Néémi 3 - Kazambale lé Sebe Sauunu 1979

Wo Jérusalɛm zi gɔrɔ ma’lɛrɛ

¹ Balebanmunu ’lɛzan Éliasib valé é bwe Balebanzannu nwa yé flagɔrɔ ’léé lé wa laama ’blanu bɔrana, wa dɔ yé wo duoli vɔ a ’léé, yé wa nɔ Bale lɛ. É sia Méa lé dɔtafɛ ma yé é go yé é bɔ Ananéɛl zé dɔtafɛ ma, wa faa nɔ Bale lɛ.

² Jériko munu ’wozé gɔrɔ bo Éliasib zé ’léé, yé Imri be Zakuu ’ézé gɔrɔ bo wozé ’léé.

³ Flagɔrɔ ’léé lé wa laama pɔnu, Sénaa benu ana dɔ yé wa duoli vɔ. Wo duoli ta loru lɛ tan yé wa duoli vɔ yé wa lɛtan foliɛwɔlɛnu vɔ a ta.

⁴ Akɔs be Uri be Mérémɔt gɔrɔ bo wozé ’léé, Mésézabéɛl be Bérékia be Mésulam gɔrɔ bo ’bɛnu zé ’léé. Baana be Sadɔk gɔrɔ bo ’bɛnu zé ’léé;

⁵ Tékoa munu lé wo ’ka plaan wozannu wuo lo, wo gɔrɔ bo ’bɛnu zé ’léé.

⁶ Pazéas be Jojada valé Bézodia be Mésulam duoli kwa ma’lɛrɛ. Wo duoli ta loru lɛ tan yé wa duoli vɔ yé wa lɛtan foliɛwɔlɛnu vɔ a ta.

⁷ Gabaɔn mi Mélatia koo, Mérono mi Jadɔn koo, Gabaɔnmunu koo, Misipa munu koo, wo gɔrɔ bo ’bɛnu zé ’léé fɔɔ yé wozé bɔ gbɔrɔnama lé nyanana, yuu ma yirivɔnazia.

⁸ Kyanfolizan Aaraja be Uziɛl ézé bo Misipa munu zé ’léé, yé lasikɔrɔ kɛlɛzan Aanania ézé bo kyanfolizan zé ’léé. Wo Jérusalɛm zi gɔrɔ bo fɔɔ yé é bɔ gɔrɔ blɛn ma.

⁹ Uru be Réfaja lé é ke Jérusalɛm lé tɛrɛ lɛ do nwiinzan nya, é gɔrɔ ma’lɛrɛ lasikɔrɔ kɛlɛzan zé ’léé.

¹⁰ Arumaf be Jédaja gɔrɔ bo wozé ’léé, ébo lé kɔn yara, yé Asabinia be Atus ézé bo ’bɛ zé ’léé.

¹¹ Arim be Malkija valé Pasat‐Moab be Asub gɔrɔ lɛ do bo yé wo ’furu lé dɔlafɛ ma’lɛrɛ.

¹² Alosɛs be Salum lé ke Jérusalɛm tɛrɛ lɛ do nwiinzan nya, yee valé é lunu ’wozé bo wozé ’léé.

¹³ Flagɔrɔ ’léé lé wa laama gɔworona, Anun valé Zanoas munu a bo yé wa duoli vɔ. Wo duoli ta loru lɛ tan, yé wa duoli vɔ yé wa lɛtan foliɛwɔlɛnu vɔ a ta. ’Bɛ ta loru, wo gɔrɔ bo mɛtrɛ wuru fié yɔ soru, yé wo bɔ flagɔrɔ ’léé lé wa laama wibo vulina, a ma.

¹⁴ Rékab be Malkija lé ke Bɛt‐Akérɛm lé fɛna nwiinzan nya, gɔrɔ ’léé lé wa laama wibo vulina, é ’bɛna dɔ yé é a ’léé duoli vɔ. É duoli ta loru lɛ tan, yé é a duoli vɔ yé é a lɛtan foliɛwɔlɛnu vɔ a ta.

¹⁵ Kol‐Ozé be Salum lé ke Misipa lé fɛna nwiinzan nya, flagɔrɔ ’léé lé wa laama ’yibɔna, é ’bɛ ma’lɛrɛ yé é ’bɛ lé duoli vɔ. É duoli ta loru lɛ tan, yé é a duoli vɔ yé é a lɛtan foliɛwɔlɛnu vɔ a ta. ’Bɛ ta loru, Siloé ’yiguru lé ke minwiinzan blɛn lé zianféi sɔnɔ, é ’bɛna gɔrɔ bo fɔɔ yé é bɔ sikalié lé é zunwo David lé fla, a ma.

