Naum 2 - Kazambale lé Sebe Sauunu 1979

Ninive guru zana a gi

¹ Ka ye, nwunvɔzan lé éé mi vole drɔɔ lé we fé, É a dana gɔnu nwiin. Juda munu, ’ka kalé fɛtinu kɛlɛ, ’ka kalé bale kunlenu lɛ sɔɔ. Naa, mi nyané ’ka dan gié lɛ ka méléna é dɛrɛ lo, A kulu ga tata.

² Fɛsɛrɛzan a dana i va; ’I kɔn plɛplɛ tabin, ’I zi tabin; ’i kyɛsidi dɔ i gyɛn. ’I dɔ plɛplɛ ilé plɛplɛ faa nya.

³ Naa, Gakelebale a Jakɔb lé fua dɔna ’é dɔna, Yé é a Izraɛl lé fua dɔna ’é dɔna. Naa, fɛsɛrɛmunu wo sɛrɛ, Yé wo wolé dɔrɔyilinu sɛrɛ, azama.

⁴ Yi lé é a dɔ gulidanyi nya bɛ, ’bɛ yi nya Alé nyanazannu botakuunfɛnu a sɔɔn; Galunaa sɔ ɛ ke é zénle alé gulidan sunyanu ta; Gulidagoronu bɔra foliɛwɔlɛ lé a ta éé bié nyananyana, a nya, Yé wa dinnu li kɛlɛna.

⁵ Gulidangoronu bɔra zinu ta, Woo vlanburuwo flaworo dii nuu; Dé i wo ye, wa bélé sonakyɛnu zo, Woo vlanburuwo bélé lɛɛ yuɛwuovɔle zo.

⁶ Alé nyanazannu sele éé dɔa a gi, Naa, woo vɔa dada wolé tawole gi; Woo goo é kele gɔrɔ gurunu va, Yé woo ’wo ma’lɛra ’wobo takuunle we ma.

⁷ Gɔɔn so yuunu ’lɛ, Yé fuakɔnnu guru zana a gi.

⁸ É kɛlɛ a zo. Wa poro, yé wo go a nya, A wuomunu a dunnuna bélé plawuonu zo, ’Té woo ’wo golɛnu gya.

⁹ É vinin Ninive a bélé guru blɛn lé é ke é fanle ’yi nya, a zo. Ana munu lé woo vɔa fli gi bɛ. ’Ka dɔoo, ’ka dɔ! Naa, wo vazan do kpen ’ka nɔla lɛ é pa gi lo.

¹⁰ ’Ka ’wii gɔɔlifu ta. ’Ka ’wii kyan ta. Fɛwezannu lé wo ’ka nyaan lo, wo ana. Fuafɛnu lé wo ke fɛwezannu gɔnɔ faa nya, wo ana.

¹¹ Wo ’wii a ta, wa guru zana a gi, wa sɛrɛ tata! Munu fuu éé sié wo ta, Wo powuonu so é ke ’léé, Wo sowɔlɛnu faa a yaana, Wo yara faa a fuolana.

¹² Fɛana lé golizra koo, golizra tina koo, a né koo, wo go yɔɔ lɛ, ’Té mi do kpen ’ka wo gi kyɛ dɔa ana lo, Golizra lé flinna, Golizra lé fɛblena, mɛ we ɛ bɔ i maa?

¹³ Golizra éé fɛ wi kinié ékema turu élé nénu zé nya, Éé fɛ gya turu é bɔrɔ ma, Golizra tinanu zé nya. Éé é yɛrɛ faan, winu lé éé wo gya, wo nya, Éé é yɔɔna faan fɛnu lé é ’wii wo ta, wo nya.

¹⁴ Sunyanu lé Gakelebale léma: Bé ye, maa a bii ɛ ma; Maa dan ilé gulidangoronu kɛlɛ lɛ kyɛgoi nya, Gwɔun é dan ilé golizra boronénu gyɛ lɛ, Maa dan i gyɛwi si lɛ tɛrɛ ’ko la gla nya, Yé wo ’ka dan ilé nwunvɔ munu dére ’ma lɛ é dɛrɛ lo.