Misé 7 - Kazambale lé Sebe Sauunu 1979

Izraɛl lé we a é sɛrɛle

¹ Yiba! Mɛ nyanainya we ɛ bɔ an ma a zoo? Maa a bélé mi lé é go féi gɔi, a zo, bélé mi lé é go dɔrɔ gɔi, a zo. Dɔrɔporo do kpen ’ka lo; bɔrɔyili poro lé an bli bɔ a ma, a do kpen ’ka lo.

² Mi zin ta saan tɛrɛ ’ko la, yé mi tegele do kpen ’ka blaminu va é dɛrɛ lo; wo faa a zi bɛnna mi nyɛ zanale we ma; wo faa do do éé san vɔa ’wo bwenu lee.

³ Wo bɛla a kelekele wenaané kɛlɛle we ma; mi blɛnblɛnnu éé blɛfɛ laan gla nya, yé weblemunu éé we blé gɔɔli ma, yé mi blɛn élé bli blɛn nagɔɔn‐an. A zo lé wo ’wobo ma kwa kulian.

⁴ Wo va mi zin a bélé plénsɔnné léli zo. Wo va mi drɔle a é naané é mini léliyili lɛ. Yi lé kalé balelayemunu a fe, we lɛdɔ ka gi yi nya bɛ, é bɔ é pu. ’Bɛ yi nya lé wo gi é dan blin lɛ wo ma.

⁵ Té i bli é vo i béé lɛ lo, té i pa i béé boen ta lo. Le lé ka yiian a nya saa do ta, té i ’léé fuo a va lo.

⁶ Naa, mi é dan é ti sɔnɔ lɛ; blɛnzan é dan nwa lɛ é bu ma; mi be na é dan nwa lɛ é zana bu ma, yé mi nyanézannu é dan kɛlɛ lɛ élé kɔngimunu nya.

Bale ɛ mi sié we gi

⁷ Dé é a anzé nya, an dan an yuɛ vo lɛ Gakelebale lɛ, yé maa dan pa lɛ an siéwegizan Bale ta. Anlé Bale é dan an dére ’ma lɛ.

⁸ An nyanézan, té i gi é nana anlé we ma lo ma. Naa, dé an dia, an dan nwa lɛ. Dé maa a é nyanale gunutinu va, Gakelebale é dan kɛlɛ lɛ an vakinifɛ nya.

⁹ Maa wenyané kɛlɛ Gakelebale ma, amalé maa dan an ’wuo dɔ lɛ alé bliflile wuo fɔɔ yé é dɔ an zuo, yé é anzé kɛlɛ néné. É dan go lɛ an nya fɛna fu na, yé maa dan alé we tegele nagini lɛ.

¹⁰ An nyanézan é dan a ye lɛ yé yara é dan a gyɛ lɛ; yee lé éé a fé turu an lɛ léé, Gakelebale, ilé Bale a kyɛɛn? bɛ, yee lé. Wo dan a zɔn lɛ ’wo gane nya bélé zia voli zo. Maa dan a ye lɛ yé an gi é dan nana lɛ.

¹¹ Yian nya lé wo dan bii Jérusalɛm zi gɔrɔ bo lɛ, a yi nya lé i glɛ é dan bié lɛ é zuo.

¹² ’Bɛ yi la, munu é dan si lɛ Asiri tɛrɛ koo, Éjipiti tɛrɛ la fla blɛnnu koo, wona, é sia Éjipiti ma fɔɔ yé é bɔ yuu ma, é sia wɛyi do ma yé é bɔ a koɛ ma, é sia gɔ do ma yé é bɔ gɔ koɛ ma, wona munu é dan da lɛ ka va.

¹³ Tɛrɛ é dan sɛrɛ lɛ a tamunu koo, wo kɛlɛwenu koo, wolé we ma.

Bale nyanai é dan zén lɛ Izraɛl ta

¹⁴ Ilé munu, ilé trubɛ lé ke ilé tɔnɔyémafɛ nya, ’té wo ke é nyanale Kaamɛl gɔnu méléna pɔrɔ gi wo saa, ’i wo pa ilé ’blatabinyili nya; ’wo fɛ ble Bazan valé Galaad tɛrɛ la bélé é vinin zo.

¹⁵ Maa dan we blɛnblɛnnu kɛlɛ lɛ ka yuɛ va, bélé fɛan zo lé maa kɛlɛ yian nya lé maa ka si Éjipiti tɛrɛ la, a yi nya, a zo.

¹⁶ Bɛn gɔnɔnu é dan a ye lɛ yé wo gi é dan blin lɛ wo ma. Dé wolé plɛplɛ a blɛn‐oo, wo dan ’wo bɛ bua lɛ ’wo lɔlu la, yé wo tɔné é dan ’wii lɛ wo ’wuo ma.

¹⁷ Wo dan vungoi ble lɛ bélé méné zo, bélé tawoplɛlawinu zo tɛrɛ la. Dé wo si wolé guliyɔɔkɔn plɛplɛnu gi, di é dan kini lɛ wo gi; wo ma é dan nyɔɔn lɛ Gakelebale kolé Bale ’lɛ, yé wo dan kana lɛ a ma.

¹⁸ I bɔmabale a kyɛɛn? Bii lé i mi ma we vo alé weple ma, yé ilé mi sɛ lé wo vo, wolé wenyané éé saan i gi, i bɔmabale a kyɛɛn? I bli ’ka vo flina yifaama lo; nyanai zénle mi ta sɔ i lɛ.

¹⁹ I nyanai é dan zén lɛ é ziin ko ta; i dan kolé weplenu pla lɛ i gane wuo, i dan kolé wenyanénu vuli lɛ wɛyi wɔlɛ ma.

²⁰ I dan a gɔɔn lɛ Jakɔb lɛ léé, i a yarapawelazan nya, yé i dan a gɔɔn lɛ Abraam lɛ léé, i a é zin, fɛan zo lé bé fe ko tranu lɛ ibo ’nyɔɔnle nya é vinin, a zo.