¹⁶ Azbuk be Néémi lé ke Bɛt‐Suu lé tɛrɛ lɛ do nwiinzan nya, é gɔrɔ bo fɔɔ yé é bɔ Davidnu vun yɛrama, fɔɔ yé é bɔ ’yiguru lé wa bo, a ma, fɔɔ yé é bɔ sunya nyanazannu lé kɔn ma.

¹⁷ ’Bɛ zé ’léé lé Lévinu wozé bo, ’té Bani be Réum a wo nwiinzan nya; Asabia lé ke Kéila lé tɛrɛ lɛ do nwiinzan nya, é gɔrɔ bo Lévinu zé ’léé, ’é bɛn lé we ma.

¹⁸ A zuo wo bwenu wozé bo; Kéila lé tɛrɛ lɛ do nwiinzan Énadad be Bavai a wo nwiin;

¹⁹ Jozué be Ézɛ lé é ke Misipa nwiinzan nya, é gɔrɔ lɛ do ma’lɛrɛ, gulidanfɛnu tadɔkɔn yara zia, gɔrɔ sun la.

²⁰ A zuo Zabai be Baruk gɔrɔ lɛ do ma’lɛrɛ é bli faa nya, é sia yee gɔrɔ sun duo ma fɔɔ yé é bɔ Balebanmunu ’lɛzan Éliasib lé kɔn ’léé.

²¹ A zuo Akɔs be Uri be Mérémɔt gɔrɔ lɛ do ma’lɛrɛ, é sia Éliasib lé kɔn ’léé yé é a dɔ a sun la.

²² A zuo Jérusalɛm zi Balebanzannu wozé bo.

²³ Wo zuo Bɛnjamɛn valé Asub wozé bo ’wolé kɔn yara. Wo zuo Anania be Maaséja be Azaria ézé bo ’élé kɔn sɔnɔ.

²⁴ A zuo Énadad be Binui gɔrɔ lɛ do ma’lɛrɛ, é sia Azaria lé kɔn ma, fɔɔ yé é bɔ gɔrɔ sun valé a soro gi.

²⁵ Uzai be Palal ézé bo a sun yɛrama, dɔtafɛ torole lé ke minwiinzan blɛn lé kɔn ’lɛ zia bokɔn gɔrɔ sɔnɔ, ana. A zuo Paréɔs be Pédaja ézé bo.

²⁶ Sɔkɔn gi nyanamapamunu lé woo nyanaan gɔ nwiin, wozé bo fɔɔ yé wo bɔ flagɔrɔ ’léé lé wa laama ’yinu, a yara, yirinwanazia, é valé dɔtafɛ lé ke é nwale bɛ, a yara.

²⁷ Wozé zuo Tékoa munu gɔrɔ lɛ do ma’lɛrɛ, dɔtafɛ blɛn lé ke é nwale, a yara, fɔɔ yé é bɔ gɔrɔ lé ke gɔ ma, a ma.

²⁸ Flagɔrɔ ’léé lé wa laama wisoonu, Balebanzannu faa wozé bo ’bɛna loru zia wolé kɔn yara do do.

²⁹ Wozé zuo Imɛɛ be Sadɔk gɔrɔ bo élé kɔn ’lɛ. Azé zuo Sékania be Sémaéja lé ke yirinwanazia duoli tabinzan nya, ézé bo.

³⁰ Wozé zuo Sélémia be Aanania valé Anun lé ke Salaf be suiɛdozan nya, wo gɔrɔ lɛ do ma’lɛrɛ. Wozé zuo Bérékia be Mésulam ézé bo ’é yiakɔn yara.

³¹ A zuo kyanfolizan Malkija ézé bo fɔɔ yé é bɔ sɔkɔn gi nyanamapazannu valé yaawozannu lé kɔn ma, flagɔrɔ ’léé lé wa laama Mifikad, a ma, fɔɔ yé é bɔ gɔrɔ soro gi gɔnwiinkɔn ma.

³² Kyanfolizannu valé yaabozannu wozé sia gɔrɔ soro gi gɔnwiinkɔn ma, yé wo bɔ flagɔrɔ ’léé lé wa laama ’blanu, a ma.