Néémi 1 - Kazambale lé Sebe Sauunu 1979

Néémi bazoro Izraɛlnu lé we ma

¹ Akalia be Néémi dérenu lé ke ’ko. Moné sɔraziɛnzan lé wa laama Kisilu, Aatazɛɛsɛ lé plale mi nwiin lɛɛ yɔ dozan nya, ’té maa a fla blɛn lé wa laama Suz, a ta,

² yé an bwe do lé wa laama Aanani, é valé mi kenu si Juda yé wo bɔ an va. An we laa wo lee Juifinu lé wo si luu gi, ’té wo ke é yuɛma tan, ’wo valé Jérusalɛm lé we ma.

³ Wa zi pa an lɛ léé: Munu lé wo si luu gi yé wo vo ana, wa tɛrɛ bɛ do la; we tɔntɔn blɛn bɔ wo ma, yé wo vo serelebomazannu nya. Jérusalɛm zi gɔrɔnu faa zana, yé alé duolinu kyɛ ble.

⁴ Maa we ’konu ’ma aan wo, an nyana wuvɔle nya, yé an yi kiɛre kɛlɛ anlé tɛrɛla lɔrɔ nyaale an ma gi. An lɔrɔ sɔn yé an bazoro lanu lé Bale lɛ,

⁵ yé maa léé: Gakelebale, lanu lé Bale, Bale blɛn, kana a lee Bale, bii lé ilé gipawe lɛsɔɔan, yé munu lé i sɔ wo lɛ, ’té woo ilé bélidɔwe ta tawoo, i nyanai éé zén‐é wo ta,

⁶ ’i an ban i tɔné nya, yé i yuɛ é vo é fuole an lɛ. Ba lé i wuozan ke a zorona bléyi ’ko va, i wuozannu Izraɛl lé we ma bladi nyanadi, ’i tɔné dɔ a lɛ. An Izraɛlnu lé wenyané fé, wenyanénu lé ko kɛlɛ i ma, maa a wo fena. Naa, maa valé an ti lé kɔn gi munu, ko wenyané kɛlɛ.

⁷ Ko i ’namawe kɛlɛ, yé ko ’ka i sɔnné pa lɛ lo; bélidɔwenu valé dére lé bé fe i wuozan Moizi lɛ, ko ’ka wo ta tawo lɛ lo.

⁸ Dére ’ko lé i a pa i wuozan Moizi ’léé, léé, ’é a fe, a sele ’é dɔ i gi ma; i léé: Dé ka wenyané kɛlɛ bléyian va, an dan ka nwɛɛn lɛ bɛnnu méléna,

⁹ naa, dé ka da an va é ziin, yé dé ka an sɔnnénu pa yé dé ka wo ta tawo, dé wo ka bin fɔɔ yé ka bɔ la glɛ sinaoo, maa dan ka si lɛ ’bɛna yé maa ka zén ékeva, yé fɛ lé maa ana si a va an tɔ pale ’bɛna we ma, maa dan da lɛ ka nya ’bɛna é ziin.

¹⁰ Wa ilé munu nya, wa i wuozannu nya, yé i wo tabo ilé plɛplɛ valé i bɛ plɛplɛ nya.

¹¹ Aa, Mizan, ’i i wuozan lé bazorodére ban i tɔné nya, i wuozannu lé é sɔ wo lɛ léé, wo kana i tɔ ma, ’i tɔné dɔ wolé bazorodére lɛ. ’I wuozan lé we nyian wo kyɔ, yé maa mi ’ko yuɛi bɔ ma. ’Bɛ bléyi ’ko va ’té maa a minwiinzan blɛn lé dɔrɔtabinzan segele nya.