Mi Nɔnɔle 12 - Kazambale lé Sebe Sauunu 1979

Mari valé Arɔn gun gyɛ

¹ Moizi Étiopi le do si é na nya. Mari valé Arɔn vo Moizi ma we blena Étiopi le lé é a si bɛ, alé we ma.

² Wo léé: Moizi do lɔlu nya lé Gakelebale éé we féé? É ’ka we fé é ziin ko lɔlu nya loo? Yé Gakelebale a ’ma.

³ Naa, Moizi a bli tiéézan bozen nya, é mini tɛrɛlamunu faa la.

⁴ Kele tɔɔn Gakelebale lé Moizi valé Arɔn valé Mari lɛ léé: ’Kaa mi yaa, ’ka go zén‐ékevasɔkɔn ’léé. Yé woo mi yaa go ana.

⁵ Gakelebale zun lati pɔrɔlɔ gi, yé é dɔ sɔkɔn ’léé. É Arɔn valé Mari laa, yé woo mi fiénu bié.

⁶ Yé é léé: ’Ka tɔné dɔ an dére lɛ é zima. Dé balelayezan kɛlɛ ka méléna, maa, Gakelebale, maa dan anbozen nagɔɔn lɛ ’bɛzan lɛ yuɛzi gi, maa dan we fe lɛ a lɛ nyɛ fla.

⁷ An wuozan Moizi zé ’ka ’bɛ zo lo. É a yarapawelazan nya anlé we faa gi.

⁸ Ko valé yee éé we fé ko ke lɛ kpaklaa, ’té we yɔɔle ’ka a gi lo, yé maa, Gakelebale a fɛan zo, éé a yé. Mɛmalé ka ’ka kanaan we fele ma an wuozan Moizi ma loo?

⁹ Gakelebale bli fli wo ma yé é go.

¹⁰ Lati si sɔkɔn ta. Yé bé ye, pantɛn zén Mari ma yé a kɔlɛ kɛlɛ fu wuruluu kyɛyee zo. Arɔn yara nɔla Mari va, ’té pantɛn zén a ma.

¹¹ ’Bɛ zuo, Arɔn lé Moizi lɛ léé: Anzan, ilé zanté, wenyané lé ko a kɛlɛ ’tu nya, yé ko kɛlɛ a gi wegyɛzannu nya, té bé dɔ ko nwiin lo.

¹² Yuu! té Mari zé é kɛlɛ bélé né sɛrɛle lé wa yaa bléyian va, ’té é a é gale yé a nɛ ke ma pɛlo, a zo lo.

¹³ Moizi siaa Gakelebale lɛ léé: Oo Bale, ilé zanté, ’i le ’ko béli ma.

¹⁴ Yé Gakelebale lé Moizi lɛ léé: Dé é kɛlɛ léé, a ti é ’léli vɔ a yara é pla, ’té é ’ka dan kɛlɛ lɛ yaragyɛzan nya yi sɔrafié gi loo? ’É vo fla gini ma yi sɔrafié. ’Bɛ zuo é dan zi ye lɛ.

¹⁵ Mari vo fla gini ma yi sɔrafié, yé munu ’ka soowɔla lɛ lo fɔɔ yé Mari wɔra wo va.

¹⁶ ’Bɛ zuo, munu si Asérɔt yé wo sɔkɔnnu dɔ Paran bwi la.