Naum 3 - Kazambale lé Sebe Sauunu 1979

¹ Mi nyɛ zana fla lé é ke é fanle Viéwole koo, glawe koo, wo nya bɛ, Yé ’té é ’ka daan glawe kɛlɛle ma bɛ lo, we tɔntɔn ’é bɔ a ma ma.

² Woo vlewɔlɛnu vun maan, Woo goroganenu vun maan, Woo wisoonu lé vlanburule vun maan, Woo gulidangoronu vun maan!

³ Wisootazannu éé fɔrɔan, gwɔun ta éé bié, din ta éé bié nyananyana, Mi gu blɛn a é tuole, mi galenu zun a é tééle. Mi galenu ’léé ’ka nyaan lo, Woo diaan mi galenu ta.

⁴ We ’konu bɔ gɔné gini le lé gɔnéginile kiɛre zi, Éé mi sian ana nuu; éé yo kɛla kaiiné. Yee ɛ bɛngɔnɔnu saan élé gɔnéginile nya, Yé éé munu saan élé yokɛlɛle nya.

⁵ Sunyanu lé Gakelebale léma: Bé ye, maa a bii ɛ ma, Maa dan ilé sɔ nwa lɛ fɔɔ yé maa a zén i ’wuo ma, Maa dan i porole nagɔɔn lɛ bɛngɔnɔnu lɛ, Maa dan ilé yaragyɛwe nagɔɔn lɛ plaminwiin tɛrɛnu ta.

⁶ Maa dan tiridɔwenu faa bɔ lɛ i ma, maa dan i sɛrɛ lɛ munu gi, Yé maa dan i bɔra lɛ gɔrɔ la.

⁷ Munu faa lé wo dan i ye lɛ, wo dan si lɛ i ma baa, Yé wo dan a fe lɛ léé: Wo Ninive guru zana a gi! De ɛ dan azé fe lɛɛ? Maa dan i tɔrɔpaazannu ye lɛ kyɛɛn?

⁸ Ninive, i zin mini No‐Amon lɛɛ? Yee lé ke é nyanale yuunu méléna, ’té ’yinu a zi lɛ sɔɔ turu bɛ, ’té wɛyi ke wo takuunfɛ nya, ’té wɛyi ke a zi gɔrɔ nya, i zin mini a lɛɛ?

⁹ Étiopi valé Éjipiti munu lé wo nɔnɔ ’léé ’ka bɛ lo, wo ɛ ke alé plɛplɛ nya turu; Put valé Libi munu ɛ ke a bɔavazannu nya turu.

¹⁰ Duowo, é kɛlɛ lulami nya, é go ana luubale gi; wo alé nénu gyɛ ziblannu faa ta, wo ’munnu zun alé tɔzannu ma, yé wo gɔgɔbalenu vɔ alé mi blɛnnu faa ma.

¹¹ Bii é ziin, nwɛ é dan i gyɛ lɛ, yé i dan yɔɔ lɛ; bii é ziin, i dan i yɔɔna gini lɛ i nyanézannu lee.

¹² Ilé kɔn plɛplɛnu faa a bélé bɔrɔyili lé wo poro vinin tana wo nwiin, wo zo. Dé wo wo nyɔɔn, wo poronu éé vɔa wo blezan lee.

¹³ Bé ye, ilé munu a bélé lomu zo ka méléna; ilé flazi gɔrɔ lɛ so i nyanézannu ’lɛ; kyɛ ilé duolivɔagi yilinu ble.

¹⁴ ’I ’yi tɔ é nya do, i nyanézannu a dana ilé fla mabɛn lɛ. Ilé kɔn plɛplɛnu ma’lɛrɛ. ’I wɔra voli gi, ’i bɔtɛrɛ zɔn i gane nya. ’I ’furu bɛ dɔ briki nya.

¹⁵ ’Bɛna lé kyɛ é dan i ble lɛ; gwɔun é dan i kulu ga lɛ; é dan i ble lɛ bélé gangannu zo. ’Ka kɛlɛ kiɛre bélé seenénu zo. ’Ka fan bélé gangannu zo.

¹⁶ Ilé yaawomunu lé wo ke kiɛre é mini lagi monénénu ta, wa bélé gangannu lé woo bɛanu soian sile we ma, wo zo.

¹⁷ Ilé minwiinzannu a bélé gangannu zo; ilé fla zilɛzannu a bélé gangan gu blɛn lé woo nyanaan gɔrɔnu ta dunu bléyi va, wo zo; dé yiri siéla tɔɔn, woo sié, yé woo goo, yé wa kɔɔn fɛana é vinin bɛ, mi ’ka ’bɛna dɔɔa é dɛrɛ lo.

¹⁸ Asirimunu nwiinzan blɛn, ilé ’blatabinmunu a yigyɛna; ilé nyanazannu a flinna; ilé munu a é kinile ékema gɔnu nwiin, yé mi do kpen ’ka wo zénna ékeva lo.

¹⁹ I tuona gi lia ’ka é dɛrɛ lo. I manɔn a i gyɛfɛ nya. Munu faa lé wo dan i tawe ma lɛ, wo dan wo bɛ gyɛ lɛ i ’wuo ma; naa, mian i ’ka wenyané kɛlɛ lɛ ’bɛzan lɛ lo ’naan, ’bɛzan a kyɛɛn?