Néémi 4 - Kazambale lé Sebe Sauunu 1979

Néémi é mazannu kele

¹ Sanbalat a ’ma aan wo léé, ko a gɔrɔ bona fla zi, a bli fli, yé é ’na a ma é baba.

² É Juifinu ma we nana, yé é we fe é bwenu valé Samari lé sunyanu lɛ léé: Juifi tɔɔtɔɔnu ’ko, mɛ nyanama lé wa pana bɛɛ? Ka dan wo vo lɛ ’bɛ kɛlɛnaa? Wo dan saraka bo lɛɛ? Wo dan a lɛ sɔɔ lɛɛ? Gɔlɛnu lé kyɛ wo ble, ’té wo tɛrɛ zén wo ta, wo dan nyanama pa lɛ ’bɛnu nya é ziin?

³ ’Té Amɔn mi Tobija a é dɔle a sɔnɔ, yé ’bɛ léé: ’Wa dɔ é wo. Dé kwané do mane a ma, wolé gɔlɛ gɔrɔ ’ko é dan zana lɛ a gi é pla.

⁴ Kozé Bale, wa lɔlu plɛnna ko ma fɛan zo, ’i tɔné dɔ do. ’I wolé ko sɔnɔle dɔ wo nwiin ma, yé ’wo kɛlɛ luu nya tɛrɛ bɛ ta ma, yé ’bɛna munu ’é ’wii wo ta ma.

⁵ Té i wo ma we vo wolé weplenu ma lo; té i wolé wenyané fwi lo; naa, munu lé wo ke gɔrɔ bona, wo ’bɛnu ’namawe fe.

⁶ Ko gɔrɔ bo é ziin fɔɔ yé ko bɔ a méléna. Munu nyanama ’ko pa ’wo bli faa nya.

⁷ Naa, Sanbalat koo, Tobija koo, Arabunu koo, Amɔnnu valé Azdɔdnu koo, wa ’ma aan wo léé, gɔrɔ ma’lɛrɛle a gona é ’lɛzia yé a vɔle é ke ’léé péli sia, é ’na wo ma é baba.

⁸ Wo ’wo gi pa ékeva do léé, ’wo guli dan Jérusalɛm ma, fla sɛrɛle we ma.

⁹ Ko bazoro kolé Bale lɛ, yé ko munu dɔ léé, ’wo ko tabin é yiéyi valé é béli, munu lé wo nwa ko ma, wo lee.

¹⁰ Naa, duowo, Juda munu léé: Plɛplɛ nyaa gɔrɔbo kɔnésimunu lee, yé fɛ sɛrɛlenu ana tan di; ko ’ka bɔa gɔrɔ bole lɛ lo.

¹¹ Yé ko nyanézannu léé: Wo ’ka dan we do dɔɔ lɛ lo yé wo ’ka dan we do ye lɛ lo fɔɔ yé ko bɔra wo ma. Ko dan wo gyɛ lɛ, yé ’bɛ zo lé wolé nyanama é dan dɔ lɛ.

¹² Naa, Juifinu lé woo nyanaan wo sɔnɔ, wo si wo nyanana nuu, yé wo da a zuo fe lɛ ko lɛ gɔnɔ vu.

¹³ We ’ko ma lé maa munu dɔ flagɔrɔ zi gɔ la loru. Maa wo dɔ ana wo gɔnɔ ma gɔnɔ ma, ’té wolé gwɔunnu koo, wolé dinnu koo, wolé sanu koo, wa wo lee.

¹⁴ Maa dɔ loru yé maa fɛ faa nagini, yé maa lé mi blɛnnu koo, minwiinmunu koo, mi pɔnénu koo, wo lɛ léé: Té ka kana wo lee lo. Mizan lé ke blɛn, ’té éé kana zén‐é munu gi, a sele ’é dɔ ka gima, yé ka bwenu koo, ka benu valé ka lunu koo, ka nanu koo, kalé kɔnnu koo, ’ka wo ta guli dan.

¹⁵ Ko nyanézannu a ’ma aan wo léé, wo we lɛ kini ko lɛ, Bale wo bligiwe sɛrɛ tata, yé ko faa nɔla gɔrɔ vazia é ziin, yé ko faa kun kolé nyanama pale ma do do.

¹⁶ A péli sia yi ’ko ma, an wuozannu lɛ do vo nyanama pana, ’té dinnu koo, mibotakuunfɛnu koo, sanu koo, gɔlɛtayɔɔfɛnu koo, ’bɛnu a a lɛ do lee. Minwiinzannu a é dɔle Juda munu faa zuo.

¹⁷ Munu lé wo ke gɔrɔ bona koo, kɔnésimunu koo, wo dɔ kɔnényazannu koo, woo nyanama paan wo bɛ do nya, ’té gulidanfɛ a wo bɛ do lee.

¹⁸ Nyanamapazannu do do faa bɛ, gwɔun a wolé kyɛsidi gi wo gyɛn. ’Té bélifɛnzan a é dɔle an sɔnɔ.

¹⁹ Yé maa lé mi blɛnnu koo, minwiinmunu koo, mi pɔnénu koo, wo lɛ léé: Nyanama a kiɛre, é a é yɔrɔ nya, yé ko a é sile é ke ta gɔrɔ ’ko bona.

²⁰ Dé ka béli dére ’ma bléyian va, ’ka zén ékeva ko va, fɛ lé béli we ana, ana; kolé Bale é dan ko ta guli dan lɛ.

²¹ ’Bɛ zo lé ko dan nyanama ’ko pa lɛ, din éé voo ko lɛ donu lee, é sia tu kini gunu nya fɔɔ yé é bɔ bɛlaa la gunu dɔrale ma.

²² Yee bléyi ’ko duo nya, maa lé munu lɛ é ziin léé: Ka faa do do valé ka wuozan ’é yii Jérusalɛm; kaa yuɛ pa fla ta é béli, yé kaa nyanama pa é yiéyi.

²³ Maa koo, an bwenu koo, an wuozannu koo, mitabinmunu lé wo ke an zuo koo, ko ’ka kolé sɔnu si lɛ ko ta lo; ko faa do do, fɛnu lé ke ko lee, gulidanfɛnu valé ’yi lé; fɛ bɛ kaan lo.