Néémi 9 - Kazambale lé Sebe Sauunu 1979

Munu wolé wenyané fe yé wo bazoro

¹ ’Bɛ moné duo nya, a yi yɔ do wɔlɛ ziɛnzan nya, Izraɛlnu zén ékeva, ’té bɔlɔ a é zénle wo ta sɔ nya, ’té vun a é zénle wo ta, wolé lɔrɔ sɔnle we ma.

² Munu lé wo ke Izraɛl bɛnnu nya, yé wo kan kini bɛn bɛnu faa ma, wo bɔra a gi, yé wo ’wolé wenyané fe yé wo ’wo tranu kɛlɛwe plenu fe.

³ Wo dɔ wo dɔna, yé wo Gakelebale, wolé Bale lé sɛbɛ ta fe lɛrɛwɔlɛ suiɛdo gi, yé wo vo é diale Gakelebale wolé Bale ’lɛ lɛrɛwɔlɛ suiɛdo gi, ’té woo ’wolé wenyanénu fé.

⁴ Jozué koo, Bani koo, Kadimiɛl koo, Sébania koo, Buni koo, Sérébia koo, Bani koo, Kénani koo, wo vɔ Lévinu lé kpala ta, ’té woo siaan dére plɛplɛ nya Gakelebale wolé Bale lɛ.

⁵ Yé Lévi munu, Jozué koo, Kadimiɛl koo, Bani koo, Asabinia koo, Sérébia koo, Odija koo, Sébania koo, Pétaja koo, wo lé munu lɛ léé: ’Ka nwa, ’ka Gakelebale kalé Bale drɔɔ vo lɛɛfaama, té a glɛ é dɔ lo. Bii Bale, i tɔ gyéiin lé é mini drɔɔ vole faa valé tɔzinfele faa ta, ’wa drɔɔ vo ma.

⁶ Bii Gakelebale, lanu koo, la zi lanu valé wolé sunyanu faa koo, tɛrɛ valé é tafɛnu faa koo, wɛyi valé é vafɛnu faa koo, bii do kpen ɛ wo kɛlɛ. Bii ɛ vole é yuɛma nɔ fɛnu ’ko faa lɛ, yé lagi sunyanu éé diaan bii ɛ ’lɛ.

⁷ Bii, Gakelebale, bii ɛ Abram si a va, bii ɛ a si Uu, Kaldé tɛrɛ la, yé bii ɛ tɔ pa Abraam.

⁸ Bii ɛ bli ye tegele i ’lɛ, i gipawe kɛlɛ a va, yé i blivolɛdére nɔ a lɛ, léé, tɛrɛ lé ke Kanaannu koo, Étinu koo, Amorénu koo, Férézinu koo, Jébusinu koo, Giigazinu koo, wozé nya, i dan a nɔ lɛ a kulu lɛ, yé i dɔ i dére ta, naa, i a tegele.

⁹ I ko tranu lé kleblele ye Éjipiti tɛrɛ la, yé i wolé siaalenu ’ma Wɛyi Sɔɔn sɔnɔ.

¹⁰ I gyɛzorowenu valé we blɛnblɛnnu kɛlɛ Faraɔn koo, é wuozannu koo, élé tɛrɛlamunu faa koo, wo lɛ. Naa, nyanénu lé wa pa ko tranu ta, bé gi dɔɔ, yé ilé fuasan bɔra bélé fɛan zo lé bé bɔra kyɔ ko lɛ ’ko, a zo.

¹¹ I wɛyi fee gyɛ wo ’lɛ, yé wo gié fɛna galena wɛyi méléna; naa, munu lé ’bɛnu wo zuo bin, i ’bɛnu vuli a guru blɛn gi, bélé gɔlɛ lé éé goo ’yiwɔlɛ ma, a zo.

¹² I zi gɔɔn wo lɛ é yiéyi lati pɔrɔlɔ nya, yé é béli kyɛsan pɔrɔlɔ éé wolé tawozi ta kinié wo ’lɛ.

¹³ I zun Sinai gɔ nwiin, i we fe wo lɛ lagi loru, yé i déretawe tegelenu koo, bélidɔwe boennu koo, weplalenu valé bélidɔwe sɔnné zimanu koo, i wo nɔ wo lɛ.

¹⁴ Ilé yi nyané lé ke flinyi nya, bé gɔɔn wo lɛ, yé bélidɔwe sɔnnénu koo, weplalenu valé bélidɔwe koo, i wuozan Moizi a paa wo gi.

