Néémi 13 - Kazambale lé Sebe Sauunu 1979

Néémi Bale lé wenu dɔ wo dɔna

¹ ’Bɛ bléyi ’ko va, wo Moizi lé sɛbɛ ta fe munu faa yuɛ va, yé wa ye a gi léé, té Amɔnnu valé Moabnu ’é zén ékeva Bale lé munu nya monomono lo.

² Wo ’ka fɛblele valé ’yi nɔ lɛ Izraɛlnu lɛ lo, yé wo gɔɔli nɔ Balaam lɛ léé, ’é bale pa wo ma, azama. Naa, kolé Bale ko ma balepale nɔla ko drɔɔ vole nya.

³ Wo bélidɔwe ’ma aan wo, wo bɛnnu faa si Izraɛl va.

^4-5 É vinin, kɔnmi blɛn do ana kolé Bale lé kɔn gi, ’té woo fɛnu tééan ana; blɛnu koo, lasikɔrɔpo koo, nyanamapafɛnu koo, ’sa vuzannu koo, dɔrɔ’yi vininzannu koo, nyɔnɔ koo, ’té munu éé wo no Lévinu koo, lɛrɛvɔmunu valé kɔntayuɛpazannu koo, Balebanzannu koo, wozé nya bɛ, woo yee fɛnu ’ko tééan yee kɔnmi zi. Naa, Balebanzan Éliasib éé nyanaan kolé Bale lé kɔn gi, yé é kɔnmi blɛn ’ko nɔ é lele Tobija lɛ, yé ’bɛ nyana a gi.

⁶ We ’ko faa kɛlɛ bléyi va, ’té maa ’ka é dɛrɛ Jérusalɛm lo. Babilɔn nwiinzan blɛn Aatazɛɛsɛ plale mi nwiin lɛɛ yɔ do wɔlɛ vu ta fiézan nya, an nɔla an pa gi Babilɔn.

⁷ Lɛɛ ’ko nyaa bléyian va, minwiinzan blɛn zi nɔ an lɛ léé, an go é ziin Jérusalɛm. Wenaané lé Éliasib a kɛlɛ, kɔnmizi do nɔle nya Tobija lɛ Bale lé kɔn gi, maa a ye.

⁸ We ’ko ’na an ma é baba, yé an Tobija lé fɛnu faa bɔra béera,

⁹ yé maa lé wo lɛ léé, ’wo kɔnmi zi ’ko ’lɛ dɔ é pa gi yé Bale lé kɔn gi nyanamapafɛnu koo, blɛnu koo, lasikɔrɔpo koo, maa wo pla ana wo pa gi.

¹⁰ Maa a ’ma é ziin léé, wo ’ka Lévinu lé fɛnu nɔ lɛ wo lɛ lo, yé Lévinu valé lɛrɛvɔmunu lé ke Bale lé nyanamapazannu nya, wo faa fwila yé wo go ’wolé tɛrɛ la.

¹¹ Maa we pla minwiinzannu lɛ a fele nya léé: Mɛmalé ka sɔn vɔ Bale lé kɔn maa? Yé an Lévinu valé lɛrɛvɔmunu zén ékeva, yé an wo dɔ wo dɔna.

¹² ’Bɛ zuo, Judamunu faa da ’sa vuzannu koo, dɔrɔ’yi koo, nyɔnɔ koo, wo nya, fɛtéékɔn gi.

¹³ An fɛtéékɔnnu tabinle bɛ pa Balebanzan Sélémia koo, sɛbɛgifezan Sadɔk koo, Lévi mi do Pédaja koo, wo lee; yé an Matania be Zakuu be Aanan pa wo va. Naa, wo wo ma we fe léé, wa yarapawelazannu nya, azama. Yé maa fɛnu gulile wo bwenu ma bɛ pa wo lee.

¹⁴ Oo Bale, an sele ’é dɔ i gi we ’ko lé we ma ma. Yé wezin lé maa kɛlɛ anlé Bale lé kɔn valé alé nyanama ma, té a sele é san i gi lo ma.

¹⁵ ’Bɛ bléyi va, an munu ye Juda tɛrɛ la, ’té woo dɔrɔporo zɔn‐o wo gane nya flinyi nya, ’té woo ’sanwunnu sian, ’té dɔrɔ koo, dɔrɔporo koo, bɔrɔyiliporo koo, fɛ gɔnɔ faa koo, ’té woo wo vɔa sokofalenu punu yé wo da wo nya Jérusalɛm flinyi nya. Yé yian nya lé wo da wolé fɛ dan lɛ, an we pla wo lɛ ’bɛ yi la.

