Néémi 5 - Kazambale lé Sebe Sauunu 1979

Juifinu yaa nyanégyɛzannu ta

¹ Flamunu planu valé wo nanu nwa wo bwe Juifinu ma weblele nya.

² Wo va mi kenu léé: Ko koo, ko benu valé ko lunu koo, ko a kiɛre; ’wo burupun nɔ ko lɛ ma, yé ko fɛ ble yé ko vo é yuɛma.

³ Wo va mi bɛnu léé: Kolé féinu koo, kolé dɔrɔféinu koo, kolé kɔnnu koo, ko wo dɔ burupun yele we ma, lɔrɔ dɔbléyi va.

⁴ A bɛnu léé: Ko nwiinzan blɛn lé vagɔɔli nɔle we ma lé, vɛɛn kolé féinu valé kolé dɔrɔféinu ble ko lee.

⁵ Naa, duowo, ko valé ko bwenu kɔlɛ a do; kolé nénu a bélé wolé nénu zo, yé bé ye, ko ko benu valé ko lunu nɔ luu nya. Ko lunu kiɛre kɛlɛ luu nya kwakwa; plɛplɛ ’ka ko lee lo, yé kolé féinu valé kolé dɔrɔféinu vo mi bɛnu lɛ.

⁶ Maa wolé mimaweblele valé wo dérenu ’ko ’ma aan wo, é ’na an ma é baba.

⁷ Maa lé an bli gi léé, maa dan we pla lɛ mi blɛnnu valé minwiinzannu lɛ; yé maa dan a fe lɛ wo lɛ léé: Mɛ lé bɛɛ? Ka vɛɛn paan ka bwenu ma, ’té wa paan a maa? Yé maa mi kiɛre zén ékeva wo zi,

⁸ yé maa lé wo lɛ léé: Ko kwa kuli yé Juifinu lé wo wo dan bɛnnu lee, ko wo tabo ’naan, yé ’kaa, ka ka bwenu daan ka ke lee? Wo vo é tadɔle; wo ’ka a zi vɔ dére do ye lɛ lo.

⁹ Yé maa léé: We lé ka ke a kɛlɛna ’ko, é ’ka é zima lo. É ’ka lé ka tawo kanale nya kolé Bale lee loo? Dé ka kɛlɛ ’bɛ zo, bɛnnu lé ke ko nyanézannu nya, wo ’ka dan ko sɔnɔ lɛ loo?

¹⁰ Maa koo, an bwenu valé an wuozannu koo, ko é ziin, ko vɛɛn pa wo ma gɔɔli valé buru wɔlɛnu nya. Vɛɛn lé wa si ko va, kaa ’bɛ vo wo ma é pla ma.

¹¹ Bɛwemalé, kyɔ, wolé féinu koo, wolé dɔrɔféinu koo, wolé ɔliviféinu koo, wolé kɔnnu koo, ka nɔ wo lɛ é ziin, yee valé gɔɔli koo, buruwɔlɛ koo, dɔrɔ’yi vininzan koo, nyɔnɔ koo, wolé fɛ yɔ soruzan lé ka a ma laa wo lee a pamale nya bɛ, ’ka ’bɛ vo wo ma é pla.

¹² Wa zi pa léé: Ko dan wo nɔ lɛ; ko ’ka dan we do laa lɛ wo lee lo; i wean fe, ko kɛla. Yé maa Balebanzannu laa, yé maa léé, ’wo bale ’nyɔɔn ’bɛnu yuɛ va, léé, wo dan dɔ lɛ ’wo dére ta.

¹³ Yé maa anlé sɔ puo a fele nya léé: Munu faa lé wo ’ka dɔa wobo dére ta lo, Bale ’é ’bɛzan puo a puobɛ duo nya, élé kɔn gi valé élé fɛnu zi. ’Wa puo ’bɛ zo ma, yé a lee é vo é koro nya. Zén‐ékevamunu faa léé: Amɛɛn. Yé wo Gakelebale tɔ nwa, yé munu dɔ ’wo dére ta.

Néémi ’ka ébo lé zin naginian lo

¹⁴ É sia yian nya lé minwiinzan blɛn an dɔ gbɔrɔnama nya Juda tɛrɛ la, ’bɛ gi léé, é sia minwiinzan blɛn Aatazɛɛsɛ plale mi nwiin lɛɛ yɔ dozan nya fɔɔ yé é bɔ a lɛɛ yɔ do wɔlɛ vu ta fiézan ma, lɛɛ vu ta fié wuo, maa koo, an bwenu koo, ko ’ka fɛblegɔɔli si lɛ gbɔrɔnama lee lo.

¹⁵ Munu lé wo wo dɔ gbɔrɔnamanu nya an ’lɛ é vinin, wo pla munu nwiin plɛplɛ; woo buru valé dɔrɔ sié wo lee; ’bɛ ta loru, woo gɔɔlifu sikla yɔ fié sié wo lee; wo wuozannu é ziin, wo yaa munu ta. An kanaan Bale lee, amalé an ’ka anzé kɛlɛ lɛ ’bɛ zo lo.

¹⁶ ’Bɛ ta loru, an nyanama pa gɔrɔ ’ko ma’lɛrɛna; ko ’ka féi do kpen lɔ lɛ lo, yé an wuozannu faa nyanama pa ékeva.

¹⁷ An leemunu a mi yɔ sɔrafié wɔlɛ vu; wa Juifinu valé minwiinzannu nya; ’bɛ ta loru, bɛnnu lé ke ko zi, wo vamunu da an va.

¹⁸ Fɛblele lé wa ma’lɛra an lɛ yi faa do do ma, yee lé ke ’ko: dirigɔné do koo, ’bla zima suiɛdo koo, mianénu koo, woo lé, yé a yi vu vu faa bɔle nya, dɔrɔ faa lé ko mawe ke a gi, wa ma’lɛra di. Naa, duowo, maa ’ka fɛblegɔɔli si lɛ gbɔrɔnama lee lo; kɔné a Juifinu nwiin blɛn, azama.

¹⁹ Anlé Bale, an sele ’é dɔ i gi ma; ’i wezin kɛlɛ an lɛ, we faa lé maa a kɛlɛ munu ’konu lɛ, a we ma.