Néémi 8 - Kazambale lé Sebe Sauunu 1979

¹ Yé munu faa zén ékeva do flagɔrɔ ’léé lé wa laama ’yinu, ana. Wo lé sɛbɛgifezan Ezidras lɛ léé: ’I da Moizi lé bélidɔsɛbɛ lé Gakelebale a nɔ Izraɛlnu lɛ, a nya.

² Yé Balebanzan Ezidras da bélidɔwe sɛbɛ nya zén‐ékeva munu ’lɛ, gɔnénu koo, lomu koo, munu faa lé wa gi maan koo, wo ’lɛ. É a moné sɔrafiézan lé yi vininzan nya.

³ Ezidras sɛbɛ tafele péli sia bladi, yé é vo a tafena fɔɔ yé yiéyi pa. ’Té gɔnénu koo, lomu koo, munu faa lé wa gi maan koo, wa é zénle ékeva flagɔrɔ ’léé lé wa laama ’yinu, ana. Munu faa vo ’wo tɔné dɔna flee bélidɔwe sɛbɛ ta fe dére lɛ.

⁴ Sɛbɛgifezan Ezidras dɔ kpala lé wa ma’lɛrɛ bléyi ’ko zé nya, a ta loru. Yé Matitia koo, Séma koo, Anaja koo, Uri koo, Ilkija koo, Maaséja koo, wa é dɔle a bɛyilazia. Yé Pédaja koo, Misaɛl koo, Malkija koo, Aasum koo, Asabadana koo, Zakari koo, Mésulam koo, wa é dɔle a bɛbolazia.

⁵ Ezidras sɛbɛ lɛ so munu faa yuɛ va, ’té é a é dɔle loru bɛ, ’té munu faa a é dɔle.

⁶ Ezidras Gakelebale Bale blɛn drɔɔ vo, yé munu faa we a zuo, ’wo bɛ nwale nya, Amɛɛn! Amɛɛn! Yé wo bua yé wo dia ’wo bli la Gakelebale ’lɛ.

⁷ Lévimunu, Jozué koo, Bani koo, Sérébia koo, Jamɛn koo, Akub koo, Sabétai koo, Odija koo, Maaséja koo, Kélita koo, Azaria koo, Jozabad koo, Aanan koo, Pélaja koo, wo bélidɔwe sɛbɛ gi fe munu lɛ, yé wo faa vo wo dɔna do do.

⁸ Wo Bale lé bélidɔwe sɛbɛ ta fe é diale nya a gi kpai kpai, ’té wa gi fé, munu lé a gi ’male we ma.

⁹ Gbɔrɔnama Néémi koo, Ezidras lé ke Balebanzan valé sɛbɛgifezan nya, yee koo, Lévinu lé wo we paa munu gi koo, wo lé munu faa lɛ léé: Yi ’ko a Gakelebale, kalé Bale lé yi nyané nya; té ka kle pa kabo ta lo, té ka wuvɔ lo. Naa, munu faa lé wo bélidɔwe dérenu ’ko ’ma, wo wuvɔ.

¹⁰ Yé wo lé wo lɛ léé: ’Ka go, ’ka wi nyɔnɔzannu ble yé ’ka dɔrɔ néné mini; yé munu lé wo ’ka fɛ do kpen kɛlɛ lɛ ’wozé nya lo, ’ka wozé pa zia, naa, yi ’ko a Kozan lé yi nyané nya; té ka kle pa kabo ta lo, naa, Gakelebale lé ginanale ɛ ke kalé plɛplɛ nya.

¹¹ Lévinu munu tɔrɔ paa a fele nya léé: ’Ka tadɔ, naa, yi ’ko a yi nyané nya, té ka kle pa kabo ta lo.

¹² Yé munu faa go fɛblele valé fɛminile we ma, ’té woo fɛ paan zia é baba, yé wo gi nana. Naa, dérenu lé wo wo gi fe wo lɛ, wo wo ’ma, azama.

Fɛti lé wa kɛla faa wuo

¹³ A yi fiézan nya, guniwuonu faa koo, Balebanzannu valé Lévinu koo, wo zén ékeva sɛbɛgifezan Ezidras va, bélidɔwe gi fele yé wa ’ma we ma.

¹⁴ Yé wa ’ma bélidɔwe lé Gakelebale a nɔ Moizi lɛ, a gi, léé: É a lé Izraɛlnu ’wo moné sɔrafiézan lé fɛti kɛlɛ faanu wuo,

¹⁵ yé ’ka we ’ko zana dɔɔ Jérusalɛm valé fla faa la, léé: ’Ka go gɔ nwiin yé ɔliviyili bɛnu koo, bwi gi ɔliviyili bɛnu koo, yili lé wa laama miite, a bɛnu koo, yɔlaanu koo, yilinu lé wo kwɛɛ ke kiɛre koo, ’ka wo kini, nyanawuofaanu kɛlɛle wo nya we ma, wa gyɛ sɛbɛ gi fɛan zo, a zo.

¹⁶ Yé munu go yilibɛnu kini lɛ yé wo nyanawuofaanu kɛlɛ wo nya, wolé kɔnnu ta loru koo, wolé kɔn ’léénu koo, Bale lé kɔn gɔrɔ gi koo, flagɔrɔ ’léé lé wa laama ’yinu koo, flagɔrɔ ’léé lé wa laama Éfraim, ’bɛna koo, wona.

¹⁷ Munu faa lé wo si luu gi yé wo zén ékeva, wo ’wolé faanu dɔ yé wo yii a wuo. É sia Nɛn be Jozué bléyi va fɔɔ yee yi ’ko nya lé Izraɛlnu ’bɛ zoɛ bɛ kɛlɛ. Yé wo gi nana é baba.

¹⁸ Woo Bale lé bélidɔwe sɛbɛ ta fé yi faa do do ma, é sia a yi vininzan ma fɔɔ yé é bɔ a yi nyaala nya. Wo yee fɛti kɛlɛ yi sɔrafié; a yi sɔraazan nya wo zénle ékeva plɛplɛ kɛlɛ. Bale wo béli dɔ fɛan zo, a zo.