Néémi 6 - Kazambale lé Sebe Sauunu 1979

Wo nwa Néémi ma é ziin

¹ Maa ’ka tan duoli laanu vɔ lɛ lo, yé Sanbalat koo, Tobija koo, Arabu mi Gésɛm koo, wo valé ko nyanézannu bɛnu koo, wa ’ma léé, ko gɔrɔ ma’lɛrɛ é ziin, yé a sɛrɛna bɛ ’ka vo lɛ é dɛrɛ lo.

² Sanbalat valé Gésɛm we pa an lɛ zia léé: ’I da, ko we ’ko yuɛ gi bo ékeva fla lé é ke gɔworona lé wa laama Ono, a ta. Wo péli vɔ an ma wenyané kɛlɛle an lɛ we ma.

³ Yé an munu nwunvɔ a fele nya wo lɛ léé: Anlé nyanama a blɛn; an ’ka bɔa gole lɛ lo. Dé maa si ’ko yé an go ka va, nyanama ’ko é dan dɔ lɛ.

⁴ Gɔnɔ ziɛn, wo yee we duo pa an lɛ zia, yé maa a zi pa wo lɛ dére duo nya gɔnɔ ziɛn.

⁵ Sanbalat é wuozan do nwunvɔ an va a gɔnɔ soruzan nya, ’té lɛtrɛ lɛsole a a lee.

⁶ Wa gyɛ lɛtrɛ ’ko gi léé: A gun gyɛle nwɛɛn bɛnnu méléna léé, bii valé Juifinu, ka a ka gi bɔrɔna léé, ka nwa munu ma, amalé ka ke gɔrɔ bona é ziin, yé Gasimu a yee dére duo fena. Wo léé, i dan ibozen dɔ lɛ wo nwiinzan blɛn nya.

⁷ I munu dɔ balelayezannu nya Jérusalɛm, léé, wo we tuoli vɔ léé, bii ɛ ke Juda nwiinzan blɛn nya. Yé sin, minwiinzan blɛn é dan wenu ’ko ’ma lɛ. Amalé, ’i da yé ko we ’ko fe ékeva.

⁸ Maa a zi pa Sanbalat lɛ léé: We lé bé fe bɛ, vié lé. Biibo lé ’wuogibɔrɔmawe bɛ.

⁹ Munu ’ko a a va léé, wo kana zén ko gi, yé wa fena léé, wo fuu é dan si lɛ wo ta, yé wo ’ka dan nyanama ’ko lɛ sɔɔ lɛ é dɛrɛ lo. Sin, oo Bale, ’i plɛplɛ nɔ an lɛ.

¹⁰ An go Méétabéɛl be Délaja be Sémaéja lé kɔn ’léé. É a élé kɔn gi, ’té a lɛnu a é tanle, yé é léé: ’Ko go ékeva Bale lé kɔn gi fɛna sauun na; ’ko Bale lé kɔn lɛnu tan ma, naa, wo dan da lɛ i gyɛ lɛ; wo dan i gyɛ lɛ é béli ’ko.

¹¹ Maa a zi pa léé: Maa? Maa yɔɔma? Yé é ziin, mi pla bélé maa zo, é bɔa wɔrale lɛ Bale lé fɛna tinle na yé é vo é yuɛmaa? Maa ’ka dan wɔra lɛ ’bɛna pelo.

¹² Yé maa a gi dɔɔ léé, Bale ’ka mi ’ko pa lɛ an lɛ zia lo; naa, Sanbalat valé Tobija gɔɔli nɔ a lɛ, amalé é ’bɛ zo balelawe fe an ma.

¹³ We ’ko kɛlɛle nya, é dɔ wo gi léé, an dan kana lɛ, yé wo wean fe maa dan a kɛlɛ lɛ yé é kɛlɛ wenyané nya an nwiin, yé we ’ko é zi nɔ wo lɛ léé, wo an tɔ sɛrɛ yé yara an gyɛ.

¹⁴ Anlé Bale, Tobija valé Sanbalat valé wolé nyanamanu sele ’é dɔ i gi ma. Balelaye le Noadia valé balelayezan koɛnu lé wo ke kwa kulina léé, wo kana zén an gi, wo sele ’é dɔ i gi ma.

Nyanama ’wuoplana

¹⁵ Moné suiɛdozan lé wa laama Élul, a yi yɔ do wɔlɛ soruzan nya wo gɔrɔ bɔlɔ vɔle nyaa; é nyaa yi yɔ fié wɔlɛ vu ta fié nya.

¹⁶ Ko nyanézannu faa we ’ko ’ma aan wo, bɛnnu faa lé ke ko zi, kana zén wo gi, yé wo fuu faa si wo ta. Wa ye léé, ko nyanama ’ko pale lɛ sɔɔ kolé Bale lé blibɔmale nya.

¹⁷ Bléyi ’ko va, Juda mi blɛnnu wo lɛtrɛ kiɛre gyɛ Tobija lɛ, yé Tobija a ye yé ézé zi pa.

¹⁸ A na a Arak be Sékania lu nya, yé a be Jokanan na a Bérékia be Mésulam lu nya, amalé Juda mi kiɛre bale ’nyɔɔn léé, ’wo nanaan a va.

¹⁹ Wa tɔ zin fe an tɔné gi, yé an dérenu lé maa fe, wa fe a lɛ. Tobija lɛtrɛnu pa an lɛ zia kana zénla an gi we ma.