¹⁵ Dé lɔrɔ a wo gyɛna, i lagi loru buru nɔ wo lɛ, dé ’yiminilɔrɔ a wo gyɛna, i ’yi si wo lɛ gɔlɛ gi yé wa mini. Yé tɛrɛ lé ibo ’nyɔɔn léé, i dan a nɔ lɛ wo lɛ wozé nya, bé fe wo lɛ léé, ’wo go ana, ’wa si.

¹⁶ Naa, ko tranu kɛlɛ boblɛnzannu valé bɔrɔvɔɔzannu nya i nwiin. Wo ’ka ’wo tɔné dɔ lɛ ilé bélidɔwe sɔnnénu lɛ lo.

¹⁷ Wo sɔn vɔ i lɛdɔmale ma, yé givuruwenu lé bé kɛlɛ wo lɛ, wo gi san wo ma. Wo ’wo bɔrɔ vɔɔ i nwiin, yé wolé nwale i ma gi, wo mi do dɔ wo nwiinzan nya, léé, ’wo go ’wolé luu gi é ziin. Naa, bii a Bale lé a ma ke é ’lɛrɛle mi ma we vole we ma, a nya; bii a mimawedɔɔzan valé nyanaizénzan nya. I bli ’ka flian é kele lo, ilé zin glɛ ’ka lo, yé i ’ka sɔn vɔ lɛ wo ma lo.

¹⁸ Dé wo diriné do sele boenwo yé wo léé, ’wolé Bale lé é ’wo si Éjipiti tɛrɛ la, yee looo lo, dé wo i sɔnɔ blɛn wooo, i ’ka sɔn vɔ lɛ wo ma duowo lo.

¹⁹ Ilé nyanai zénle blɛn gi, i ’ka sɔn vɔ lɛ wo ma bwi gi lo, yé lati pɔrɔlɔ ’ka daan lɛ zi gɔɔnle ma wo lɛ é yiéyi lo. Yé kyɛsan pɔrɔlɔ lé, éé wolé tawo zi ta kinié é béli, é ’ka si lɛ wo ’lɛ lo.

²⁰ I léli zin nɔ wo lɛ wo kɛlɛle wedɔɔzannu nya we gi. I ’ka sɔn vɔ lɛ mana nɔle ma wo lɛ lo, yé i ’yi nɔ wo lɛ ’yiminilɔrɔ lé we ma.

²¹ Lɛɛ yɔ fié gi, i wolé fɛ nɔ bwi gi, ’té fɛ do kpen ’ka vuruan wo ma lo; wolé sɔnu ’ka fwi lɛ lo, yé wo ganenu ’ka zii lɛ lo.

²² I bɛn tɛrɛnu valé migɔnɔnu nɔ wo lɛ, yé tɛrɛnu lé wa si wo nyanézannu lee, bé guli wo ma. Wo Esibɔn nwiinzan blɛn Sioni valé Bazan nwiinzan blɛn Ɔg lé tɛrɛnu si wozé nya.

²³ I wo benu fan bélé lagi monénénu zo, yé tɛrɛ lé bé fe wo tranu lɛ léé, wo dan a si lɛ wozé nya, i bɔ wo va yé wo nyana a ta.

²⁴ Yé wo benu bɔ tɛrɛ ’ko la yé wa si wozé nya, yé a tamunu, Kanaannu tua wo lɛ, yé wo valé ’wo nwiinzannu koo, tɛrɛ ’ko tamunu koo, i wo pa wo lee, léé, wo ’wolé sɔlɛwe kɛlɛ wo lɛ.

²⁵ Wo kɛlɛ fla plɛplɛnu valé fɛdɔtɛrɛ zin nwiinzannu nya; kɔnnu lé ke é fanle fɛ zin gɔnɔ faa nya, wa ye é pla; ’yigurunu koo, dɔrɔféinu koo, ɔliviféinu koo, porobaayili kiɛre koo, wa ye é pla. Wo fɛ ble yé wo kan yé wo bua, yé ilé zin blɛn gi wolé tɛrɛla kɛlɛ néné.

²⁶ Naa, duowo, wo péli vɔ i ma yé wo nwa i ma. Wo ilé bélidɔwe vo ’wo bɛ zuo; ilé balelayezannu lé woo we plaan munu lɛ léé, ’wo da i va é ziin, wo wo gyɛ, yé wo i gɔɔn é naané.

