Misé 2 - Kazambale lé Sebe Sauunu 1979

Munu lé woo weple bɔrɔan ’wo bɔn‐in

¹ Munu lé woo weple bɔrɔan ’wo bɔn‐in, ’té woo wenaané paan do ’wo yiɛna, wenaané ’é kɛlɛ wo lɛ ma. Dé tu kini tɔɔn, ’té wa kɛlɛna; wo bɛ a plɛplɛ, azama.

² Wo bli éé bɔa féinu ma, ’té woo wo sié. Wo bli éé bɔa kɔnnu ma, ’té woo wo sié. Woo gla kɛla munu valé wolé kɔnnu ta; woo gla kɛla munu valé wolé zarafɛnu ta.

³ Bɛwemalé Gakelebale léma: Maa gi bɔrɔan wenaané kɛlɛle ma bɛn ’ko lɛ; yé ka ’ka bɔa sole lɛ a lee lo, yé ka dan tawo lɛ ka ’wuo vɔle nya ka wuo. Naa, ’bɛ bléyinu é dan kɛlɛ lɛ é nyané, azama.

⁴ ’Bɛ yi la, wo dan kalé we fe lɛ gi la; wo dan ka tɔ vɔ lɛ wu lɛrɛ nya, yé wo dan a fe lɛ léé, ko sɛrɛ tata. Wo kolé munu zé nɔ mi bɛnu lɛ. Yiba, wa si an lee. É kolé féinu guli ko nyanézannu ma.

⁵ Bɛwemalé i ’ka dan mi do kpen ye lɛ Gakelebale lé munu va, ’té é bawɔrɔ dan féi ma lo.

⁶ Wo léé: Té i balelawe fe lo; té wo ’bɛ zo we fe balelawe fele nya lo ma. Dére naanénu ’ka nyaan lo.

⁷ Jakɔb lé munu, é sɔ ka lɛ léé, ka we fe ’bɛ zoo? Gakelebale bli éé flian é kelee? Alé we kɛlɛbɛ lé ke bɛɛ? Dé mi lé we a é drɔle, an dére ’ka néné azé nya loo?

⁸ A péli sia namɔn, ’té woo we kɛla anlé munu lɛ bélé ’wo nyanézannu zo; munu lé woo giéan woboma duaa, ka wolé sɔ blɛnnu sié wo ta bélé gulizarafɛ sile zo.

⁹ Ka anlé munu va lomu bin‐é wo sɔlɛkɔnnu gi. Tɔbɔfɛ lé maa a nɔ wolé nénu lɛ, ka a sié wo lee tata.

¹⁰ ’Ka nwa, ’ka tawo, flinna ’ka fɛkona nya lo; ka tiri dɔle lé we ma léé, ka dan kle blɛn ble lɛ.

¹¹ Dé mi do vlan buru é pla, ’té éé a fé vié nya léé: Maa dan balelawe fe lɛ ka lɛ nwɛ valé dɔrɔ ’lɛ plɛplɛ lé we nya, ’bɛzan ɛ kɛla munu ’ko lé balelawefezan nya.

¹² Jakɔb‐oo, maa dan ilé munu faa zén lɛ ékeva. Maa dan Izraɛl munu pɔné faa zén lɛ ékeva. Maa dan wo zén lɛ ékeva bélé gɔrɔ do gi ’blanu zo, bélé trubɛ palu do zo wolé lu blena. Munu vun é dan we lɛ blɛn.

¹³ Gɔrɔfɔnzan éé giéan wo ’lɛ; wo dan gɔrɔ fɔn lɛ yé wo bɔ gɔrɔ ’léé, yé wo dan bɔra lɛ ana. Wo nwiinzan blɛn é dan tawo lɛ wo ’lɛ zia, yé Gakelebale é dan kɛlɛ lɛ wo zilɛzan nya.