Misé 5 - Kazambale lé Sebe Sauunu 1979

Minwiinzan blɛn é dan si lɛ Bɛtléɛm

¹ Yé bii Bɛtléɛm Éfrata, Juda fla wurunu va fla kiéné, anlé mi do é dan si lɛ i va; a pélisiana mɔn é li kwakwa tɛrɛ bɔrale ’lɛ, yé é dan pla lɛ Izraɛl munu nwiin.

² Bɛwemalé Bale é dan élé munu pa lɛ munu lee, fɔɔ yé lezan lé néyaabléyi ’é bɔ, yé a bwe pɔnénu é da Izraɛlnu va.

³ É dan bɔra lɛ yé é dan pla lɛ munu nwiin Gakelebale lé plɛplɛ nya, Gakelebale alé Bale lé fuatɔ nya. Wo dan a tɔ bɔ lɛ fɔɔ tɛrɛ glɛ sina, amalé alé munu é dan nyana lɛ kli.

⁴ Yee ɛ dan munu vo lɛ drɔɔ. Dé Asirinu da kolé tɛrɛ la, dé wo wɔra kolé fuakɔnnu gi gla nya, ko dan munu pazannu sɔrafié valé mi blɛnblɛnnu sɔraa nwa lɛ wo ma.

We lɛdɔle bɛnnu gi

⁵ Wo dan pla lɛ Asirinu nwiin wolé gwɔun nya yé wo dan pla lɛ Nimrɔd lé tɛrɛ la flanu nwiin. ’Bɛ zo lé é dan ko si lɛ Asirinu lee, ’té dé wo da kolé tɛrɛ la yé wo wɔra ana gla nya.

⁶ Jakɔb kulu pɔnénu é dan kɛlɛ lɛ migɔnɔ kiɛre va bélé lolu lé é si Gakelebale va, a zo, bélé fli lé é vɔ lu ta, a zo. Wo bli ’ka blami lɛ lo, yé wolé we do kpen ’ka sié blaminu va lo.

⁷ Jakɔb kulu pɔnénu é dan kɛlɛ lɛ bɛngɔnɔnu va bɛn kiɛrenu méléna bélé golizra zo pɔrɔ gi winu va, bélé golizra boroné zo ’bla palunu méléna. Dé é a giéna, éé fɛ zɔn‐o é gane nya, ’té éé a wi kinié ékema, yé mi do kpen ’ka a sié a lee lo.

⁸ I bɛ ’é mini i mazannu lɛ ma; i nyanézannu faa kulu ’é ga ma.

⁹ Gakelebale léma: ’Bɛ yi la, maa dan kalé wisoonu nyaa lɛ; maa dan kalé gulidangoronu sɛrɛ lɛ.

¹⁰ Maa dan kalé flanu guru zana lɛ a gi kalé tɛrɛ la; maa dan kalé gulidankɔn plɛplɛnu faa guru zana lɛ a gi.

¹¹ Maa dan yokɛlɛle yi ga lɛ ka lee, yé yokɛlɛzan ’ka dan kɛlɛ lɛ ka va é dɛrɛ lo.

¹² Maa dan kalé miyilinu valé kalé yofotonu sɛrɛ lɛ tata yé ka ’ka dan dia lɛ ka bɛ kɛlɛfɛ ’lɛ é dɛrɛ lo.

¹³ Maa dan kalé Asataté miyilinu sɛrɛ lɛ tata, yé maa dan kalé flanu ’wii lɛ.

¹⁴ Bɛnnu lé wo ’ka ’wo tɔné dɔ lɛ an lɛ lo, maa dan anzé lɛgi pa lɛ wo ma, blifllile valé wɛwɛ dɔle nya.