Misé 3 - Kazambale lé Sebe Sauunu 1979

Bale Izraɛl zilɛzannu lé wenyané fe

¹ Maa léma: ’Kaa Jakɔb lé mununwiinzannu valé Izraɛl lé mi blɛnnu, ’ka tɔné dɔ. Ka‐an é a kɔɔn lé ka we tegele dɔɔ loo?

² Ka wezin za paan, ’té wenaané éé sɔa ka lɛ; ka anlé munu kɔlɛ boo, ’té ka wo nɛ sié wo wɔlɛ ma.

³ Woo anlé munu wi blé, woo wo kɔlɛ boo, woo wo wɔlɛnu ’wiié, woo wo wi kinié ékema woléwoléné bélé wa dɔnena bɔ gi, bélé wi lé wa dɔnena lɛeda gi, a zo.

⁴ ’Bɛ zuo wo dan siaa lɛ Gakelebale lɛ, naa, é ’ka dan we lɛ wo zi lo; ’bɛ bléyi va é dan é yara yɔɔ lɛ wo lee; wo wenaanénu kɛlɛ, azama.

⁵ Balelayezannu lé woo anlé munu saan, maa Gakelebale wo ma we fe léé: Wo lé, dé fɛ a wo lee yé wo vole drɔɔ we fe, yé dé munu ’ka fɛ no wo lɛ lo, yé wo guli lɛ kini bɛ, woo lé.

⁶ We ’ko ma lé, béli é dan tan lɛ ka ma, yé ka ’ka dan yuɛziwe ye lɛ lo. Gunu é dan dɔra lɛ ka ma, yé kalé ’moné ’ka dan din nɔ lɛ lo. Yiri é dan vɔ lɛ yee balelayezannu ma, yé gunu é dan dɔra lɛ wo ma é yiéyi.

⁷ Yara é dan kalé fɛnayezannu gyɛ lɛ, yé ’monédɔzannu yuɛ é dan tana lɛ. Kazambale ’ka dan we lɛ wo zi lo, amalé wo dan ’wo yara yɔɔ lɛ.

⁸ Naa, dé é a maa nya, maa a plɛplɛ é baba, yé Gakelebale Léli a an ta; we tegele a an gi, yé an fuu a an ta, Jakɔb lé wenyané blɛn gɔɔnle é lɛ we ma, ’bɛ valé Izraɛl lé wenyané gɔɔnle é lɛ we ma.

⁹ Jakɔb lé munu nwiinzannu valé Izraɛl lé mi blɛnnu, ’ka tɔné dɔ we ’ko lɛ. We tegele éé ka ta daan ka ma, ’té ka we drɔle plin‐an.

¹⁰ Ka Siɔn pa mi nyɛ nya, yé ka Jérusalɛm pa weple kɛlɛle nya.

¹¹ A nwiinzannu éé we blé blɛ yele we ma; alé Balebanzannu éé we paan mi gi ’wo ban yele we ma; alé balelayezannu éé balelawe fé gɔɔli va. É dɔ wo gi léé, wa é pale Gakelebale ta, ’té wa fé léé: Gakelebale ’ka ko va loo? Wenaané ’ka dan bɔ lɛ ko ma lo.

¹² Bɛwemalé, kalé we ma lé wo dan Siɔn kuu lɛ bélé féi bli zo; Jérusalɛm é dan kɛlɛ lɛ gɔlɛzun nya, yé pɔrɔ é dan vɔ lɛ Balekɔn dɔna gɔ nwiin.