²⁷ Yé i wo vo wo nyanézannu lee, ’té ’bɛnu éé yaan wo ta. Naa, wolé kle ble bléyi va, wo siaa i lɛ, yé bii, i wolé siaalenu ’ma i nyanana la gi loru. Yé ilé nyanai zénle blɛn gi i wo tawe kɛlɛzannu nɔ wo lɛ yé ’bɛnu wo si wo nyanézannu lee.

²⁸ Dé wo flinle ye, wo kun wenaané kɛlɛle ma i yuɛ gi é ziin. Yé i wo pa wo nyanézannu lee, ’té ’bɛnu éé plaan wo nwiin. Naa, wo siaa i lɛ é ziin, yé bii, i wolé siaalenu ’ma la gi loru, yé ilé nyanai zénle blɛn gi i wo si we gi gɔnɔ kiɛre.

²⁹ I we pla wo lɛ léé, ’wo da ilé bélidɔwe kɛlɛ é ziin, yé wo yara pa wolé boblɛn kɛlɛle ta. Wo ’ka wo tɔné dɔ lɛ ilé bélidɔwe sɔnnénu lɛ lo. Déretawenu lé, dé mian é tawo a ta é vo é yuɛma a nya bɛ, wo ’bɛ sɛrɛ, wo ’wo bɛapa nwa i ma, ’té woo ’wo bɔrɔ vɔɔan i ta, yé wo ’ka i lɛdɔ lɛ a ma monomono lo.

³⁰ I ’wuo dɔ wo kɛlɛwenu wuo lɛɛ kiɛre nya, yé i we lɛ kini wo lɛ i léli valé ilé balelayezannu nya. Yé wo ’ka wo tɔné dɔ lɛ ’bɛnu lɛ monomono lo. Yé i wo pa bɛn bɛnu lee.

³¹ Naa, ilé nyanai zénle blɛn gi, i ’ka wo kulu ga lɛ lo, yé i ’ka daan lɛ wo ma lo, naa, i a Bale lé, é mi mawe dɔɔ yé a nyanai éé zén‐é, a nya.

³² Yé sin, kolé Bale, Bale blɛn, Bale plɛplɛ, kana lee Bale, bii lé i ilé gipawe lɛ sɔɔan yé i nyanai éé zén‐é, ko koo, ko nwiinzan blɛnnu koo, kolé Balebanmunu koo, kolé balelayezannu koo, ko tranu koo, ilé munu faa koo, nyané faa lé ko faa a ble, é sia Asiri nwiinzan blɛnnu bléyi va fɔɔ yé é bɔ kyɔ yi ’ko ma, té bé ye we kiéné nya lo.

³³ Wenu faa lé wo bɔ ko ma, bii a wo gi tegele, naa, i ibo nagɔɔn yarapawelazan nya, yé ko ɛ wenyané kɛlɛ.

³⁴ Ko nwiinzannu koo, kolé Balebanmunu koo, ko tranu koo, wo ’ka ilé bélidɔwe kɛlɛ lɛ monomono lo, yé ilé bélidɔwe sɔnnénu valé we lé bé fe wo lɛ, wo ’ka wo ta tawo lɛ lo.

³⁵ Bléyian va lé wa wobo ma, ’té i wezin kiɛre kɛla wo lɛ, tɛrɛ blɛn zima lé bé bɛ pa wo lee, a ta, wo ’ka i bɔ lɛ lo yé wo ’ka wo yara si lɛ wo kɛlɛwe naanénu ta lo.

³⁶ Yé kyɔ, ko a luu nya ’ko. Tɛrɛ lé bé nɔ ko tranu lɛ léé, wo gi ’é nana a tafɛnu valé alé zinnu ma, ko a kyɔ ana luu nya ’ko.

³⁷ Kolé wenyanénu lé we ma, minwiinzan blɛnnu lé i ko pla wo wuo, tɛrɛ tafɛnu gi gyɛ wozé nya. Woo plaan ko nwiin wolé blibɔmale yɛrama, ko kɔlɛnu koo, kolé winu koo, ko nwiin, yé ko a nyané blɛn blena.

Wo gi pa do Bale va é ziin

³⁸ We ’konu faa lé we ma lé ko gi pa do yé ko a gyɛ sɛbɛ ta, yé ko nwiinzannu koo, kolé Lévinu koo, kolé Balebanmunu koo, wo ’wozé tɔmase kɛlɛ zɔrɔkaanyɔɔ ta.