Mi Nɔnɔle 10 - Kazambale lé Sebe Sauunu 1979

Gɔɔlifu béli fié

¹ Gakelebale we fe Moizi lɛ yé é léé:

² ’I béli fié foli gɔɔlifu nya. Wo dan kɛlɛ lɛ ilé munu faa laafɛnu nya, yee valé wolé ta soowɔla fɛnu nya.

³ Dé wo béli fɛn bléyian va, é a lé munu faa ’é zén ékeva i punma, zén‐ékevasɔkɔn ’léé.

⁴ Dé wo béli do fɛn, minwiinzannu koo, Izraɛl mi wuru do do nwiinzannu koo, ’wo zén ékeva i punma ma.

⁵ Dé ka béli fɛn plɛplɛ, munu lé wolé sɔkɔnnu ke é dɔle yirinwanazia, ’wo zi sia é vinin.

⁶ Dé ka béli fiézan fɛn plɛplɛ, munu lé wolé sɔkɔnnu ke é dɔle yirinwana bɛyilazia, ’wo zi sia ’bɛnu zuo. Wo dan béli fɛn lɛ plɛplɛ wo nwale we ma.

⁷ Ka dan béli fɛn lɛ é ziin munu zénle ékema we ma, naa, té ’ka ’bɛzé fɛn plɛplɛ lo.

⁸ Arɔn benu lé wo ke Balebanzannu nya, wo ɛ bélinu fɛn ma. É dan kɛlɛ lɛ bélidɔwe lé a glɛ ’ka lo, a nya, ka valé ka kulunu zé nya.

⁹ Tɛrɛ lé ka ke a ta, dé ka a gona guli dan lɛ ana, ka nyanézannu lé wo dan ka ma, wo va, ’ka bélinu fɛn plɛplɛ ma, yé ka sele é dan dɔ lɛ maa, Gakelebale kalé Bale gi, yé an dan ka si lɛ ka nyanézannu lee.

¹⁰ ’Ka béli fɛn ka ginanayinu valé kalé fɛti yinu la, ’té ka balebanwi kyɛ blé Gakelebale lɛ, ’té ka Bale bɔvɔ sarakanu boo, yé wo dan ka sele dɔ lɛ maa, kalé Bale gi. Maa a Gakelebale, kalé Bale nya.

Wo si Sinai

¹¹ A lɛɛ fiézan lé moné fiézan lé yi yɔ dozan nya, lati si Gakelebale lé sɔkɔn lé, wenayefɛ ke a gi, a ta.

¹² Yé Izraɛlnu nwa Sinai bwi la yé wo zén tawole va, tawobɛ lé wa gɔɔn wo lɛ, a yɛrama. Lati dɔ Paran bwi la.

¹³ Wo ta vininzan soowɔla, dére lé Gakelebale a fe Moizi lɛ, a yɛrama.

¹⁴ Judanu lé drapo soowɔla é vinin, ’té alé sunya palu a wo va. Aminadab be Nasɔn a Juda lé sunya palu nwiinzan nya.

¹⁵ Suaa be Nétanéɛl a Isakaanu lé sunya palu nwiinzan nya.

¹⁶ Élɔn be Éliab a Zabulɔnnu lé sunya palu nwiinzan nya.

¹⁷ Wo Bale lé sɔkɔn fwi, yé Gɛɛsɔn benu valé Mérari benu sɔkɔn kɔné si yé wo goan.

¹⁸ Rubɛnnu lé drapo soowɔla, yee valé élé sunya palunu nya. Rubɛnnu lé sunya palu nwiinzan a Sédéuu be Élisuu nya.

¹⁹ Siméɔnnu lé sunya palu nwiinzan a Surisadai be Sélumiɛl nya;

²⁰ Gadnu lé sunya palu nwiinzan a Déuɛl be Élizaf nya.

²¹ Kéat munu fɛna sauun lé fɛnu si yé wo goan. Wo sɔkɔn dɔ, ’té woo ’wo bɔlunu lɛbɛn‐é.

²² Éfraimnu lé drapo soowɔla, yee valé élé sunya palunu nya. ’Té Amiud be Élisama ɛ ke Éfraim lé sunya palu nwiinzan nya.

²³ Manasénu lé sunya palu nwiinzan lé ke Pédaasuu be Gamliɛl nya.

²⁴ Bɛnjamɛnnu lé sunya palu nwiinzan lé ke Gidéoni be Abidan nya.

²⁵ Dannu lé drapo soowɔla, yee valé élé sunya palunu nya; wo ɛ ke wo faa nyaana nya, wo zi bin sunyanu nya. Dan lé sunya palu nwiinzan a Amisadai be Aiézɛɛ nya.

²⁶ Azɛɛnu lé sunya palu nwiinzan a Okran be Pagiɛl nya.

²⁷ Néfitalinu lé sunya palu nwiinzan a Éan be Aira nya.

²⁸ Izraɛlmunu tawo wolé sunyapalunu ma fɛan zo, yee lé ke bɛ; wo tawo ’bɛ zo.

²⁹ Moizi lé é na ti Madian mi Réuɛl be Obab lɛ léé: Tɛrɛ lé Gakelebale a nɔle we fe ko lɛ, ana lé ko dan go lɛ bɛ. ’I da, kaa go, yé ko dan wezin kɛlɛ lɛ i lɛ, naa, Gakelebale a fe léé, é dan wezin kɛlɛ lɛ Izraɛl lɛ.

³⁰ Obab a zi pa a lɛ léé: Maa ’ka go lo; naa, maa dan go lɛ anlé tɛrɛ la, an yaatɛrɛ la.

³¹ Yé Moizi léé: Ilé zanté; té i si ko va lo. Fɛana lé ko sɔkɔnnu dɔa, i wona dɔɔ, ’bɛzama. ’I kɛlɛ kolé zigɔɔnzan nya.

³² Yé dé i da ko va, wezin lé Gakelebale é dan a kɛlɛ lɛ ko lɛ, é dan kɛlɛ lɛ i ginanamawe nya é ziin.

³³ Wo si Gakelebale lé gɔ nwiin yé wo tawo yi yaa. Gakelebale lé gipawe pagikɛsu go wo ’lɛ. Wo tawo yi yaa wo nyanana naginile we ma.

³⁴ Wo ta soowɔla aan wo, Gakelebale lé lati a wo nwiin yiéyi bléyi faa va.

³⁵ Dé gipawe pagikɛsu nwa bléyian va, Moizi léé: Gakelebale, ’i nwa, i nyanézannu ’é kini ékema, yé i zapazannu ’wo fwi i ’lɛ.

³⁶ Yé dé wo kɛsu dɔra, é léé: Gakelebale, ’i da i pa gi, Izraɛlnu wuru é wuru méléna.