Néémi 2 - Kazambale lé Sebe Sauunu 1979

Néémi go Jérusalɛm

¹ Moné vininzan lé wa laama Nisan, minwiinzan blɛn Aatazɛɛsɛ lé plale mi nwiin lɛɛ yɔ dozan nya, bléyian va lé dɔrɔ ke é dɔrale minwiinzan blɛn ’lɛ, maa dɔrɔ sia yé maa a nɔ a lɛ. Turu é kyɛn é ’ka tan an yara kyɛ vinin ye lɛ é vɔle a gi monomono lo.

² Minwiinzan blɛn lé an lɛ léé: Mɛmalé i yara kyɛ vɔ a gii? Gyɛ ’ka i ma lo; we ’ko éé sié i bli kyɛdɔle va. Kana blɛn zén an gi,

³ yé maa a zi pa minwiinzan blɛn lɛ léé: Minwiinzan blɛn ’é vo é yuɛma ma, té ’bɛ glɛ ’é dɔ lo ma. Fla lé an tranu vun ke a ta, wa sɛrɛ, yé kyɛ alé duolinu ble ’naan, ’té mɛmalé an yara kyɛ ’ka vɔa gian loo?

⁴ Yé minwiinzan blɛn lé an lɛ léé: I léé, maa kɛlɛ kaa? An bazoro lanu lé Bale lɛ,

⁵ yé maa a zi pa minwiinzan blɛn lɛ léé: Dé maa minwiinzan blɛn yuɛi bɔ, dé maa i wuozan sɔ i lɛ, ’i zi nɔ an lɛ, ’an go Juda tɛrɛ la, fla lé an tranu vun ke a ta, ana, yé maa a bɛ pa.

⁶ ’Té minwiinzan blɛn na a é nyanale é sɔnɔ, yé é lé an lɛ léé: Yi nɔ ta lé i dan go lɛ a wo lɛɛ? Yé i dan nɔla lɛ i pa gi yi kyɛn nyaa? Maa a yi fe a lɛ, yé é an gole nyi si.

⁷ Yé maa lé minwiinzan blɛn lɛ léé: Dé an minwiinzan blɛn yuɛi bɔ, ’é lɛtrɛnu nɔ an lɛ gbɔrɔnamanu lé wo ke yuu zi, wozé nya, léé, ’wo zi nɔ an lɛ léé, ’an gié yé ’an go Juda tɛrɛ la.

⁸ Yé é ziin, ’é lɛtrɛ do nɔ an lɛ Azafa lé ke minwiinzan blɛn lé pɔrɔtabinzan nya bɛ, azé nya, léé, ’é yili tegelenu nɔ an lɛ kɔn plɛplɛ lé ke Bale lé kɔn sɔnɔ bɛ, alé duolinu kɛlɛle we ma, yee valé fla zi gɔrɔ koo, kɔn lé maa dan yii lɛ a gi koo, wozé nya. Anlé Bale bɛ zin a é pale an ta, amalé minwiinzan blɛn lɛtrɛnu ’ko nɔ an lɛ.

⁹ Gbɔrɔnamanu lé wo ke yuu zi bɛ, an go wo va, yé lɛtrɛnu lé minwiinzan blɛn a pa an lee, maa wo nɔ wo lɛ. ’Té minwiinzan blɛn sunyanu nwiinzannu valé wisootazannu pa an va.

¹⁰ Orɔn mi Sanbalat valé miwuozan Amɔn mi Tobija a ’ma aan wo léé, mi do da wezin kɛlɛ lɛ Izraɛlnu lɛ, é ’na wo ma é baba.

¹¹ An bɔ Jérusalɛm, yé an yi yaa kɛlɛ ’bɛna.

¹² ’Bɛ zuo, maa valé mi kenu nwa é béli, ’té we lé anlé Bale a pa an bli gi léé, maa a kɛlɛ Jérusalɛm, maa ’ka tan a zuo fe lɛ mi do kpen lɛ lo. Dé é ’ka wi lé an vɔ a ta, a nya lo, ’té wi bɛ ’ka an va lo.

¹³ An bɔra é béli flagɔrɔ ’léé lé wa laama gɔworona, ana zia, yé an yara dɔ dragɔn ’yibɔna zia, yee valé flagɔrɔ ’léé lé wa laama wibo vulina, ana zia. Yé maa a ye léé, Jérusalɛm zi gɔrɔ a é zanale yé kyɛ alé flagɔrɔ ’léé duolinu ble.

¹⁴ An gié flagɔrɔ ’léé lé wa laama ’yibɔna, a sɔnɔ, é valé minwiinzan blɛn lé ’yidoo sɔnɔ, naa, wisoo lé ke an wuo, a giéna do kpen ’ka lo.

¹⁵ An gié é béli ’yiyorona plɛplɛ na, yé an fla zi gɔrɔ ma nagini. ’Bɛ zuo, yé an wɔra flagɔrɔ ’léé lé wa laama gɔworona, ana, yé an bɔ an pa gi.

¹⁶ Fɛan zo lé an go yé an gié nuu, wean maa a kɛlɛ, flazan do kpen ’ka a gi dɔɔ lɛ lo. Fɔɔ bléyi ’ko va, maa ’ka we ’ko zuo fe lɛ Juifinu lɛ lo, dé é a Balebanzan nyaoo, dé é a mi segelenu nyaoo, dé é a weblemunu nyaoo, munu lé wo ke nyanama ma, dé é a wo nyaoo, maa ’ka we do kpen fe lɛ wo lɛ lo.

¹⁷ Yé maa lé wo lɛ léé: Kaa lé we a naané fɛan zo bɛ, ka ye; Jérusalɛm kɛlɛ é ’bin nya, yé kyɛ flagɔrɔ ’léé duolinu ble; ’ka da, kaa Jérusalɛm zi gɔrɔ bɛ bo é ziin, té yara é kaa gyɛ é dɛrɛ lo.

¹⁸ Yé fɛan zo lé anlé Bale bɛ zin a é pale an ta, maa a zuo fe wo lɛ, yé dére lé minwiinzan blɛn a fe an lɛ, maa a fe wo lɛ. Wo léé: Kaa nwa, yé kaa a dɔ. Yé wo fuu dɔ ’wo ke ta, an bligiwe ’ko ma.

¹⁹ Orɔn mi Sanbalat koo, miwuozan Amɔn mi Tobija koo, Arabu mi Gésɛm koo, wo we ’ko ’ma aan wo, wo we nana ko ma yé wo ko ye boawe kɛlɛzannu nya. Wo léé: Mɛ lé ka kɛla bɛɛ? Ka a nwana minwiinzan blɛn maa?

²⁰ Yé maa zi pa wo lɛ léé: Lanu gi Bale é dan we ’ko va gyɛ lɛ ko lɛ. Ko, a wuozannu, ko dan nwa lɛ yé ko dan a dɔ lɛ, naa, ’kaa, ka dɔna kaan lo, yé kazé ’ka a gi lo; yé ka tɔ ’ka Jérusalɛm va lo.