɛ la fɛnu nya. É a wolé dɔrɔporo vininzannu sobléyi nya.

²¹ Wo gié yé wo tɛrɛ nagini. Wa péli sia Tisɛn bwi la fɔɔ yé wo bɔ Réob, Amat lé zi ta.

²² Wo gié yirinwana bɛyilazia, yé wo go fɔɔ yé wo bɔ Ébrɔn; ana lé Aiman koo, Sésai koo, Talmai koo, wo ke. Wa Anak?-?munu nya. Wo Ébrɔn fla pa yé ’bɛ zuo lɛɛ sɔrafié wo Soan pa Éjipiti tɛrɛ la.

²³ Wo go fɔɔ yé wo bɔ Esikɔl gɔ worona, ana lé wo dɔrɔ bɛ do so, ’té a pan a a ma. Mi fié go a nya, ’té é a é dunle yili ma wo méléna. Wo grénadéporo valé bɔrɔyiliporo so yé wo go wo nya é ziin.

²⁴ Wo fɛkona tɔ pa Esikɔl gɔ worona, dɔrɔporo pan lé Izraɛlnu a bɔi ana, azama.

²⁵ Wo vo tɛrɛ naginina yi yɔ fié wuo, yé wo nɔla wo pa gi.

²⁶ Wo bɔ aan wo, wo da Moizi valé Arɔn va, woo valé Izraɛlnu faa lé é ke é zénle ékeva Kadɛs lé ke Paran bwi la ana bɛ, wo va. Wo ’wo sina glewo wo lɛ, woo valé zén‐ékevamunu faa lɛ, yé wo tɛrɛ ’ko la fɛnu nagɔɔn wo lɛ.

²⁷ Wo sina gle lé wa wo Moizi lɛ, yee lé ke ’ko: Ko go tɛrɛ lé i ko nwunvɔ ana, a ta. Webozen lé, é a tɛrɛ nyɔnɔzan nya. Ana fɛnu lé ke ’ko.

²⁸ Naa, tɛrɛ ’ko la munu a plɛplɛ; wolé flanu a blɛn, yé gɔrɔ a é bole wo zi; yé ko Anak munu ye ’bɛna.

²⁹ Amalɛk munu éé nyanaan yirinwana bɛyilazia. Étimunu koo, Jébusimunu koo, Amorémunu koo, woo nyanaan gɔ nwiin, yé Kanaanmunu éé nyanaan wɛyi sɔnɔ, é valé Juudɛn yuu bɛ fiénu ta.

³⁰ Munu a gun gyɛna Moizi ma, yé Kalɛb wo tadɔ. Yé é léé: ’Ka nwa, kaa go tɛrɛ ’ko si; kaa dan kɛlɛ lɛ a ’wuovolɛzannu nya.

³¹ Naa, munu lé wo go wo nya ana, wo léé: Ko ’ka bɔa gole lɛ munu ’ko va lo; wo plɛplɛ mini ko ta, azama.

³² Yé tɛrɛ lé wa nagini, wo alé we zuo fe Izraɛlnu lɛ. Wo léé: Tɛrɛ lé ko gié ana a naginile we ma, é a tɛrɛ lé é ’é tamunu gya, a nya. Munu faa lé ko wo ye ana, wa mi grɔgrɔnu nya;

³³ yé ko mi pɔrɔpɔrɔ ye ’bɛna, Anak munu lé; bɛn pɔrɔpɔrɔ glaliglali lé ke wo nya; ko kobo ye bélé gangannu zo kobo yuɛ gi, yé wo ko ye ’bɛ zo é ziin.