Naum 1 - Kazambale lé Sebe Sauunu 1979

Bale bli fli Ninive ma

¹ Ninive mawe lé ke ’ko. Balelawe lé Elkɔs zan Naum a fe, alé sɛbɛ lo.

² Gakelebale a maawobale nya; é ézé lɛgi paan; Gakelebale é ézé lɛgi paan, a wɛwɛ a é baba. Gakelebale é ézé lɛgi paan ’é mazannu ma, Éé é nyanézannu va we paan é bli gi.

³ Gakelebale bli ’ka flian é kele lo, yé alé plɛplɛ a blɛn; Éé we lɛdɔa mi gi kpɔ. Gakelebale éé tawoo fu plɛplɛ gi, éé tawoo barikoko gi, Latinu ɛ ke a gane ma vungoi nya.

⁴ Éé bon‐ɛn‐an wɛyi nya yé ’bɛ éé bélié é guru gi. Éé yuunu faa bélié; Bazan tɛrɛ la valé Kaamɛl gɔnu éé kɛla tɔɔtɔɔ, Liban tɛrɛ la lu vwinu ma éé yuruan.

⁵ Gɔnu ma éé nyɔɔn‐an a ’lɛ, Gɔpanénu ’yi éé boo, Tɛrɛ éé wuo vɔa a yuɛ va, Tɛrɛ valé é ta munu nya.

⁶ De ɛ dan dɔ lɛ a wɛwɛ dɔle ’lɛɛ? De ɛ dan dɔ lɛ alé bliflile blɛn maa? A wɛwɛ éé sɔɔlaan bélé kyɛ zo, Yé gɔlɛgɔnu éé ’wiié a ’lɛ.

⁷ Gakelebale a é zin, É a mivɔzizan nya klebleyi la; Munu lé woo paan a ta, é wo dɔɔ.

⁸ Naa, é dan fla sɛrɛ lɛ wɛyi nwalenu lé Woo giéan ’wo glɛ la, wo nya. É dan é nyanézannu zuo bin lɛ fɔɔ yé wo bɔ gunutinu va.

⁹ Mɛ we nya lé ka gibɔrɔan Gakelebale maa? Yee ɛ fɛ sɛra. Kleblele ’ka dan bɔ lɛ ka ma a gɔnɔ fiézan nya lo.

¹⁰ Naa, kyɛ é dan wo ble lɛ Bélé lɔɔ gale zo tata. Wa é vurule ékema bélé lélinu zo, Bélé munu lé nwɛ éé wo gya, wo zo, azama.

¹¹ Mi lé éé gibɔrɔan wenaané nya Gakelebale ma, ’Té a ’wuogibɔrɔmawenu ke é naané, Bii Ninive ta lé ’bɛzan si.

¹² Gakelebale léma: Dé Asirinu a plɛplɛoo, dé wa dioo, wo dan wo gyɛ lɛ bélé ’sa zo, yé wo dan si lɛ ana. Niniveoo, maa dan i zun lɛ kiéné gɔnɔ do, ’té i kɛlɛle kiéné lɛ sɔɔ, ’té a bɛ ’ka lo.

¹³ Anlé bɛn, sin, an dan alé luubale si lɛ i bɔrɔ ma, yé maa dan i yerebalenu kini lɛ.

¹⁴ We lé Gakelebale a fe ’kaa Ninive munu ma, yee lé ke ’ko: Ka kulu ’ka dan kɛlɛ lɛ yé ka tɔ é pa ’bɛ ma é dɛrɛ lo; maa dan yoyilinu valé fɛ serelenu si lɛ kalé yokɔn gi. Ka bɛn ’ka lo, amalé maa dan ka pa gi guru bo lɛ.