Misé 6 - Kazambale lé Sebe Sauunu 1979

We lé Bale ke a va

¹ We lé Gakelebale ke a fena, ’ka tɔné dɔ a lɛ. ’I nwa, ’izé fe gɔ blɛnnu punma; gɔpanénu ’wo i dére ’ma ma.

² ’Kaa gɔ blɛnnu, ’ka tɔné dɔ Gakelebale lé webledére lɛ. Yé ’kaa tɛrɛ gane gliglinu, ’ka tɔné dɔ ma, naa, Gakelebale valé élé munu a we blena. É sɔ a lɛ léé, ’ézé fe Izraɛl ma.

³ Anlé munu, mɛ fɛ lé maa kɛlɛ ka lɛɛ? An ka wɔlɛgi nyaa mɛ we nyaa? ’Ka zi vɔ an lɛ ma.

⁴ Naa, maa ka si Éjipiti tɛrɛ la, maa ka si luubale gi, yé Moizi koo, Arɔn koo, Mari koo, an wo kɛlɛ ka ’lɛzannu nya.

⁵ Anlé munu, we lé é dɔ Moab nwiinzan Balak gi, ’ka bɔn‐in bɔrɔ ’bɛ ma do, yé we lé Béɔɔ be Balaam a zi pa a lɛ, ’ka gibɔrɔ ’bɛ ma do, yé we lé é bɔ Sitim valé Gilgal méléna, ’ka gibɔrɔ ’bɛ ma do, yé wezin lé Gakelebale a kɛlɛ, ka dan a gi dɔɔ lɛ.

⁶ An dan go lɛ Gakelebale va mɛ zantévɔfɛ nya an lee, yé an ’wuo wɔra Loruzan Bale gane wuoo? An dan go lɛ balebanwi lé wa kyɛ blé, a nya, taa, lɛɛ do dirigɔné léé?

⁷ Dé an go ’blagɔné wuru é wuru nya, Gakelebale é dan é ban‐ɛn ble lɛɛ? Dé an nyɔnɔ nɔ a lɛ bélé ’yiyorole kiɛre zo, é dan é ban‐ɛn ble lɛɛ? É a lé maa anlé né vinin nɔ bélidɔwenu lé maa wo sɛrɛ, a we maa? Maa dan an giné nɔ lɛ anlé wenyané ma ban nyaa?

⁸ Oo blami, we lé ke é zima, wa gɔɔn i lɛ; we lé é sɔ Gakelebale lɛ léé, bé kɛlɛ, yee lé ke léé, ’i we tegele kɛlɛ, yé nyanai zénle ’é sɔ i lɛ, yé ’i tawo bo kiéné nya ilé Bale va.

⁹ Gakelebale dére a wena fla, yé mi lé é we dɔɔ, é dan kana lɛ a tɔ ma. ’Ka vlewɔlɛ valé ézan dére ’ma ma.

¹⁰ Fɛwezan lé wa ye weple ma, é ana tan mi nyané lé kɔn gii? Fɛdangifɛ lé wa wɔra ékeva, ’té é ke balepamafɛ nya bɛ, é ana mii?

¹¹ Dé mi lé fɛdankilo a vié nya, yé alé kilo lé poanu a vié nya, ’té ’bɛzan a tegelee?

¹² Fla ’ko ta fuanu a é fanle glawe kɛlɛle nya, a tamunu éé vié woo, yé wo nɛnɛ a dabli nɛnɛnu nya wo ’léé.

¹³ Bɛwemalé maa dan ka bla lɛ kleblele nya, maa dan ’wii lɛ ka ta kalé wenyanénu lé we ma.

¹⁴ Ka dan fɛ ble lɛ yé ka ’ka kaan lo, ’té lɔrɔ a ka ma duowo. Ka dan fɛ tadɔ lɛ yé é ’ka dan vo lɛ ana lo, yé fɛ lé é vo ana, maa dan ’bɛ nɔ lɛ gwɔun lɛ.

¹⁵ Ka dan fɛ vɔ lɛ yé ka ’ka dan a gyɛ lɛ lo; ka dan ɔlivinyɔnɔ kɛlɛ lɛ yé ka ’ka dan nyɔnɔ gié lɛ ka ma lo. Ka dan dɔrɔ boro lɛ yé ka ’ka dan a ’yi mini lɛ lo.

¹⁶ Ka a Omri kɛlɛwe kɛlɛna, yé ka a we kɛlɛna Akab lé munu kɛlɛwe yɛrama, yé ka tawoo wolé wepladére yɛrama; amalé maa dan ka pa lɛ fɛsɛrɛzannu lee; maa dan bii fla tamunu kɛlɛ lɛ yérisiémazannu nya, yé yaragyɛwe lé anlé munu a kɛlɛ, é dan bɔ lɛ wo ma.