¹⁶ Tii mi kenu é ziin, wo nyana Jérusalɛm, ’té woo dan pɔnu valé flɛ gɔnɔ faa do do nya, ’té wa daan Juda munu lee Jérusalɛm flinyi nya.

¹⁷ An we pla Juda munu segelenu lɛ, yé maa lé wo lɛ léé: We naanénu lé ka kɛla, ’té ka flinyi sɔnné sɛra, ’bɛ gi lé nɔɔ?

¹⁸ A zoan ka tranu a kɛlɛ loo? Alé we ma‐an kolé Bale we tɔntɔnnu bɔ ko valé fla ’ko ma loo? Yé ’kaa, ka a dana bliflile nya é ziin Izraɛl ma, flinyi sɔnné sɛrɛle nya.

¹⁹ Yé maa lé wo lɛ léé, dé fula pa tɔɔn, ’wo Jérusalɛm gɔrɔ lɛnu tan flinyi pélisiale ’lɛ; té wo wo lɛ so lo fɔɔ yé flinyi é gié. Yé maa an wuozannu va mi kenu dɔ flagɔrɔnu ’léé nuu, té ’wo wɔra Jérusalɛm kɔnénu nya flinyi nya lo.

²⁰ Yé yaabozannu valé flɛ gɔnɔ do do faa danzannu wo yii Jérusalɛm gɔrɔ zi gɔnɔ do gɔnɔ fié.

²¹ Maa we pla wo lɛ léé: Mɛmalé ka yii gɔrɔ zii? Dé ka ’bɛ kɛlɛ é ziin, maa dan an bɛ mane lɛ ka ma. É sia ’bɛ bléyi va, wo ’ka da lɛ é dɛrɛ flinyi nya lo.

²² Yé maa lé Lévinu lɛ é ziin léé: ’Ka kabo kɛlɛ tegele yé ’ka da ka yuɛ pa flagɔrɔ ’léénu ta, té wo flinyi sɛrɛ lo we gi. Oo, anlé Bale, an sele ’é dɔ i gi we ’ko ma ma, yé ’i an tabin ilé nyanai zénle blɛn yɛrama ma.

²³ ’Bɛ bléyi duo va, an Juifinu ye, ’té Azdɔd lomu koo, Amɔn lomu koo, Moab lomu koo, ’té wo wo si wo nanu nya.

²⁴ Wo benu lɛ do éé Azdɔd dére vɔa, yé wo ’ka bɔa Juifi dére vɔle lɛ lo. Dé é a bɛn‐oo bɛn‐an nyaoo, yee ɛ dére lé wa vɔa.

²⁵ An we pla wo lɛ yé an bale pa wo ma. Maa wo va mi kenu bla, yé an wo nwin soowɔla, yé maa léé, ’wo bale ’nyɔɔn léé, ’wo ’ka dan ’wo lunu nɔ lɛ wo benu lɛ lo; yé ’wo ’ka dan wo lunu si lɛ ’wo benu valé wobozen zé nya lo.

²⁶ A zo wenya?-?néan Izraɛl nwiinzan blɛn Salomɔn a kɛlɛ loo? Bɛn kiɛre faa va, ’bɛ zo minwiinzan blɛn ’ka kɛlɛ lɛ a zo lo; é sɔ élé Bale lɛ yé Bale a dɔ Izraɛl nwiinzan blɛn nya, naa, duowo bɛnlomu a sia ana yé é wenyané kɛlɛ.

²⁷ É a lé wo ka ma we fe léé, ka é ziin, ka weple blɛn ’ko zo kɛlɛ, yé ka wenyané kɛlɛ kolé Bale ma, bɛnlomu sile nyaa?

²⁸ Balebanmunu ’lɛzan Éliasib be Jojada be do Orɔn mi Sanbalat lu si. Maa a bin an ma baa.

²⁹ Oo, anlé Bale, wo sele ’é dɔ i gi, naa, ilé baleban nyanama valé ilé gipawe lé Balebanzannu valé Lévinu a kɛlɛ, wa sɛrɛ.

³⁰ An bɛnnu faa si wo va, yé we lé é a lé Balebanzannu valé Lévinu a kɛlɛ, an dɔ a ta é ziin, yé maa wolé nyanama gɔɔn wo lɛ do do.

³¹ Yé kyɛ lé woo dan a nya Bale lɛ blɛ nya, ’té wa nɔyi dɔ bɛ, ’é valé féifɛ vininnu nya, an dɔ a ta. Oo, anlé Bale, an sele ’é dɔ i gi yé ’i wezin kɛlɛ an lɛ ma.